التباشير 5 لمواليد سبتمبر وأكتوبر 2017

ننتظر الاكشن

تسلم يدينك خوخ و تين و ربي يسهلك ولادتك و يجزاك عنا خير الجزاء
يا رب يكون هالتجمع تباشير خير للبقية و يرزقنا ولادة سهلة ميسرة

اللهم امين 😘

والله مو قادرة اسوي شي لا مشي ولا غيره
والدكتورة تقول كثري جماع 🙈
ماتدري اني مقاطعته ذا الشي من شهرين ماش ماتمشي كرشه وذا 😣
يارب التساهيل من عندك

حملي هذا مرة كسلانة اجازة واخذتها بدري ومشي مافيني حيل ولا سويت اي مجهود باقي تقريبا عشر ايام واعوشر 😣

أول شي بما اني بكرية ف بصراحة ما ادري وش الطلق بالضبط
اعرف انه يشبه مغص الدورة وكذا بس ماكنت عارفة وش احساسه

اليوم الي قبل ولادتي حسيت بطلقات بس كانت خفيفة بعد ماذقت الصدقية عرفت انها كانت ولا شي

المهم حاولت احسب لها بس ماكنت منتظمة وكانت باردة مرة
طول اليوم كنت حاسة بدوخة خفيفة وحومة كبد حتى وجهي كان متغير كل من شافني قال شكل ولادتك قربت

المهم مع العشا شربت عصير أناناس الي من شركة كي دي دي مكتوب انه طبيعي ١٠٠٪‏
بعدها طلعت مشيت بالحوش تقريباً نص ساعة وتعبت ودخلت ارتحت
على الساعة ١٢ تقريبا اخذت عصير اناناس ثاني و طلعت مشيت مرة ثانية نفس الشي تقريبا نص ساعة ولما تعبت دخلت ارتاح عالسرير
بعدها بدا الجد

بديت احس بطلقات حارة متفاوتة مو منتظمة ابداً بس كانت بالبداية محتملة يعني مؤلمة بس اقدر اتحمل وانا جالسة مايبين علي شي
رحت اخذت زيت زيتون مقري فيه وانا قارية فيه بعد و دهنت بطني وصدري

على قرب الفجر زادت بشكل مو طبيعي وانا احسب ينقص الوقت بين الطلقات بسرعة يعني من ١٠ دقايق الى ٧ الى ٥ بسرعة
الي خلاني أشك انه طلق كاذب لأنه مو منتظم

امي وقتها نايمة قلت انتظر لين يأذن الفجر تقوم واقول لها وادخل دورة المياة واشغل المويا الا هي حارة الحمدلله واجلس تحتها طولت وكل ماجتني طلقة أتحرك واخلي المويا تصب على ظهري وبطني خففت الألم كثييييير

و فيه حركة ثانية اني أتمسك بشيء المغسلة مثلاً واحرك نفسي بقوة واهز نفسي يروح نص الالم
( الحركة هذي اخذتها من مدربة كويتية الله يجزاها خير من شرح آية " و هزّي إليك بِجِذْع النخلة " من سورة مريم ، كانت تقول تخيلي أنك تهزين جذع النخلة عشان يطيح لك رطب .. كيف تهزينه ؟ أكيد بقوة شديدة .. يعني تخيلي القوة المطلوبة )

سبحان الله هالحركة احسها ساعدت كثير بس برضو انا سويت اشياء كثير ومتنوعة منها المشي وعصير الأناناس وزيت الزيتون و المويا الحار والحركة و الهز بقوة فما أدري أيها نفعني كثير و أيها مانفع

المهم نرجع للطلق
بعد اذان الفجر جيت لأمي من يوم شافت وجهي عرفت
قالت امشي جهزي حالك عالمستشفى
والله حبيبة قلبي انحاست اكثر مني وتروح اختي تجيب شناطي ويلبسوني العباية ووقتها الطلق قريب من بعض بشكل مو طبيعي وانا للحين شاكة بوضعي اقول مو منتظم اكيد مو ولادة هم يقولون لازم يصير منتظم

وطيراااان عالمستشفى الحمدلله انه الفجر ومافي زحمة
وصلت وتكشف علي قالت ولادة خلاص الرحم مفتوح ٩
وانا وجهي صار كذا
جتني خرعة مو طبيعية من القصص الي اسمعها يطولون الناس ماتوصل ٩ على طول
بس قالت الرأس فوق مو نازل والمويا لسا مانزلت
المهم ودّوني غرفة الولادة وحطوا التخطيط وكذا بس انا مابي اجلس عالسرير ابد ابي أتحرك
شوي وقلت القابلة الله يسعدها كانت متعاونة وحبيبة مرة
قلت لها ابي دورة المياه ابي مويا حار شيلي الجهاز عني
كان الطلق حااااار حاااااار يموت وورا بعض بشكل قريب مرة اتوقع دقيقة او اقل بين الطلقات مايمديني اخذ نفس الا بدت الثانية
راحت تركض تستأذن من الدكتورة وسمحت لها واروح تحت المويا الحار
وكان يخفف الطلق عني بشكل كبير
جلست معاي تخليني اذا جا الطلق اسوي سكوات وادفع خفيف
يوم نزل الرأس وقرب خلتني ادخل على طول عالسرير ونادت الدكتورة والممرضات وكل الدنيا جت تركض وانا خلاص منتهية شبه ميتة من قوة الطلق يذبح
كل هذا والمويا لسا مانزل قالت الدكتورة بفك المويا وخفت قالت ماعليك ماراح تحسين وراح يسرع الولادة وكذا قلت خلاص وفكته بسرعة ماحسيت بشي بعدها صاروا يعلموني متى ادفع بقوة وانا ماعاد فيني حيل بس احاول حسيت اني منتهييييية بس خلاص اخر رمق جلست اقول بنفسي يا ادفع بقوة وتطلع بنتي يا اتعسر و يتدخلون و يشفطون ومدري ايش
المهم طولت وانا مو قادرة ادفع زين واجلس اصارخ ماقدر ماقدر
بعدها سبحان الله دفعت بقوة وهم يقولون كملي كملي لاتوقفين وأظل دافعة لين طلعت ياربي لك الحمد عالساعه ٨ تقريبا
انا كنت رافضة شق العجان نهائياً واحتجت خياطة بسيطة الحمدلله

ااااه الحمدلله احساس مو طبيعي بعد ما طلعت احس اني احلللم ❤️

ايه صح طول الوقت الحمدلله وانا ادعي ومع شدة الطلق أردد لا اله الا الله و لاحول ولاقوة الا بالله واحياناً اقرا سورة الزلزلة و ادعي دعاء اللهم لا سهل إلا ماجعلته سهل وأنت تجعل الحزن اذا شئت سهلا

يمه احس اني كثرت حكي وتفاصيل
صار موضوع لحاله اسفة عالإطالة والله يارب ماكنتش تقيلة عليكو