التجمع ال٩٩للمقبلات على الحقن المجهري واطفال الانابيب

كن أنت
صح لسانك وسلمت يمينك
نصائح ممتازة وتفائل رائع
اسأل الله العظيم أن يتمم حملك وأن يعطيك حتى يرضيك

سبحان الله
انتي رابع حالة متشابهه هنا

الله يشفيك ويارب تبشريننا بالحمل السليم عاجلا غير آجل

هل تم اكتشاف السؤال والصديد عن طريق أشعة الصبغه مثل اختنا الهنوف؟

ومين الدكتور اللي تراجعين عنده

اهلين
انا وانتي وام سدن والهنوف مشكلتنا الانابيب
كل وحده منكم اي جديد يصير معاها تخبرنا

انا حالياً انتظر الدكتور علشان اشوف ايش يقرر لي..

ما شاء الله تبارك الله تقريبا قريب من الطبيعي الله يتمم لك يارب
انا زوجي الحركة 10 والأمامية صفر
ضعف شديد مع ان الحركة مو مهمة في التلقيح المجهري بس ممكن تعبر عّن جودة العينة
التشوهات هي المشكلة الاساسية وهذا كلام أبحاث ودراسات مو مؤكد
الرازق هو الله انا خلاص بتوكل على الله اولا وأخيرا الأطباء ماعندهم علم مهما وصلو لأنهم يأخذون علمهم من كلام بشر
واحنا علمنا ناخذه من رب الناس
الاستغفار سلاحنا والرزق من عند الله هو اللي تكفل فيه
والله ياجرنا على كل ما يصيبنا من هم وحزن

اهلاً بنات

بما اني اشوف تجمع الحقن المجهري وأطفال الأنابيب الفتره هذي اغلبنا خلصوا العمليات واما تكللت بالنجاح الله يتمم للي نجحت لها او بالفشل الله يعوضكم جميعاً العوض الجميل..

عندي كم شغله ودي افيدكم فيها اذا سمحتوا لي..مجرد كم فكرة براسي زي السواليف كذا ..وابي كل البنات الي نجحت أو فشلت عمليتها تضيف عليها..بحيث هالتجمع يفيد كل اللي بيعيدون العملية..

نصايح عامة وليست طبية..نصايح مالها دخل بالدكتور والمختبر والمكان هذي الاشياء اذا بحثتوا بقوقل تطلعلكم مئات النتائج..

انا الي باقوله هنا نصايح أخت لأختها..

وترا ٥٠٪‏ من النصايح الي بالموضوع انا ماسويتها لكن الحين تمنيت إني سويتها وعرفت قيمتها وابيكم تستفيدون من تجربتي بسلبياتها وايجابياتها..

اول شي انا باعرفكم على وضعي..انا لي ست سنوات امشي بالسابعه متزوجه..للاسف عقمنا غير مفسر..وهو أسوأ انواع العقم..ماتدرين وش ممكن تسوين عشان تساعدين نفسك او زوجك..بويضاتي جودتها ممتازه والمخزون عالي وماعندي اي مشاكل وزوجي ماعنده اي مشكله ايضاً..

ثاني شي بادخل معكم بالتحضيرات للعملية..اللي انا اشوف انها أهم من العملية بحد ذاتها واهم من الطبيب والمختبر والممرضات وكل شي..

اول شي انتي وزوجك بيكون عندك تصور انه حنا بنسويها بالوقت الفلاني..لانه يناسبنا نفسياً ومادياً واجتماعياً..

كيف نفسياً واجتماعياً ومادياً وصحياً؟

نفسياً نكون مهيئين وعارفين التوقيت من قبلها بفترة وداخلين العملية وكلنا طاقة ايجابية وتفاؤل..

اجتماعياً مافي اي مناسبات قريبة..لازواجات ولاعزايم ولا اجتماعات ولا اعياد ولاغيره..
عشان كذا انا كنت اشوف انه غلط ان كثير من البنات بدأو عملياتهم بنص رمضان..لان اكيد بيدخل عليهم العيد وناس داخله وطالعه وتنظيف وشيل ثقيل..هذا غير ان المستشفيات تقفل وانتي بفترة توتر ومتابعه وماتبين تنتظرين لين يفتحون..

مادياً مثلاً اناوزوجي قررنا نسويها بمارش وسوينا جمعية لهالشي..اخذنا المبلغ وعزلناه من قبل ست شهور وصرنا نزيد عليه للاحتياط..

صحياً..انتي وزوجك تعالجون اي مشاكل موجودة عندكم..اذا دورتك ملخبطة نظميها..اذا زوجك عنده مشكلة بعينته يشوف طبيب ذكورة..وياخذ الفيتامينات والأدوية المطلوبة..برضو اذا انت تحتاجين تطعيمات معينة ماتقدرين تاخذينها اثناء الحمل..يستحسن تاخذينها مثل الوباء الكبدي والحمى الشوكية والدرن..

