أطفال الأنابيب............

اهلين ياختي
انا من راي انه عادي تسوين اللي تبين طالما ماهو حرام وانا مثلك بعد اتمنى التؤم ويارب يرزقني ويرزقك بس انصحك اول سوي تلقيح صناعي طالما مافيك شي سويه عند الدكتور بندر العبدالكريم شاطر كثير بالحبيب بالرياض عندك
وخليه يعطيك اول ابر منشطه علشان تطلع اكثر من بويضه بعدين يحقن وان شاءالله تنجح

مشكوره اختي ع ردك وعلى كمية التفائل الموجوده في كلامك وعسى ربي يرزقنا بالتوأم السليم المعافى
ويحقق لنا ومن يتمنى هذا الشي

بس بصراحه خفت من ردود العضوات البقيه

لانو انا ما اعرف طريقة الانابيب وشلون تكون

باعتبار القراءه والتصفح يكون غير من المجرب

ونسال الله الذريه الصالحه ويرزق كل من تمنى الذريه

.. 🌸😊

الله يحفظلك ولدك ويعوضك خير 😊🌺

ونعم بالله وانا ماعندي اعتراض على رزق رب العالمين

لكن كل ام اكيد تتمنى الشي والله يرزقنا ويرزق كل

محرووم ..🌺😊

شوفي بقولك الانابيب كيف تكون بكل واقعية
قبل ما تبين تسوينها حتى لو سليمة ومافيك شي تزورين الدكتورة وتصرف لك فيتامينات لمدة شهر او شهرين وتسوي لك تحاليل وتشوف وش تستخدم معاك برنامج طويل او قصير هي تحدد مو انتي لانه بناء على العمر ومخزون المبيض لو كان طويل بتبدين من اليوم ٢١ من الدورة السابقة لدورة العملية تضربين ابرة زيتية يوميا تحت الجلد بنفس الوقت وهالابرة تكون مثل المنبة لجسمك تخلي هرموناتك كلها صفر لمدة عشر ثواني وترجع هرموناتك طبيعية وانتي مستمرة على ادوية معطيك الدكتور حبوب و محلول شراب لما تنزل دورتك تروحين اليوم الثاني يسوون سونار مهبلي والدورة فيك ويصرفون لك ابر منشطة مع الابر الزيتية كلهم تستمرين عليهم وهالابر كلهم ضروري عالوقت والا جدا تأثر على استجابتك باليوم العاشر من دورتك يسوون سونار يشوفون استجابتك استجبتي للعلاج وطلعتي بويضات كملو ما حصل هالشي او بويضاتك صغيرة يلغونها وتعيدين هالخطوات من جديد باليوم ال ١٢ تضربين ابرة اسمها ابرة تفجيرية بوقت هم يحددونه يتوافق مع وقت عمليتك بعد يومين
بليلة اليوم ١٤ تصومين عن الاكل والشرب استعداد للعملية صباح يوم ١٤ تروحين للمستشفى يحطون فيك قسطرة المغذي باليد مؤلم ومزعجة وتنتظرين دورك بعد ساعة ساعتين على حسب المريضات قبلك بعدها تدخلين لغرفة العملية يجي دكتور البنج يعطيك البنج وتروحين بنومه عميقة تصحين على الم بالمهبل مره غريب مزعج بسبب بوز البطة مثل الم القالب اللي يحطونه بفم الوحده دكاترة الاسنان ولما يطولون ويشيلونه منك تحسين المكان مبنج هو كذا بالضبط بس اشد لان العملية تقريبا ٤٠ دقيقة وينزل منك دم بعض الحريم حسو بألم قوي بعدها وبعضهم الم محتمل مع المسكنات الوضع يمشي بعدها يقولون لك راقبي نفسك اي عرض غريب ارجعي عشان يخافون من فرط التنشيط لانه لو كان بكمية كبيرة يسبب وفاة وعالاقل يدخل الوحده العناية المركزة وعمليات وتحت رحمة ربي تنتظرين بعد ٤ ايام من العملية اتصال المركز يعلمونك هل تلقحو او لا وكم عددهم بعضهم تطلع ٢١ بويضة ومايتلقح الا ٦ وبعضهم تطلع ٩ ويتلقح بس ٣ لان البويضات بعضها فاضية وبعضها فيها خلل فماهو كلها تتلقح ويبلغونك الجنين درجته كم الافضل هو الاولى لان نسب الحمل فيه اعلى بس مو اكيد ممكن ترجعين ٣ اجنة درجة اولى ولا واحد يثبت هذا رزق من الله ويعلمونك هو بأي يوم ٣ او ٥ جنين اليوم الخامس نسبة الحمل فيه اعلى بس اكثرية الاجنة تموت قبل ماتوصل هاليوم
وبعدها يقولون لك تعالي نرجع لك الجنين لازم تجينهم وانتي متعبية موية وتدخلين غرفة العمليات ويحطون لك بوز البطه وبعدها يدخلون قسطرة طووويل ممكن ١٠ سم ويحطون فيها الاجنة ويخلونك منسدحه شوي وبعدها يودونك للغرفة ويحطونك فيها ساعة وتروحين للبيت محملة بادويتك منها ابر سيولة وبعضهم ياخذ ابر مثبتة وتضربينها يوميا مع ادوية ممكن ٦ انواع مع مثبتات لازم بنفس الوقت كل ١٢ ساعة وممنوع الجماع والحركة والكحة والعطورات والمنظفات وتبتعدين عن الضغوط النفسية والعصبية واكلك معين مو اي شي تأكلينه وتنتظرين ١٤ يوم من الترجيع وتروحين تحللين دم وهم يقولون لك حامل او لا
والبرنامج القصير مثله بس يبدأ بثاني يوم من الدورة
نسبة نجاحها لو الزوجين سليمين تمام تتراوح مابين ٢٥- ٣٥ %
ويعتمد على عمرك اذا انتي بالعشرين غير الثلاثين غير الاربعين
وبالنهاية هالعملية فشلها او نجاحها بيد الله
واعرف وحده تنجب طبيعي وجابت ٦ ولما سوت الانابيب عشان تبي ولد سوتها ٩ مرات وكلها فشلت والتؤام رزق من الله لو لك قسمه فيه بتحصلين عليه حتى لو تحملين طبيعي

انا قلت لك واقع هالعملية ماراح احليها بعينك ثم تنصدمين بس لو بيدي امكانية الحمل الطبيعي والله ما اتجه لها ولو حابه تؤام جيبي اثنين ورا بعض احملي بعد نفاسك على طول