انصحوني

السلام عليكم اخواتي
اعذروني بتكلم واقول الي بخاطري يمكن كلامي مايكون متناسق بس بقول الي بقلبي بكل راحه
حياتي الزوجين من أول عاديه فيها يوم حلو ويوم مر والحمدلله ماشين
الين لحظة عرفت انه يكلم بنات ويترجاهم عشان يعطونه وجه وبس يبغا صديقات على قوله
انا هنا الدنيا سودت بوجهي وبديت اهتم فيه اكثر واهملت بيتي ودراستي وكل شي قلت يمكن انا اكون مقصره وما اسمعه وما افهمه
بس للأسف ماكان في اي فايده ابدا بالعكس كل ماله يتمادى اكثر واكثر
بس البنات طبعا مو معطينه وجه والي تكلم وتسحب وما الى ذلك ف ماكنت احسه متغير عادي جدا معايا بس كنت احاول اني اشبعه اهتمام وكان عندي امل انه يعقل ويبطل
بعد فتره يمكن شهرين او ٣ تعرف على وحده متزوجه وبدأ معاها قصة حب والله العظيم كلام عمره ماقاله لي حب واهتمام وكل شي
لدرجة ماتتخيلونها
هي قايلتله انها على وشك طلاق وانها ببيت اهلها
طبعا انا كل ما اواجهه ينكر ويحلف ويقول بعدي الشك وخلينا نعيش مرتاحين
المهم بعد محاولات عرفت اوصل لرقمها وكلمتها
الي فهمته منها انه واعدها بالزواج اذا تطلقت وانه يحبها
اسراري الخاصه فيني يعلمها وكل شي معلمها عرفتو يعني واثق فيها جدا
وانا يازوجته والله العظيم مايثق فيا ولا يقولي شي بالعكس انا اذا قلتله شي على طول يعلم ومايحفظ سري
المهم بعد مكالمتي لها انا كنت بروح لاهلي وخلاص بتطلق لاني حسيته كذاب خاين منافق
بس كالعاده انكر وكذب عند اهلي وعرف يخرج نفسه
بعد يومين جاني يعتذر ويقولي انا تركتها وانا مستحيل ادمر بيتي عشانها وقلتلها يابنت الناس خلاص كل واحد بطريق
صدقته بس للأسف طلع يكذب كعادته
انا الدنيا سودت بعيني كرهت كل شي حتى نفسي اهملتها معد احس بطعم لاي شي
حزينه وطول وقتي شاكه فيه وخايفه يخرج معاها لانه طلب منها وهي قالتله ماقدر عشان اهلي
كرهته كره ومو مرتاحه معاه ابداااااا حاسه نفسي بمرض معاه
ودي اتطلق وماودي اترك عيالي
هو يحبني ويعاملني كويس نوعا ما
بس بنفس الوقت مو مريحني الشك ولا اخرج ولا اروح ممنوع اي مكان الا معاه حتى صاحباتي اقاربي ممنوع ودي اغير جو ودي اروح اخرج عالاقل ممكن انسى وممكن نفسيتي تتحسن


طيب انا اسفه طولت بس ابغا منكم تدعولي الله ينصرني على هذي الي معاه هي باقي ماتطلقت وتفكر تتزوج وتحب وتعشق من ذحين حسبي الله ونعم الوكيل فيها والله يحرق قلبها زي ماحرقت لي قلبي ويجعلها تذوق الي انا ذقته
ادعولي الله يفرج همي وييسر أمري ويكتب الي فيه الخير
لاني جديا افكر في الطلاق ابغا اشتري راحة دماغي بس مابغا استعجل
وانصحوني لو عندكم نصايح اقدر اطبقها لا تعطوني مثاليات انا ما اقدر اسويها راعو النفسيه الي انا امر فيها


والف شكر لكل من ردت