احاحتاج النصيحه

السلام عليكم يابنات ..
اخذت معرف صديقتي عشان اشاور ناس حياديين مالهم علاقه بالموضوع عل وعسى يكون الجديد على يدينكم
انا منهاره نفسياً مقهوره متحسفه ع عمري والسبب زوجي وعمي تزوجت قبل ٨سنوات وقبل الزواج كان عندنا معهد صغير تعليم كمبيوتر وانجليزي فتحوه لنا اهلي بناء ع رغبه اختي قبل ماتتزوج وتزوجت هي وقل الاقبال على هالمعاهد وحاولت اشوف له احد يشتريه المهم من هنا تعرفت على اهل زوجي كانو من ضمن اللي جو يشوفون بعض الاشياء عشان يشترونه ويبون الرخصه ومن هالكلام المهم زوجي من عائله مرتاحه مادياً كثير وواصلين بالواسطات وهالسوالف المهم تقدم لي وانبسطت كثير لان شفتهم وارتحت لهم وسمعتهم كويسه والولد وسيم يعني بصراحه ماينرد وماندمت ابد ابد الولد خلوق ومايقصر معي ويحبني كثير ف وافقت عمي اخو ابوي عنده شغل بالمينا وكان زوجي دايم يساعده ويكلم له ناس يمشون معاملاته عمي هذا طيب ولكنه اذا عصب ياساااتر يسوي اللي مايستوي وهنا مربط الفرس السنه اللي طافت نفس هالوقت عمي كلم زوجي عن شغله واتذكر انه قالي عمك متهور هالمره مدري ليه وانا بطبعي مااحب ادخل بالتفاصيل ف ماركزت ..زوجي لما كلم ناس يساعدون عمي بالمينا تفتحت العيون عليه وانسحبت البضاعه وتوهق زوجي وكلم عمي مع ان مابينهم ميانه وقاله ترى الوضع كذا وكذا عمي عصصصصب وزعل وقفل وبعدها باسبوع زوجي كان معزوم بمخيم بالبر الا عمي يتصل علي اهلي بالشرقيه وزوجي بالرياض بس اخواته ٢بالشرقيه قالي بمرك وتجهزي صاير ظرف عندنا وابيك تجين وانا هنا متت من الخوف وانصلت بزوجي قالي متاكده قلت اي قال لاتروحين انا بجي اوديك قلت لااااا مااقدر اصبر تجي انا خفت وصدقت قال بكيفك رحت مع عمي وداني لاهلي قال مافينا شي بس زوجك نذل وخسرني مبلغ اكثر من مليون والله لااردها له واذا جا ولاسمعت انه بالشرقيه والله انه اخر يوم بحياته انا وجهي 😱 المهم مالكم بالطويله احداث كثيره بين مكالمات وعتاب ولوم وزعل بيني وبين زوجي انا كنت شايفه عمي معصب وخايفه ع زوجي منه وكنت اوفض يجي وهو كان يجي عند اخته ويقولي طيب انتي تعالي وماكنت اروح وكان يقولي تعالي طيب باي مكان وكنت خايفه من عمي لانه عصبي واعرفه ماراح يأذي بس بيفشلني قدامه بيسبه وبيهدده كذا يعني
المهم يابنات احس دخل الشيطان بيني وبينه وتحول الخلاف من بينه وبين عمي صار شي شخصي لي انا وهو لمن طلب يشوف عياله عندي بنت وولد طلبهم بطريقه تزعل وبعدها ماعاد صار بيني وبينه كلام قبل ٣ايام اخته ولدت وعلاقتي فيهم ممتازه رحت ازورها وليتني مارحت شفته وانا من زمان عنه وبصراحه ماتذكرت الا كل شي زين ياااربي يوم دخلت قالو له اطلع فيه حريم يوم شافني قال تطلعوني عشان زوجتي تدخل وين تصير هذي وقال هلا هلا ومرحبا وفيه ابتسامه اااةةة منكسره زعلانه انقهرت انقهرت يابنات حسيت اني فرطت فيه وقعدت سنه بخلافات وهميه البارح باليل اخته اتصلت وقالت الظاهر ان اللقاء عمل عمايله وتعالي بيتي تحت امركم تعالي تقهوي عندي هو بيكون موجود وانا هنا حسيت ليه هو مااتصل ليه ماكلم احد من اهلي طبعاً اهلي دورهم ضعيف بس بيساعدون
(نبذه سريعه عن اهلي ابوي ببدايه المشكله كان مشغول وعنده سفر متقطع وبعدها بأربع شهور خلص اشغاله واستقر بس قد الموضوع متحول من زعل بين عمي وزوجي الى بيني وبينه وامي وحاولت كثير حتى زوج اختي بس مدري المواقف يطول شرحها ودايم الشيطان يدخل فيها )
المهم احس اصعب شي كتابه الموضوع بعض الاشياء طولت بشرحها وبعضها اختصرت دلوني شسوي اروح لاخته ولا لا انتظره يجي احسه ماراح يجي بصراحه يوم شفته حسيت اني مشتاقه له كثير وهو بعد والدليل انه تحرك من بعد ٦شهور من الانقطاع لانه او ست شهور كان دايم يحاول ويتصل وبعدين هجد لاتبخلون علي بالنصيحه اروح وش اقول لان اهلي امي واختي ومرت اخوي انقسمو ناس قالو روحي وناس قالو انتبهي تروحين يبيك يجيك طبعاً بس علمت الحريم ابوي واخواني ماقلت لهم