تجمع رابطات الحوامل (٣٨)

انا بعد بالحبيب القصيم
وتكالفيها كامله مع العلاج حوالي ست الاف ريال

اهلين حبيبتي
تقريباً عديتي المرحله الاصعب وهي الاسبوعين الاولى
الحين تقدرين تتحركين ع الخفيف بس طبعاً بدون سفر واي مشوار مايتعدى ساعه بالكثير ومره بالاسبوع بس
وانتبهي من المشي الكثير والوقفه الكثيره واذا حسيتي باي اجهاد ارتاحي وانسدحي على طول والجماع ممنوع طوال فترة الربط 🚫
بس طبعاً ماراح تقدرين تمارسين حياتك طبيعيه لازم تكونين حذره بكل شي ومريحه نفسك ع الاخر
وكمان استشيري دكتورتك بكل شي هي بتكون اعلم بوضعك واسأليها عن كل شي بس انا ذكرت لك تجربتي وكيف تكون حياتي مع الربط

بنات ابغى رايكم وخبرتكم في موضوعي
انا حملي الأول اجهضته بنص الرابع طبعاً كنت من الشهر الثاني يجيني نزيف شديد لمدة يوم وأروح للدكتوره كانت تكشف بالسونار وتقولي كل شيء طبيعي ورافضه تعطيني مثبتات وحتى ماوصتني بالراحه كنت عايشه حياتي طبيعي وبيتي درج دور ثالث وطالعه ونازله .. المهم بالثالث جاني نزيف رجعتلها قالتلي نفس الكلام كل شيء طبيعي بس بعطيك مثبتات تحاميل لمدة اسبوعين ووقفيها استخدمت التحاميل وبعد اسبوعين وقفتها ووصلت نص الرابع ورجع النزيف رحت مستسفى حكومي وللأسف جلست اربع ساعات بالانتظار مادخلت فاضطريت اروح لعياده ودكتوره ثانيه ممتازه كشفت علي قالت النبض موجود والمشيمه مكانها بس المويه ناقصه كثير كتبتلي ابر وتحاميل وللأسف يومين مع النزيف اجهضت جنيني بالبيت الله يعوضني ، رحت لدكاتره كل واحد يعطي احتمالات غير ، وسويت كل التحاليل سليمه ولله الحمد .. تتوقعون سبب اجهاضي هو الاهمال انزف من الشهر الثاني وماخذت مثبتات ولا ارتحت ؟؟ انا الحمدلله حاليا حامل ونصحني استشاري بالربط وسويته من اسبوعين والله يتمم لي ولكم ع خير بس موضوع اجهاضي السابق مقلقني ومتعبني نفسياً وماحصلت عند الدكاتره اجابه تريحني!!

مشكوره ام حسام على النصايح
وقاعده ارتاح قد مااقدر
بس الدكتوره قالت لي اقدر اروح الدوام من الاسبوع الجاي وهذي اللي مسويلي قلق وانا لان من حملت في اجازه ٣ شهور الحين مظطره ارجع الدوام ودوامي على الكرسي وكمبيوتر 💔💔

انتي مثلي بالضبط صارلي اجهاض في بدايه الخامس وكنت اخذ مثبتات ويوم اجهضت محد عرف السبب لين رحت لدكتوره شاطرة قالت لي سبب الاجهاض قصر واتخاء في عنق الرحم والحمدلله الحين حامل في الرابع وسويت عمليه الربط من ٣ اسابيع وخايفه واوسوس مثلج ،،
اعتقد اللي صار لج ان عندج ارتخاء في عنق الرحم بس زين انج ربطتي الحمدلله يارب يثبت حملج وتقر عينج بشوفة طفلج امين ياااارب