التجمع السابع لامهات مايو ويونيو 2018💙💖

رائعه وناعمه

يالله الحين راح انزل لكم كيفية التفريز
من بعد المغرب وانا اكتبها لكم لعيونكم بالملاحظات 😍😍

واي استفسار انا حاضره🙂

بالنسبه للفرزنه برمضان ابدا قبل الشهر الكريم ب اسبوع وهذا الاسبوع يكون للفرزنه
و البيت وتنظيفه نظافه عميقه ومجهزه درج خاص لأواني رمضان
اكون منتهيه منه قبل يوم ٢٢ شعبان
والصراحه ارتاح اول م يدخل الشهر الكريم
حتى البيت م فيه ريحة بصل وكشنه
اولا :اخذ كرتون كبييير طماطم
وخيشه كبيره بصل
افرم البصل بالفرامه مولينكس
واحطه بالزيت واحمسه في قدر كبيير
وانظف الطماطم واقطعها قطع صغار ثم افرمها بالفرامه
واحطها على البصل اذا صار لونه ذهبي
المهم اخليه يطبخ ربع ساعه ل٢٠ دقيقه
طبعا م احط عليه ملح ولا بهارات بس طماطم وبصل
واخليه يبرد واوزعه بعلب بلاستيك صغيره تكفي ثلاث ايام وقبل رمضان بيوم انزل علبه وحده بالثلاجه والباقي بالفريزر او اكياس صغيره اللي بسحاب
طبعا الكشنه هذا لأي طبخه للشوربات والادامات البيتزا
المكرونه واذا اخذتي منها اضيفي لها الملح والبهارات ومعجون الطماطم اذا تبين اللون الاحمر
ثانيا: اشتري كم علبه شوفان للشوربه احيانا اخذ ٤ علب او ٥ انا يجي عندي فطورات واكثر بالاغراض قبل رمضان اطحنها طحن كامل لتوفير الوقت
واحطها بعلبه كبييره حافظة بلاستييك الشوربه عندنا لازم نطحن الشوفان حتى تجي ناعمه
ثالثا: اشتري كميه كبيييره من البقدونس والشبث والكزبره وانظفها من الاتربه واقطع السيقان
ثم افرم كل نوع لحاله واشتريت قوالب ثلج
واوزعها بالقوالب مربعات صغيره وبالفريزر واذا تجمدت احط كل نوع بعلبه بلاستيك او اكيس حافظه وبالفريزر
رابعا: اخذ كم كيلو لحمه مفروم وانا اختارها من عند الملحمه ويفرمها قدام عييني واطبخه لحاله بماء واحط عليه كزبره ناشفه شوية كمون وشوية ملح
واذا استوت شبه استواء اكون مقطعه بصل وجزر مفروم بزيت واكشنه واحط بهارات حاره وملح واضيفي له اللحم المفروم واخليها تطبخ شوي بعدها اضيف لها الكزبره والبقدونس والشبث
واكون مشتريه رقاق بالكرتون رائع اتوقع مصنعه بالقصيم اسمه النغيمشي قريب اسمه من كذا🤔
المهم ابدا احشيها انا وبناتي ونوزعها بصحن كبيير وبالفريزر نصف ساعه اذا تجمدت ونجمعها بأكياس بلاستيك نحط بكل كيس ٢٥ حبه
ونصلح ل١٥ يوم قدام
واللحم المفروم الباقي اوزعه ب اكياس اخليه للحشوات
خامسا: الشيره وهي تستخدم
للقيمات خلية النحل لفايف القرفه
اجهز جك ابو لترين منها
اطبخها لمدة ربع ساعه سكر وماء واحيانا ضيف لها شوية زعفران اصلي وقطرات ليمون
واحطها بعلبه زجاجيه واحفظها بالثلاجه مو الفريزر
سادسا : افرم جزر وثوم كل نوع لحاله احتاجهها احيان في الطبخات
سابعا: نشتري لحمة غنم واوزعها ب ااكياس بعد م اقطعها قطع صغار للشوربه واحيانا اخلي مجموعه مو مقطعه لكبسات السحور
هذه اهم الاشياء عندي
اول م اصحى الظهر اطلع السمبوسه من الفريزر واخليها قريبه من الفرن
واطلع اللحمه واحطه بمويه بارده
وبعد العصر ابدا الطبخ
وبسرعه اخلص بدري
وغالبا فطورنا
تمر قشطه قهوه وجك عصير وليقمات
بعد المغرب
شوربه وخبزة فرن مخموره بلبن
سمبوسه نوع واحد من الفطائر ومهلبيه يوم بيضاء بالنشاء والمكسرات ويوم صفراء بالكاسترد فقط ونعمه ولله الحمد
ان شاءالله اعجبكم موضوع الفرزنه
كنت من اشد المعارضات له احب الطازه
وبعد م جربته وجربت الوقت وكيف يفضى واتفضى للعبادة وقراءة القران عرفت اني كنت مفرطه فيه وضيعت كم سنه بالتعب في رمضان وهو اصلا شهر تخفيف من الاكل والاعباء
لكن مع العيال والبنات لازم نطبخ لو علي انا وزوجي ناكل اية شي متوفر لكن طلبات البزوره
تجبرني اغير النظام واتفنن لهم بالطبخ
اهم شي م اكبه ولايزيد عن حاجتنا
ولازم احسب لجاراتي معاي 😍😍
يومين كذا وارسل لهم طبق مشكل
وهم يردون بالمثل
الله يبلغنا واياكم صيام رمضان وقيامه
اشعر بسعاده عند ذكر رمضاااااان 😍💕😭

١٦ ذو الحجه

الله يسعدك و يكتب احرك و منك نستفيد