الزواج اقل من سن العشرين

انا تزوجت عمري 20 وماخلصت دراسه للان للاسف 😥 ولي 10 سنوات زواج. طبعا بسبب ظروف جاتنا وماقدرت اخلص الجامعه بس باذن الله ناويه اكمل ... ومنجد مررره مقهوره واصلا احس بنات خالتي تزوجو كبار توهم قبل سنه ... وهم بعمري يعني 29 و28 تزوحو احس هم اختارو العريس بارادتهم وشروطهم حطوها مو زي انا مسكينه بالذات اني البنت الكبيره... ماعرف شي .. والحين هم ماشاء الله حياتهم احسن مني الله يهنيهم ...


انا باذن الله ماازوج بنتي الا لمن تخلص دراستها الجامعيه اقل شي ....

أنا تزوجت وعمري 14سنه وبعد شهر حملت وجبت أحلى ولد وعلى طول جبت وراه بنتين أمورات صح تعب المسؤوليه أنا الحين من الصباح لمة الليل وأنا صياح وتعديل حفاظات وتجهيز رضاعات طلبات الزوج ترتيب منزل وعمري 18سنه بس تهون لاجل عيالي ان شاء الله يكبرون ويعوضوني 💟💟 وعن الندم لما ازعل من المحروس ويطفشوني العيال اقول ليش تزوجت انا ليش مارفضت ليش ماقالت لي ماما المسؤوليه صعبه ههههههه ولما يروح الزعل ويناموا العيال اقول الحمدلله عادي ترى الزواج والاطفال نعمه اواسي نفسي ههههه الحمدلله على كل حال

ماشاء الله الله يهنيك بحياتك يأرب

انا اشوف الموضوع يتعلق بالبنت نفسها
في بنات مالها طموح واقصى احلامها تتزوج ويصير لها بيت وزوج وتنضم للمتزوجات وتصير تجلس مع الكبار
في بنات لا يهمها دراستها وتبي تخلص وتدرس اعلى او تتوظف وتعيش حياتها بروقان


اذكر ايام المتوسط
انا كل همي شلون اجيب نسبة كاملة
وبنات اعرفهم كلهم وش تجهز لدبش عرسها
واعرف للاسف كثير من صديقاتي
الي تزوجت بالمتوسط والي بالثانوي
كلهم مستواهم الدراسي كان مش ولابد واغلبهم ماكمل جامعة والي كملت يادوب كملت انتساب


وايام الثانوي اذكر في بنات كل همها كانت شلون تتزوج
والي تقول ادعيلي اتزوج ووووو


فيرجع للاهتمامات ومستوى العائلة وعقليتها
اغلب العوائل الي تزوج بناتها صغار يكون هالشيء بكل العائلة من الاب للجد


احنا الحمدلله ماعندنا هالشيء البنت ماتتزوج الا بعد ماتخلص دراستها
ولو بتنخطب تنخطب اخر السنين وشرط انها تكمل اعلى او تتوظف وزوجها ماله علاقة براتبها


ولي قريبة اهلها زوجوها وعمرها 20
دراستها اتعثرت وتعبت معه ونص فترة زواجها مشاكل وعند اهلها الين اتطلقت
بعدها رغم الخطاب قررت مااتتزوج الا بعد ماتخلص وتتوظف وتعز نفسها
وفعلا كملت دراستها واتوظفت وبعد الثلاثين اتزوجت وجابت عيال


وبصراحة
اللي تتزوج بعمر 15 الى عمر 18 وتقول لا عادي عايشة طفولتي وحياتي كذابة
كل الي اعرفهم وتزوجوا بهالاعمار مهما كان الزوج طيب ماعاشوا لا طفولة ولا مراهقة
الي بعمر 15 ومتزوجة تكون سهرانة على طفلها اللي يبكي وصديقتها الي بنفس عمرها سهرانة مع صديقاتها مبسوطين
اوكي هي راضية بهالزواج لكن لا تبين انها عايشة حياة عمرها الحقيقي لانه مهما انكرت وكابرت مستحيل تتقارن بالي بنفس عمرها ومو متزوجة !
وهالكلام شفته باللي اعرفهم شخصيا فوق 10 وكلهم نفس الكلام


خاصة اذا كان من النوع يتزوجون من هنا فورا يخلفون من هنا !
واعرف اكثر من واحدة شخصيا تزوجت وهي عمرها 16 ورغم انه اهلها كانوا جنبها ويشيلون عيالها الا انها للان تقول انا ماعشت مراهقة ولا طفولة ولا عشت براحة بال


فرق بين الي متزوجة وبالها بطبخ ونفخ وتنظيف وحمولة وعيال وبين الي جالسة ببيت اهلها تروح مدرستها وترجع وما برقبتها اي مسؤولية
فرق بين العزباء الي عمرها 16 ومبسوطة وسط صديقاتها وتروح وتيجي وبين المتزوجة الي لازم تنظم وقت روحتها ووقت رجعتها ولو راحت مع بزرانها ابتلشت فيهم ووو
المراهقة مو بروحة ملاهي ! وانها تعيش حياتها مو بمطعم تروح ولا كرتون تتفرجه
الاساس هنا انها تكون خالية من اي هموم ومسؤولية على اكتافها


وبنظري
بدال الاهتمام بتزويج البنت وهي ام 15 والي قانوناً تعتبر قاصر
الافضل الاهتمام بتربيتها ودراستها
على الاقل الي تتزوج اكبر يكون زواجها بكل اقتناع عن عقل وتفكير واختيار

انا افضل ان تتزوج البنت من سن 20 فما فوق