التجمع 14 لأمهات سبتمبر & أكتوبر 2018👸🤴

السلام عليكم ورحمة الله


اعتذر على قلة دخولي الفتره الماضيه بس للان تعبانه لاسافرت ولارحت اي مكان ونفسيتي دمار للان احس بتعب اذا مشيت او اجهدت نفسي ينزل افراز دموي وطلعت نتايج الفحص جنيني طلع مريض واحتمال مايعيش وانا وكلت امري لله اللهم لااعتراض على قدرك والحمد لله على كل حال
بنات دعواتكم

انا ودي احول ملفي الى مستشفى الملك فيصل التخصصي واتابع عند دكتوره للحمل عالي الخطوره ماني مرتاحه للجامعي ابدا اقولها عندي ضيق بالتنفس ووجهي شاحب واحس بدوخه ابي اشيك على الدم قالت لا مو لازم تحليل دمك اللي سويتيه اول الحمل كان كويس شوفو كيف طنشت كل الاعراض ولااهتمت والمشكله مافي بالجامعي الا هي دكتوره مختصه بالحمل عالي الخطوره وبمشاكل الاجنه وانا مرره ماارتحت لها وماابي اكمل معها ولاابيها تولدني حتى وقت فحص الالترا ساوند تدخل علي طلبه رجال بدون ماتستاذن يسالها عادي ادخل قالت له ادخل طيب والمريضه هل سمحت لك يمكن مو عادي عندها !! قلة ذوق اجل بتسوي نفس الشي وقت الولاده وتخليني فرجه للطلبه لان وضعي عالي الخطوره يتدربون علي ماابيها الله لايبارك بالعدو
بسالكم هنا لاحظت فيه وحده الظاهر فلفل حار تتابع بالتخصصي لان جملها عالي الخطوره ، انا كيف اروح اتابع عندهم ووش هي اجراءات التحويل وش المطلوب ومن احسن دكتوره؟، بحاول اقنع زوجي بالطيب بالغصب ماابي هالمستشفى

كان الله في عونك وثبت حملك
ان شاء الله تشوفين البيبي بين يدينك بصحه وسلامه وانتي طيبه
غيري المستشفى دام كذا تعاملها اذا هذا اولها ينعرف تاليها
والله ماعندي علم كيف طريقة تحويل الملف لكن افتكر اختي اول ما اكتشفنا معاها ورم الله يشفيها قريت ان الطريقه تاخذين تقرير من قسم التقارير الطبيه بالمستشفى اللي تراجعين فيه وتروحين تقدمين في استقبال الملفات اعتقد وهم يدرسون الحاله ويقررون يستقبلونك او لا
ما ادري اذا الطريقه اللي وصفتها لك صحيحه او لا لكن حبيت افيدك باللي اعرفه
ما راح انساك من دعواتي 💜

من حقك ترفضين دخولهم بس لانك ساكته يعتقدون انك مبلغه الدكتوره بموافقتك
انا من رايي تكملين مع الدكتوره وتبلغينها برفضك دخول اي طالب او طالبه وهذا ابسط حقوقك
والله ييسر امرك دام توكلتي على ربك فالله بيرضيك ويسهل امرك

شمس
اطلبي من الله الخيره دايم والحي بالدعاء
وتأكدي ان كل شي يتعوض وانك بفترة متحان يختبر فيها الله صبرك وايمانك خليك قد الاختبار انتي الكسبانه اخر شي
وانا والبنات بندعي لك بظهر الغيب
وطمنينا عليك كل فتره