شي ماراح تصدقونه

عزيزتي مره الدب المملوح
انا ماابغى احد يؤيدني
ابغى احد يحس فيني
وربي شي يشيب له الراس اختي من امي وابوي ماتعطيني بطاقتين والسبب ماتبغني انبسط
والله والله والله هذا واقع وصايروالله مبالغت فيه

لاميته ياقلبي انا ماطلبت مايه بس ثنتين وتقدر وانا واثقه..

مادري أختي أحسك من ردودك صغيرة
ترى الأخوات لين صاروا كبار يشوفون أخواتهم اللي أصغر منهم كأنهم أطفال
وما يعطونهم وجه ... هذا شي طبيعي (في البعض)
انتي لا تنظرين لها إنها يوم ما عطتك البطاقات لأنها ما تبغيك تستانسين
بس يمكن هي تشوف ما لك معنى تعزمين غريبات
فيه ناس يتحسسون من هالشي ... ما يحبون أي أحد يحضر العرس إلا الأهل والقرايب
غير إنها مثل ما قلت يمكن تعتبرك كأنك بزر ... يعني طلبك البطاقات بالنسبة لها ما أخذ ذاك الأهمية
وأكيد هي غلطانة ... بس إيش تسوّين..

ولا تخلين القطيعة تجي من صوبك
ترى إذا ما حضرتي العرس راح يمسكوها عليك لسنين قدام
انتي حضري بس عشان ما تكونين انتي المتسببة

وإذا اختك ما تستاهل تروحين عشانها

لا تروحين عشانها

روحي لله

ومش لازم تكونين مبسوطة
هي كلها سويعات قليلة
وانتي مجهزة الفستان وكل شي

ادعي ربك
وقولي ... يا رب إنت أعلم بحالي
وأنا ما رحت إلا طلباً لرضاك
فتقبل منّي ويسر أمري
وليّن قلوبهم لي

ويمكن هذا العمل اللي تعمليه مخلصة لله يكون سبب لتيسير امور كثيرة في حياتك

طيب انا عندي لك حل
واتوقع بيعجبك مررررررة
إنتي صدق لا تروحين بس لاتروحين لبيتهم إذا سوو عزايم قبل الزواج او بعده
عشان كرامتك على قولك
لكن الزواج ضروري تروحينه
لاتفرحين الشامتين فيكم
تراكم اهل

بقولك موقف توه صاير بعايلتنا
خوات من أب صار بينهم مشاكل اسبابها والله والله تاااااااافهه بس كبرت بينهم
جا زواج اخ من الزوجه الثانيه في عز هالمشاكل
واخت هالاخ من امه وابوه هي الي توزع البطاقات
قامت نقت بعض خواتها والباقين لا
ولا عزمت زوجة ابوها
مع انهم ترا كانوا حبايب من قبل هالسالفه
بس ذي نجسه مررررة
المهم
البنات من الزوجه الاولى عيو يروحون الزواج قالوا ماعزمت امنا محنا رايحين
وحده منهم كبيرة وبناتها متزوجات
غصبها زوجها تروح
حاولت فيه انه يغير رايه بس رفض
يقول عشان الناس
ولأنهم اصلا قرايب يعني زوجها يصير ولد عمها
و كل الي في الزواج اهل وقرايب


في الأخير راحت هي وبناتها ورقصوا واستقبلوا الناس وجاملوا إلى أبعد حد
ولا من داخلهم يغلون غلي ان امهم ماجات
وماتتخيلين التقديــــــــــــــــــــر الي لقته من الناس ومن اخوانها من ابوها( إلا اختهم النجسه ماتقدر احد )
كلن يناديها يحب راسها
وللحين كلن حافظها لها
وتحسين هالآدمية كل شي ميسر لها الله يزيدها


يابنتي تراك الحين معصبه
لاهديتي فكري شوي
انا يوم زواج اختي مابقت بطاقات لصديقاتي ولاعزمتهم
صدق تفشلت لكن وش اسوي طيب
الزواج مو زواجي عشان اشيل هم هالصديقات
ومرة وحده من اعز اعز صديقاتي ماعزمتني على زواج اخوها
مااقولك مازعلت
إلا والله زعلت لكن كلمتني واعتذرت بالبطاقات
قالت وربي مابقا منها شي
وعذرتها يوم تعذرتلي
يعني نفس الي صارلك يصير لكثير
بس انتي اخذتيها بحساسية كبيرة يمكن عشان مواقف سابقه
وإذا على صديقاتك اعتذرليهم اذا مستحيه منهم وإذا هم صديقات صدق بيقدرون وضعك
بعدين حبيبتي روحي بدونهم عشان تحمسينهم وترجعين تقولين لهم وش صار


والله ثم والله ان لو تروحين بعد كل هالهم الي انتي فيه ان تنبسطين وتقولين قالته عذبه
دااااايم أنا لا شلت هم روحه ورحت غصبن عن خشمي ان تصير مافيه احلا منها
روحي يابنت الحلال ووسعي صدرك
الكرامه محفوظه
والحلف له كفاره
والفستان موجود
والكوافيره محجوزة

بقا ان نفسك تهدى وتتعوذين من الشيطان
وهي تراهي مسأله بسيطه حلها معروف
تحظرين = تساعدين في حل هالمشاكل وتدحرين الشيطان
ماتحظرين= ماراح ترتاحين ذيك اليله ولا راحت امك وخواتك بتنقهرين وهالكرامه الي تقولينه بتنقلب حسره وبيزيد الحقد في قلوب البعض بسبب تصرفك
ومحد بيقول والله فلانه بطله نفذت حلفها وقدرت تكسر خشومهم
وحتى انتي في نفسك منتي مرتاحه

ولاحظي شي ياقلبي
ترا ولا وحده هنا عذرتك
وتأكدي محد من برا بيعذرك وبيقول معها حق
لو ماعزمتك كان يمكن نقول الحق معاك
بس الي تقولينه مو عذر يستاهل هذا كله


إدعي الله ان ييسرلك الي فيه خيره
ماتدرين يمكن تكون روحتك خيرة لك وييسرلك الله عريس من هالزواج :)



تحياتي لك

الله يهدي الجيمع..