ابني والعربيه مساعده رجاء

الله يعينك حبيبتي و يسهل لك دربك. تربيه الأطفال خاصه بالغرب صعبه شويه مع احتكاك العادات المتعدده. انتي وينك ساكنه؟ من كلامك افتهم لي من امريكا؟

انا نفسيا ولدت و تربيت بامريكا و كنت تقريبا زي ابنك اتكلم انجليزي واصل. لما كنت تقريبا 6 أو 7 ما أذكر والله كلنا امي و ابي و اخواتي سافرنا السعوديه و جلسنا تقريبا سنتين و نص لأجل العربي فقط. الدراسات قالت إنه لو في شخص يحب يتعلم لغه ثانيه أسهل طريقه للتعلم هو أن يروح الشخص بلد يتكلموا باللغه هذي. انا الان ما أقل لك انه ضروري تسافري لا هههههه. ابنك لساته صغير و عقله ما شاء الله يستوعب كثير. عندي اخت الآن تقريبا زي عمره نفس المشكله انها كلامها كله انجليزي. أمي تاخذها المسجد و تكلمها عربي و ما ترضى ترد عليها امي اذا سألتها اختي شي إلا إذا اتكلمت عربي.

اللي حابه أخبرك انه ممكن لو تجيبي له مسلسلات كرتون عربي أو أي برامج اطفال ممكن يحبها تكون عربي أو إذا في مسجد قريب منكم توديه يتعلم اللغه أو مثلا إذا تعرفي أي واحده جاءت من بلاد عربيه و معاها اولاد ما يعرفو انجليزي خليه يلعب معاهم من أجل ابنك تكون عنده احتكاك بالعربي. أو إذا ابنك زي ما قلتي ما يقدر ينطق العين أو أي حرف عربي علميه الحروف بعدها اللي تشوفينها صعبه عليه جيبي له جائزه لما يتعلمها زي الشبس او أي حلاوي يحبه. الأطفال يحتاجو تحفيز. هذا اللي عندي و اتمنى اني افدتك بشي.

انا نفس الحال والله يعين
عيالي يتكلمو عربي بس مكسر
الحمدلله نطقهم سليم اذا اعطيتهم كلمات فيها ع - ق - ح -خ
لانه الحمدلله حافظين جزائين من القرآن
لكن المشكلة في القواعد ضمائر المونث والمذكر عندهم مضروبة على الاخر
وغير هذا مايعرفو يقرأو ويكتبو بالعربي
بس يفهمو الحمدلله اذا احد كلمهم بالعربي او اذا اتفرجو كرتون عربي
وحبيت اسال ام ليث
لما رجعتي السعودية ودرستي هل كان صعب عليك الاندماج ودراسة المواد بالعربي؟

والله نفس الشي اولادي معاد يبغو يتكلمو عربي وانا دايم في البيت اقولهم تكلمو عربي بس لاحياه لمن تنادي اعمارهم صغيره خمس واربع سنوات وخايفه ع لغتهم العربيه ربي يعيننا على تربيتهم ويهديهم

شكرا لكل من ردت
ام ليث 13 نعم انا بامريكا وانزل السعوديه بين فتره والثانيه لكن الفتره ما تكفي كلها شهر وارجع، وصعب علي مع دراستي انزل اكثر من شهر لاني اشتغل علي بحث. اما مسألة المسجد فعلا انا مسجلته بالمسجد وحلقه تحفيظ لكن مجهودهم جدا ضعيف وحلقه تحفيظ غير منظمه وغير ممنهجه نهائيا ويوم واحد بالاسبوع لمده ساعتين يتخللها فتره لعب واكل.
كلامي معاه بالبيت كله عربي واحاول اشغله كثير افلام كرتون عربيه واشرح له القصه اذا حسيت ما فهمها وهو بسم الله عليه يحب العربي ودائما معتز فيها ويقول انا عربي وحتكلم العربيه حتي بين اصحابه الاجانب.
لما حاولت ادرسه عربي حروف وكلمات بدا يتلعثم بالكلام سواء عربي او انجليزي وهذا اللي خلاني اوقف تعليم العربيه بعد فتره تلعثم استمرت اكثر من اربع شهور. وبسبب هذا الشي استمر التلعثم معاه بحروف معينه وخايفه عليه يصير التلعثم معاه علي طول


زهرة الغاب نفس الشي اولادي يتكلموا بينهم بالانجليزي لكن معاي اكلمهم عربي ويتكلموا عربي، الفرق بنتي صغيره وبدات تتعلم الان فاحاول بشتي الاستطاعه انها تكون لغتها الاولي عربيه والله يعين
اما مسألة الجيران فنعم عندي جيراني عرب سعوديين ويختلطون اولادي بهم لكن للاسف يلعبون ويتكلمون بالانجليزي ولا كلمة عربي بينهم وبين بعضهم رغم انه بعضهم يتكلم العربيه بطلاقه بس وقت نسألهم يقولوا الانجليزيه اسهل لنا

الصراحه اذكر اني في البدايه كان صعب قليل لكن زي كل شي في الحياه التعود يسهل كل شي. احنا جلسنا هناك تقريبا زي ما ذكرت سنتين. و امي الله يحفظها كانت ورانا في الدراسه لما الحمد لله صارت الدراسه اسهل. تعلم لغه صعبه لكن لأنه اولادك لساتهم صغار الله يحفظهم لك بيتعلمو بسهوله. الأطفال ما شاء الله يتعلمو الشي زي شرب الماء. ولأنه زي ما ذكرتي اولادك يفهمو يكون اسهل لهم تعلم اللغه. أتمنى اني جوبت سؤالك. ❤