ايضاً من ناحية توقيت العملية انصح لو تسوونها بالشتاء..مافي اسوأ من اخذ الابر بعز الحر..وترا بالشتاء افضل عشان التردد عالمواعيد وخصوصاً الي يسافرون من مدينة لمدينة..

بعدها قررت نبدا انا وهو ننزل اوزاننا..مع اننا مو مره زايدين وطبعاً للاسف هو ماالتزم

اشتركنا بنوادي والتزمنا وهو سحب وانا كملت..
سبحان الله كيف ان الاكل الصحي والرياضة تحسن النفسية وتغير نظرتك لنفسك وللحياة..حتى لو مانزل وزنك..

أكلي خليته سلطات وفواكة وخضروات..ادمنت الجرجير والافوكادو و الطماطم و المكسرات وانواع التوت..طبعاً للاسف كل هذا كرهته الحين..

قطعت اكل المطاعم نهائياً والشبسات والشوكولاتات

بنات الأكل الصحي مهم للعملية عشان تنجح و حتى بعد الحمل..

خلصنا من الوزن والاكل الصحي✔️

قبل العملية انصح لو تقدرين تسافرين اسبوع..حتى لو يومين ثلاثة..لانها لانجحت بتنحبسين لين بعد مايكبر البيبي شر حبسة

بعد ك شي كمالي انصح تسوين جلسة ليزر اذا تسوين ليزر لشعر الجسم..وتشيكين على أسنانك كامله لانه بعد الترجيع مافي ادوية ومافي أشعة..عندك ضرس تعبان صلحية..عندك عصب عالجية عندك تسوس شيلية..واللثة اللثة يابنات ترا تلتهب بشكل غير طبيعي

إذا تصبغين شعرك فاتح اصبغيه غامق يعني رجعي لون شعرك الطبيعي افضل..واذا عندك شيب تصبغينه برضو اصبغيه..مافي اسوأ من نفسية التنشيط وتقومين الصبح تشوفين نفسك بالمراية ويجيك احباط زود على الاحباط

برضو الي تسوي بوتكس وفيلر تسوي لها جلسة قبل التنشيط..لان هذا من أكبر الممنوعات..

طيب تجهزنا وصرنا عرايس من اول وجديد ❤️✔️

رحنا وبدينا تنشيط..

التنشيط بنات فترة مهمة وحساسة..لازم نتبع كل التعليمات فيها بدقة..نصنا لخبطنا الجرعات اول مابدينا..

لما تبدون تنشيط ركزوا اكثر من قبل على التغذية..خلو اكلكم كله خضار وفاكهه ولحم وسمك..اشربوا عصيرات

والاهم..انكم اذا تمارسون الرياضة لازم توقفونها..لان المبايض بتنتفخ مع التنشيط ماينفع نزيد عليها الضغط..استمروا بالمشي لانه ممتاز فترة التنشيط..امشوا الصبح خصوصاً الغير موظفات..
والموية قارورتين كبار اشربيها كانها فرض..واذا زدتي فهو لمصلحتك..

بالفترة هذي حاولي تريحين نفسيتك..اسمعي قرآن بصوت المقريء الي تحبينه..اجذبي افكار جميلة..حاولي ماتختلطين مع ناس سلبية..حتى بالمنتدى في بنات الله يهديهم كلامهم يضيق الصدر ويجيب الهم..انسحبي تماماً من اي مجال سلبي..ووقفي قراءة بالنت وبحث بقوقل..القراءة والبحث مفروض قبل لاتبدين العملية..

خلصتي التنشيط..جا وقت السحب..
وسحبتي..ومن بكرا بتتلقين المكالمة وتعرفين كم انسحب وكم تلقح والدرجات والخ..ومتى بترجعين

بنات..افهموني

ماله دخله اجنتك اي درجة..

ماله دخل الترجيع اليوم الثالث او الخامس..

الموضوع توفيق من الله..ياما بنات معنا هنا اجنتهم درجة ثانية ونجحت (رجاءً اللي ترد من الحوامل واجنتها درجة ثانية تعلمنا عشان يعرفون انه ماااااااله دخل)

وماله علاقة يوم الترجيع..كثيررررر رجعوا اليوم الثالث وحملوا وانا منهم بتجربتي السابقة بس الله ماكتب يكمل الحمل..

اشربي موية كثير عشان يخف معك الم المبايض بعد السحب..
روحي سوي مساج عميق واسترخي المساج بيساعد كثير على التخلص من الم السحب..

