بثوا فيني الامل

السلام عليكم ورحمة الله
بقولكم قصتي واللي ابغاه منكم بس انكم تعطوني امل وكمان كتبت من باب الفضفضة ،، قصتي،
انا طالبه جامعيه قبل سنتين و٧ اشهر تزوجت طبعاً كنت مملكة لمدة سنه وكان وقتها عمري ١٩اول سنه في الجامعة مااقولكم الشخص اللي اخذته كان ملاك بس اني انا كنت متحمسة للزواج والاستقرار والاكثر انه اعف نفسي ومااغلط واكلم ناس غريبين عني لانه كانت هذي الاشياء تراودني بس ماكنت اسويها ، فلما جاء العريس انتهزت الفرصة ووافقت بسرعة بدون تأني مع اني ابداً ماكان في بالي اتزوج قبل مااتخرج من الجامعة بس النصيب ، عموماً سنه مدة طويلة كفيلة بأنه تخليني اعرف الشخص اللي برتبط فيه بس بعد الزواج اكتشفت انه كان يمثل شخصية مو شخصيته مرت السنه وتزوجت ، الشخص اللي تزوجته كان شكاك ويتهمني في اشياء ماصارت وحسيته انه يحاول يمسك علي ذلة بس مو لاقي ، وغير كذا كل ماطلعت معاه مكان ونكون مبسوطين نرجع متخاصمين والسبب ليش تطالعين في الناس وانا شفتك تطالعين ،يعني ماادري يبغاني امشي وانا مغمضة وابداً ماكنت مبسوطة كم يوم ايوا وعشره لا ، عموماً شرطت عليه قبل الزواج انه مايمنعني عن دراستي وبعد ماتزوجت منعني بس انا ماسكت واشتكيت لاهلي وصارت مشكلة كبيره بسببه لانه كان يكابر ومايتجاوب ابداً وكل شويا يهددني بالطلاق وانا طفشت من هذي العيشة قلت يابنت ماعاش اللي يذلك اشتري راحة نفسك طالما هذي بدايتها معناته مافيه خير اتخذت قرار الطلاق واهلي هم اللي شجعوني وحلفوا ماارجع له خصوصاً بعد ماعرفوا موضوع الشك والاتهامات وهذي الاشياء .. عموماً رحت المحكمه ورفعت دعوى فسخ نكاح و١٠٠٪‏ القاضي في صفيبأذن الله .. بس كل ماارجع من الجلسة احس فيني غصة ماني قادرة استوعب اني حبيت انسان كذا نذل واحلف لكم بالله عمري ماقصرت معاه بشيء الحمد لله خلق ودين ونظافة وجمال،، بس ماادري كيف انساه واطلعه من عقلي مو عشان كله حب لا الاكثر اني مصدومة انا ماضريته بشي ليش كذا يسوي فيني يطنشني ومايصرف ولايسأل ولاحاول حتى يصلح لكن حسبي الله ونعم الوكيل ..عمري الان ٢١ ابغاكم تنصحوني وتدعولي .كيف انسى الماضي واعيش حياه جديدة ؟ على فكرة كل اللي حوليني يقوليلي والله ربي يعوضك واملي بالله كبير الحمد لله بس وجعي كيف يروح والظلم اللي انظلمته كيف انساه ؟