ممكن رأيكم كيف أقربه مني؟

السلام عليكم
أتمنى تطولون بالكم علي وتحسنون النية معي لانه انا عارفة بعض العضوات مايعطون فرصة لصاحب المشكلة انه يشرح ..
عموما موضوعي عادي بس انا عندي قصة صارت لي وهي اني رافقت الوالدة للعلاج بالخارج وبيوم كنت ادور على شقة للسكن كمرافقة بجانب المستشفى وكان بوقت المغرب لانه كنا اكثر من شخص بحاجة للسكن ،،، المهم كان معي وحدة من الاهل وشفنا شخص خليجي مثلنا بس هو من جنسية غير ،،،
وهو شاور على عمارة معينة وقالنا أي خدمة تبونها أنا موجود واحنا بغربة لاتنحرجون والناس لبعضها وانا اعرف صاحب هالبناية لانه صارلي سنة بالبلد وخذو رقمي فقلت للمرأة اللي كانت معي اوكي خذي رقمه وهي خذته ونسيناه وسكنا بفندق من اختيارنا ومر ثلاثة أسابيع تقريبا وحسينا ان تكلفة الفندق غالية للمدة الطويلة واضطرينا نتواصل معه لانه كنا نبا شقة ارخص من غرفة بفندق وهو بصراحة كان محترم جدا ،، ولما اتصلنا فيه كان من رقمي ،،، المهم انا كنت اشوفه رجل كبير بالعمر ولكن مرة شفناه مع ولدين صغار بالمستشفى واختي قالت له الله يخليهم لك فقال لا لا هذيلا مو عيالي انا صغير ومو متزوج بس انا شعري ابيض ،،،وهو وضح لي لاحقا مواليده واكتشفت ان هو اكبر مني ب4 سنوات فقط،،
لما كنا نتواصل علشان الشقة هو كان يتصل من الواتساب فهو مع الأيام صار يرسل بين فترة وفترة رسالة مثل صباح الخير الخ ... وبكل صدق وأمانة انا مادري او نسيت كيف علاقتنا فيه تتطورت وهو عبر لي عن مشاعره وقالي انتي المرأة اللي كنت ادور عليها ...
طبعا بتقولون دامه انتي المرأة اللي كان يدور عليها ليش ما تقدم رسمي ،،، فأنا طبعا مستحيل أسأله هالسؤال واصلا انا اغلب الوقت ما ارد عليه وقلت له انا ماحب التواصل مع رجل غريب وكنا نبا خدمة وخلاص ولكن يابنات انا حنيت له ويجي على بالي دايم وبقلبي غصة بس كيف اقربه مني وكيف اخليه هو بنفسه يتقدم لي بدون لا أفقد كرامتي وبدون ما أقول له ؟؟؟
هذا هو سؤالي واعذروني لو كانت القصة مو واضحة،،