وودعي الاطعمة الممنوعة بعد الترجيع تعشي شي سبايسي ومبهر او اي شي تشتهينة و اشربي قهوتك المفضلة..وكولي شوكلت اذا انتي من عشاقة للعلم الممنوعات هي:
الزنجبيل
القرفة
البهارات الحارة والشطات و الفلفل
الشكولاته
الكافيين بانواعه من قهوة وشاهي
الغازيات<نقطة ضعفي


جا يوم الترجيع..ورجعتي..

تبدا حالة مخيفة عند كل البنات اسمها وش الاعراض؟ وش حسيتوا فيه؟ انا مااحس بشي شكلي مو حامل..
وتجيك وحده عندي نغزة بالجهة الشمال شرق الكلية..
والثانية تقول لااااا انا حسيت النغزة باقصى غرب الطحال!!

واذا ماصادتها حالة الاعراض تصيدها حالة وش سويتوا يوم رجعتوا بفترة الانتظار؟ وش اكلتوا؟ وش شربتوا؟ على اي جهه نمتوا؟

بنات ( تخيلوني ماسكة روسكم واهزها)

مافي شي اسمه اعراض ومافي شي اسمه وش سويتوا ووش اكلتوا عشان تنجح..

مافي اعراض للحمل..مااافي..فاهمين؟ مااااافي اعراض..الا بالاسابيع المتقدمه الاسبوع التاسع والعاشر انتي توك بتصيرين بالاسبوع الرابع اذا خلصتي فترة الانتظار!

النغزات الي تحسونها والمغص واحيانا الغثيان او الصداع كلها من اثار المنشطات والسحب والترجيع والمثبتات الي اخذناها وناخذها..كلها عبارة عن هرمونات..
الي قد اخذت حبوب منع الحمل وجربت صداعها ومغصها وغثيانها بتعرف وش عنه اتكلم..كلها هرمونات باختلاف تركيبها الوظيفي..


اما كم ارتحتوا ووشلون نمتوا ومتى تروشتوا ووش اكلتوا..

الراحة التامة التامة يومين بس..بعدها خلاص تعيشين طبيعي..بس بدون اجهاد..بدون ماتشيلين ثقيل او تدفين شي..الاستحمام برضو بعد يومين..المهم بموية متوسطة الحرارة..الصلاة عادي..الطلعة عادي..الزيارات عادي..السفر بالطيارة عادي..

اما الاكل والشرب وينك عن الاكل الصحي والزين الشهور الي فاتت؟ الحين ممكن تلحقين على نفسك عشان البيبي وصحته لو صار حمل..

اما جودة الاجنة والتصاقها هذي فاتت عليك الحين..

مافي اكل وشرب يخلي الاجنة تلتصق ولا يحسن جودتها..

وبعدين تقرب مرحلة انتهاء الانتظار والتحليل ويبدون البنات يتساقطون ويضعفون ويحللون قبل مايكملون ١٢ او ١٤ يوم حسب مااوصى الطبيب..ويطلع تحليل البيت سالب وتتحطم او يطلع تحليل الدم الرقمي ضعيف وبرضو تتحطم..وفيه من توقف المثبتات وتنهار..

بنات..اكبر غلط التحليل قبل وقت التحليل..ممكن ترا يكون فيه حمل قاعد ينمو بس لانك شفتي قبل وقتك المحدد وتحطمتي وانهرتي وحالتك النفسيه اثرت عالنتيجة النهائية..

الصبر زين..وانتي مشيتي كل هالمشوار وصبرتي وتحملتي..تحملي كم يوم..لهي نفسك وانشغلي باي شي خوذي مخك بعييييد عن موضوع التحليل لين يجي وقته..وترا حتى لو طلع التحليل ايجابي..لسه بتنتظرين وتعيدينن بعد يومين عشان تتاكدين انه تضاعف..ولازم بعدها تنتظرين اسبوعين عشان تتاكدين من وجود جنين ونبض..رحلتك لسه مانتهت..الصبر الصبر لين يجي وقت التحليل

وبعدها..

الله يسمع الجميع مايسر يارب ويعوض صبرنا بذرية كاملة الخَلق والخُلق تقر عيوننا و تسعدنا ماتشقينا..

بنات

كل المنتظرات والمتفائلات بالذرية يحتاجون تعليقاتكم ومساندتكم..اي اضافة لهالموضوع بيكون لها قيمة كبيرة ومرجعية..

دعواتكم لي الله يتمم لي ويحفظ لي مافي رحمي ويجعل حملي هين لين وييسر ولادتهم وتربيتهم..ويرزقني بالذكر والانثى الصالحين المصلحين تامي الخلق والخلقة اذكياء جميلين بارين بي وبوالدهم يارب العالمين..لي ولجميع من رغبت يارب ❤️

اللهم صل وسلم على نبيك محمد واله وصحبة اجمعين والحمدلله رب العالمين ❤️


الله يتمم لك على خير فعلا الاسنان مهمه قبل الحمل الوحده تشيك