سر تعاستي ..

انا ما اكره السعادة .. الحمدلله انا ابنه لعائلة محترمه ولها مكانتها الاجتماعية ومتزوجة وام لثلاثة اولاد وموظفة ولكن مايفسد سعادتي زوجي ..
راح اقولكم محاسنه وعيوبه وانتم زوجات مثلي لو زوجك كذا اشلون تتعاملون معه :
محاسنه :
- طيب جداً وسهل الرضى .
- شخصيته واضحة ومرنه .
- مو متحكم بلبسي ويسمح لي بالخروج وزيارة صاحباتي واهلي واحياناً يوديني اذا تسمح له الظروف ( معطيني حريتي)
- متعاون بالبيت يطبخ بكل الاوقات حتى وقت الدوام القى الغداء جاهز / ينظف /يمسك لي البزران وقت الدوام او اذا عندي مشوار / هو اللي يوصلني للدوامي ويرجعني / احياناً اكون تعبانه يسوي لي مساج .
_ يقول كلام حلو ودايم يمدح فيني ويقول انه مايستغني عني وانه يحب كذا وكذا فيني وانه مو مصدق انه اخذني .
- يحترم اهلي ويكرمهم ولو احتاجو شي مايقصر معاهم .
- ماقد مد يده علي / ولا عمره سبتي او تلفظ علي ولله الحمد .
- اسرار بيتنا ابداً ماتطلع ولا وين رحنا ولا وين جينا .
- قليل الخروج من البيت يخرج من البيت بعد المغرب للاستراحة ويرجع 10
----------------
راح اذكر عيوبه :
_ الكذب بكل شي / والحديث عن الناس / المزح الدايم ماعنده ثقل ابداً.
_ ماعنده شي اسمه خصوصيه يتفرج بجوالي عادي حتى الواتس والسناب / معتبر فلوسي فلوسه ويتصرف بكيفه .
_ مستفز : مثلاً حاجة معروفه ويقول لا مو كذا .. اجي بتكلم معه بخبر يقول مو اللي كذا حتى لو موصح كلامه بس اهم شي يقول اعرف .
_ دايم الانتقاد لاسلوب حياتي .. انتي تنامين للظهر ليه ماتصحين الفجر ( هو عكسي يحب النهار وانا احب الليل )_ليه ماتكلين ( انا اكل الوجبات الثلاث بس ماحب الاكل التقليدي الكبسات والطبخ ع الصبح ) .
_ دايم يردد انا بتزوج وانا البنات يموتون علي .. وعادي لو يشوف بنت بالشارع يقول وش هالحلا ويسوي نفسه معجب(طبعاً مايكلمها بس يغايضني)
..............
نبذه عنه :
* هو من عائلة غير اجتماعيه ابداً .. ولايوجد بين اهله واعمامه صلة رحم بالعكس مشاكل بينهم ( هو يزور اعمامه ودايم يساعدهم )..امه يحبها بشده ويتأثر بها لكن ابوه اشعر انه يكرهه ويتمنى موته (احس انه مسبب له احراج مع الناس لانه معروف عنه الكذب والمشاكل).. اما اخواته واخوانه يحبهم ويخدمهم ويحن عليهم .
* قليل الصداقات .. وليس لديه اصدقاء علاقته معهم بعمق وهو يقول اتفشل من سمعة ابوي وانحرج من تصرفات ابوي قدامهم .

14 تعليق 1,543 مشاهدة

شاركي في النقاش

سجلي الدخول لإضافة تعليق.

التعليقات

13
  1. @am_ghlaty_hyaty

    قولي الحمد لله ماعندك مشاكل كبيره
    كلها اختلاف اطباع هذي موجوده في كل بيت
    كلنا نعاني خاصه اول حياتنا بعدين نتأقلم على بعض وكلن يقدم تنازلات وتمشي الحياة
  2. @mshaaal_hmdan

    صاحبة الموضوع

    المشاركة المقتبسة غير متاحة.

    * انا ماسردت سيرة ذاتية .. انا سردي هذا من اجل تفهمون الموضوع من جميع نواحيه .
    * وانا هنا اسأل عشان رايك هذا ( مايغير الرجال الا زوجته ) سألت : وش لون اتعامل معه ؟
    * مو شرط الخلل كله مني .. هو كذا من بيت اهله جاني .
  3. @skr_zyadh_27

    احس فيه تصرفات مراهقه
    او ماعاش مراهقته
    شوفي النت كيف أتصرف مع الرجل المراهق او الطفولي
    احس مانضج كثير
    وترى محاسنه نادره لاتخسريه حافظي وتمسكي فيه
    انا اعتقد لمن يمدح البنت الي بالشارع يبي يشوف مدى غيرتك وحبك له
    وكلالرجال يقولو بنتزوج ولايتزوجو
    الخوف من الساكت
  4. شوفي حبيبتي ..
    محاسنه كثيرره وحلوه حاولي تتغاضين عن سلبياته
    أو حاولي تصلحين منها ولو شئ يسير
    وحاولي أن تتعايشين مع وضعك وتتقبلينه لأنه زوجك وأبو عيالك
    الله يوفقكم ويسعدكم

تابعي تجارب أخرى من هذا القسم.