محتاره اكون زوجة ثانية او لا؟ ساعدوني

بسم الله والصلاة والسلام على رسول الله


انا مطلقة وعندي عيال خطبني واحد منفصل عن زوجته هي مريضه نفسيا الله يشفيها وعنده منها ولد المهم وافقت عليه مبدئيا وصار بيننا تواصل قبل الملكة عشان نعرف اذا متوافقين او لا
المهم اثناء هالشئ زوجته سمعت انه بيتزوج بس مادرت انه خطب وعلى طول رجعت له وترجته ووعدته انه يتغير بس مايتزرج وهو مابغى يكسر بخاطرها ورجعها ولأنها مريضه مايبي يحس بالذنب تجاهها
وهو مازال يبي يتزوجني لاننا تعلقنا ببعض كثير واتفقنا على كل شي😢 تقدمولي قبله متزوجين ورفضت لاني ضد فكرة الزواج بمتزوج بس الحين الوضع تلخبط بعد مارجعها وصار متزوج بدال مطلق
واحترت وش اسوي هل اكمل معه والا لا؟ لاتنسون انا مطلقه وام عيال وفرص الزواج قليله احترت كثير ومازلت استخير ابيه وميته عليه وبنفس الوقت ماودي اجرح زوجته ولا ودي ادخل بمتاهات الزوجة الثانية 😭😭 وهو ان ماتزوجني بيتزوج غيري
بموت من الهم والحيرة اتمنى يامجربات تشورون علي وبدون تجريح لاهنتم🌹🌹

42 تعليق 11,790 مشاهدة

شاركي في النقاش

سجلي الدخول لإضافة تعليق.

التعليقات

40
  1. @aml_12345_1

    ياعمري استخيري الله ،،
    شوفي فيه نقطة مهمة في الموضوع من منظوري انك على اساسها تحددي الموافقة او الرفض
    س/ هل انتِ متأكدة انها مريضة نفسيا ؟؟
    او مجرد صار بينهم مشكله طلقها وقال اادبها


    اذا هو عارفها مريضة نفسيا وحزين عليها كيف هانت عليه وطلقهاا ؟؟؟


    اول شيء تأكدي من صدقه ،، اسألي ناس من طرف زوجته كيف وضعها
    وعلى هالاساس قرري
    اذا انها طيبة وتبلى عليها احذريه
    بعض الرجال يكذب ويحط بلاوي الدنيا في زوجته وانه هو الطيب الحنون ،، هذا غدار ومثل ما غدر بها بيغدر بك اذا شبع منك رماك


    تأكدي من جديته وصدقه ،، ولا توافقين على زواج سري ومسيار ويكون زواجك معلن وزوجته واهله يعرفون
    وتوكلي على الله ،،، الله يدبر امرك ويختار لك الخير
  2. @aml_myt

    امل 12345
    ياعمري استخيري الله ،، شوفي فيه نقطة مهمة في الموضوع من منظوري انك على اساسها تحددي الموافقة او الرفض س/ هل انتِ متأكدة انها مريضة نفسيا ؟؟ او مجرد صار بينهم مشكله طلقها وقال اادبها اذا هو عارفها مريضة نفسيا وح…
    ترى مو كل الأمراض النفسيه تبين قدام الناس أختي مريضه بثنائي القطب اللي يشوفها يقول البس ياكل عشاها من الهدوء و السمت و هي بيننا الحياه معها ما تحتمل
  3. ذكرتيني بجارنا يبي يتزوج على زوجته
    مالقى الا يكذب عليهم يقول زوجتي بتموت تعبانه وباقي لها كم شهر بس وزوجوه للاسف
    وزوجته طيبه ماعليها خلاف

تابعي تجارب أخرى من هذا القسم.