الحمدلله على سلامتها ياقلبي عليها
انا بنتي كانت تمهيدي عمرها خمس سنوات كان السواق يرجعها البيت الساعه ١٢ حكم وهي تدق الباب وذاك اليوم انشغلت بولدي اعطيه اكله مااعرف كيف جت عيني على الساعه الا الساعه ١٢ وربع الظهر واتصل على السواق اقوله فينك ليه ماجبت البنت قال انا جبتها خلاص الساعه ١٢ قلت كيف؟؟ ماجت قال الا وصلتها وجا ببالي انها راحت لجدتها واروح ادق على ام زوجي قالت ماشفتها وادق على سلايفي وحده وحده قالو ماشفناها والبس عباتي وانزل الشارع شويا الا سلايفي ورايا لبسو عباياتهم ونزلو وكل وحده اتصلت على زوجها تعال بنت اخوك ضايعه🤦🏼♀️
وحده من سلايفي تصيح باعلى صوتها في الشارع تنادي بنتي وتدق على الجيران وانا الف الحي زي المجنونه فين اختفت البنت والسواق جا يدور معانا جلسنا ندور عليها ساعه واخرتها لما يئست اتصلت على زوجي قلت البنت انخطفت ضاعت مو لايقتها وبنتي عمرررررها ماعتبت برا البيت ولاتعرف احد
وجا زوجي من عمله ويلف بالسياره هو من جهه واخوانه من جهه وسلايفي من جهه وانا رجلي ماعاد تشيلني وامشي للشارع العام واشوف سلفتي الثانيه جايه وفي يدها بنتي ماادري كيف جا في بال سلفتي ان بنتي ممكن تكون راحت مدرسة اختها لانها بجنب البيت وراحت بنفسها للمدرسه تسال المعلمات ماشفتو بنت لابسه لبس روضه قالو الا شوفيها في غرفة المعلمات تاكل شكولاته🤦🏼♀️
بعد ماالحي كلللله ذاك اليوم سوو استنفار يدورو عليها
واخرتها عرفت ان السواق حطها عند الباب وراح وباب العماره كان مقفول وماقدرت تلحق الجرس بعيد عليها قالت خلاص بروح مدرسة اختي اقعد عندها لين تنصرف وارجع معاها البيت
بنتي الان صار عمرها ١١ سنه بس دايما احس الموقف صار امس
اصعب موقف مر عليكي
متابعة النقاش، صفحة 4