السلام عليكم 😊
بسألكم عن موضوع تقدرون تعتبرونه نقاش لانه هالشي احسه صار موجود بكثرة الفترة ولاحظته كثير بالمنتدى وخاصة قسم الحمل
اللي هو انك تخبين حملك عن الناس وبالذات اهل الزوج
استغرب جرأة بعض الحريم في الكذب بهذا الموضوع
لما تكون حامل والناس يسألون تقول لا كذب وتطلع اي عذر
طيب ليش كذا ؟ بالنهاية راح تبان كذبتك كيف تواجهين الناس؟
بصراحة مجتمعنا مالاحظت هالشي بس اشوفه بالدوام
وصار لي موقف مع وحدة من البنات ماشاء الله هي نظامها كل سنة حامل وشفتها بعد فترة وشفت كرشتها قلت (ماشاء الله) الله يتمم عليك.. تدرون وش ردت ؟ قالت لا تو ماكله ومعي قولون وانتفخت بطني 😑
اطالع فيها اقول يمكن تمزح يعني مو لهدرجة الاستحقار لنا عيون نشوف والمشكلة وكانت نهاية السادس !!
لما شفتها كذا سكت وماناقشتها
هذا من غير مواضيع البنات بالمنتدى اللي يوصون فيها بعض لاتعلمين او اللي تسأل تقول علمتي اهل زوجك او لا؟
واللي تقول البس واسع عشان محد يعرف
طيب ليه كذا؟
انتي حامل بالحلال وحملك نعمة من ربي ليه تخبينها؟
وكلهم نظرتهم للموضوع وحده خايفين من العين !!
ترا كل الكائنات الحية تتكاثر مو شي غريب !
خلاصة الموضوع انا مااقول لك من تحملين روحي علمي الناس ذا شي راجع لك لكن سالفة تعمد انك تخبين الحمل هذا غباء بصراحة
لان الحمل والعرس كلهم مايتخبون
بالنسبة لي اول ماحلل اقول لاهلي وزوجي يقول لامه بعد
اما غيرهم اللي يسألني بقوله حتى اللي يسألون عن جنس البيبي بعد اعلمهم لانه بالنهاية يابنت ياولد مو مخلوق ثالث الا اذا توأم😊
وبس سلامتكم وياليت اللي من النوع اللي تخبي حملها تقول لنا وش السبب يمكن مانعرف !
تذكرت شي مهم
دايم اشوف المتأخرات بالحمل او عندهم مشاكل بالحمل الطبيعي يتحسسون من المواقف هذي حبيت اقولهم ترا هالمواقف تصير مع الكل سواء عندك اطفال او ماعندك مدري هو مرض ولا عدوى الله لايبلانا ..
الموضوع مغلق