التجمع (36) لأجمل حوامل وأمهات التوائم

بنات ياااااحلو البنج النصفي تجربه جميله جدا جدا انصحكم فيه اذا ولادتكم بتكون قيصري ..
اكشن ولادتي :
طبعا مثل ماانتو عارفين المستشفى أعطوني موعد الولاده و كنت أدعي يارب مايجيني طلق او الم قبل موعد العمليه.. والحمدلله جاء موعد العمليه بدون مايجيني طلق ..
رحت المستشفى ليلة العمليه و بالصبح حضروني للعمليات و الحمدلله كنت ريلاااااكس ماتوقعت أكون كذا ،، دخلوني غرفة العمليات و أعطوني ابرة الظهر و كانت سهله الحمدلله بعد ماتبنجت اسدحوني و حطو بيني وبين بطني ستاره و بعدها دخلوا زوجي و جلس بجنب راسي و دكاتره البنج اثنين جالسين بعد فوق راسي يشوفون الوضع وقالوا لي لو حسيتي انك متوتره قولي لنا نعطيك ابرة مهديه ، قلت لهم مااحتاجها الحمدلله . شوي دخلت دكتورتي الي بتولدني و على طول بدوا و توني اقول لدكتور البنج بدت الدكتوره ولا لسى قال ايه ودقيقه وحده سمعت اول و اجمل صرخه سمعتها بحياتي طلعوا ولدي حبيبي و بعدها بدقيقه سمعت صرخة بنتي يالله بنات بكيت انا وزوجي من جمال الموقف و على طول قاسوا التنفس عندهم و الوزن و كل شي طبيعي و كل شي كان مصور و صورني معهم انا وزوجي .. بعدها كملت الدكتوره العمليه و قلت لزوجي يطلع يكلم اهلي و اهله يبشرهم ،، و طلعوني غرفة الافاقه جلست فيها نص ساعه و طلعوني غرفتي شوي و جاو اهلي و انبسطت معهم بهالخبر الحلو و كل هذا و انا لسى مخدرة من تحت بعد اربع ساعات بدا يفك البنج و اول ماحسيت بألم قلت لنيرس تعطيني ابرة مسكنه و اعطتني و الحمدلله راح الم وبعدها رجع الم قوووي و اعطتني أبره غير مسكنه و منووومه نمت احلى نومه بحياتي .. و العصر صحيت و كلمتهم يجيبون لي عيالي غرفتي و نسيت كل الالم الي حسّيت فيه يوم شفتهم بس ماقدرت أحضانهم لان للحين مااقدر اوقف .. بالليل الساعه 12 جاتني النيرس و قالت يالله لآزم تمشين و ساعدتني هي و ماما و كانت الوقفه صعبه جدا جدا و جلست نص ساعه على ماوصلت الحمام و ابكي بس سبحان الله هذي اصعب شي بالقيصري و بعدها خلاااااص كل شي يهون و الصباح اليوم الثاني صارت ماما تساعدني بالقومه و انا أمشي لحالي و خُف الالم كثييييير كل مامشيت كل ماالم يخف ..
و الحمدلله من قبل و من بعد 💜

ماشاء الله تبارك الله
الله يصلحهم ويحفظهم لك ❤
تجربتك الحمد لله تشجعنا ع النصفي
شعوور حلو وانتي تسمعي صوت البيبي اول مايطلع ينسيك كل الي مريتي فيه
ان شاء الله ام تميم تطمنا عنها وعن بيبيهاتها الله يسهل عليها

ماشاء الله تبارك الله

مره حبيت اكشنك الله يجعله فال لنا كلنا يارب

يتربون بعزكم يارب وعقبالي انا والبنات

الله يسلمك ياعسل ..
بخصوص البطن والله من سويت العمليه و انا كل شوي ارفع قميص العمليات ويالله ارفع راسي اشوف بطني > ابي اتطمن 😂😂
وبس والله اول يومين كان منتفخ مرررره من الغازات كاني بالشهر السادس تقريبا شوي شوي وبدا الانتفاخ يخف .. تقريبا بعد اسبوع من العمليه صار بطني صغير و الحمدلله كنت خايفه يكون مترهل مره بس اشوا الحمدلله وضعه اوك صحيح يختلف حيل عن قبل بس مااظن يااخذ وقت طويل و يرجع مثل اول ..
حاليا بطني من فوق قاسي و من تحت قريب من العمليه احس لين ماادري ليش

ايوا بنات بخصوص الرضاعة الطبيعيه ..
تخيلوا للحين ماجاء في حليب . بعد العمليه باسبوع نزل مني الحليب الاصفر " اللبا" و لحد الان ينزل قطرات بسسس .. جربت أرضعهم كثير مايطلع شي و كل شوي اشفط اقول يمكن ينزل حليب اكثر بس ابدا مانزل شي ..
يادوب قطراااااات خفيفه و بعد مو حليب .. فقط اللبا.
ماادري ليش .. صحيح الطلق هو الي يسرع الحليب بس ماتوقعت لهالدرجة طول الحليب مانزل مني 💔
لما كنت حامل ماكنت متحمسه لرضاعه و ماجاء ببالي أرضع بس لما شفتهم حنييييييت عليهم و نفسي أرضعهم من صدري وكل شوي احاول اشفط و اشفط و اشفط يوميا و كم مره باليوم بس مازال قطرات 💔💔