بفضفض لكم عن همي ادعولي

السلام عليكم بنات
بدخل بالموضوع على طول انا عارفة ان مشكلتي مالها حل بس حبيت افضفض نفسيتي مره تعبانه
انا ربي ابتلاني قبل كم سنه بخلايا على عنق الرحم سرطانيه وتعبت من المرض وعانيت وشلتها ورجعت لي مره ثانيه وعانيت معانه وشلتها
وبعد ماشلتها صحتي الحمدلله بس لازم سنوياً اشيك على نفسي
سنوياً لازم ياخذون مني عينه من عنق الرحم ويسوون لها زراعة والزراعة تجلس اسبوع بعدين تطلع النتيجة
النتيجة يا اما يقولون الحمدلله مافي شي او يقولون رجع لك المرض
ونفسيتي قبل اخذ العينه تكون صفر خوف وقلق لحد ماتطلع النتيجة واتطمن
بكره بإذن الله عندي موعد اخذ عينه
ونفسيتي تعبانه
جا زوجي وانا جالسه في سجادتي بعد صلاة العشاء واناجي ربي وابكي
قال وش فيك
قلت احاتي بكره اذا اخذوا مني العينه وادعي ربي ان المرض مايرجع لي
قال لي بكل سخرية وتريقة ياربي الله يعيينني بجلس اسبوع احاتيك واحاتي نتيجتك وشلون باكل وشلون بنام
يتمسخر فيني قلت حرام عليك لاتشمت فيني هذا مرض من ربي بلاني فيه لاتشمت وربي يبلاك
قال لا لا انا صادق خايف عليك وهو يضحك
انقهرت على عمري بدل مايقول لي كلمه طيبة تجبر خاطري يتمسخر علي ويضحك ويتريق
بعدها قال انتي فيك وانتي فيك جلس يقول لي مشاكل بيننا قديمه جداً قبل كم سنه
قلت له وش فيك انت هذا وقته وش جاب طاري السوالف القديمة هذي
وشلون تبيني اصدق انك خايف علي وانت تقول الكلام هذا
قال ومن قال لك اني صادق اني خايف عليك اقسم لك بالله العظيم انك لو تموتين ماطاحت من عيني دمعه عليك ولاهزيتي فيني شعره والله ان الدمعه ماراح تنزل عليك
يالله يابنات حزت في خاطري حيييييل
حسيت زي الخنجر انغرس في صدري للدرجة هذي
انا عارفة انه مايحبني وانه راعي مغازل وكل مشاكلنا بسبب مغازلاته بس ليه كذا
على الاقل احترم العشره اللي بيننا والعيال اللي بيننا
انا ام عيالك
مجرد فضفضة لا اكثر لاني جالسه لحالي وابكي ما ابي ابكي قدامه لايحرق قلبي بكلام ثاني اللي مايخاف من الله
حسبي الله ونعم الوكيل حسبي الله ونعم الوكيل
دعواتكم حبيباتي