<<<<تجمع نقص فيتامين دال >>>>>

باقي فيك جرثومه .. ماراحت منك

وعليكم السلام .. اختي انا يصير لك مثلك ومعه عدم توازن واحساس بالاغماء طبعا الحاله جتني فجأه يعني مدري وش سببها كنت في بداية حملي وكنت عند اهلي وعلى طول شالني ابوي وامي عالمسشتفى لاني كنت منسدحه ولما جيت بقوم دارت فيني الدنيييييا وارجع انسدح وجلست انادي اختي تعلم امي ورحت الطواري قالو مانقدر نعطيها شي لانها حامل وعطوني مسكن وطلعوني ولاشفت تحسن صايره كاني في دوامه كاني بالصحن الدوار .. ومن يومها وانا من مستشفى لمستشفى ولاادري وش علتي احس جسمي يرج ويهز يمين وشمال وانا امشي احس الارض تمشي معي وتزحلق وثقل في رجليني ويديني واسفل ظهري رحت لاذن انف حنجره قال يمكن كرستالات الاذن متحركه وسوا لي تمارين في العياده رحت له ثلاث ايام ورا بعض .. ودخلت دكتور عظام وسوا لي اشعه للرقبه قال يمكن من الشد في عضلات الرقبه والاكتاف لانها شاااده مره في الاشعه وعطاني مرخي ودهان ولا استخدمت الحبوب لاني حامل مع انه قال ماتضر استخدمت المرخي فتره وتركته ورحت لدكتور اذن ثاني مدحوه لي الناس قال عندك شمع في الاذن يمكن هو مسبب لك هالشي وشاله بس ماخفيت طبعا انا عندي الجيوب الانفيه حساسيه واحس بثقل في جبهتي وعيوني .. لما ولدت وانا حالتي حاله قالو بتروح لا ولدتي وفعلا راحت الحاله لما صار عمر طفلتي اربع شهور رجعت الحاله صرت اكره اروح بيتي اخاف يجيني شي ومحد عندي نفسيتي تعباااانه مره وصابره عصبيه ومعي كتمه وارتجاع في المرئ وقولون عصبي واحتكاك في الرقبه .. قبل اسبوعين جتني الدوخه وكنت في عزيمه ووداني اخوي المستشفى سوا لي تحاليل شامله قال عندك نقص فيتامين دال 16 يمكن هو السبب .. عاد لما قريت اعراض البنات في التجمع قلت اجل من النقص يمكن .. بس مشكلتي اخاف من العلاجات والشمس تحسس جسمي والنقاط دفعه وحده يقولون تأثر عل الكلى .. معليش كتبت قصه حياتي بس اتمنى وحده ترد علي تريحني او تدعي لي في ظهر الغيب ان الله يشفيني .. زوجي مل مني مره وصار مايصدقني لما اقول تعبانه لدرجه اقول طلقني بجلس عند امي ..

اعرفي أكثر على عالم حواء: دوخة عند المشي وكتمة واحساس بالاغماء

انتي مثلي اتحسس من الشمس ومعدتي تتعب من العلاجات مع ان الدكتور قال كلي حبوب المعده وبعدها بساعه كلي العلاج اللي كاتبه لك بس خفت مااحب كثرة العلاجات عندي فوبيا منها مره

احس جسمي يرج ويهز يمين وشمال وانا امشي احس الارض تمشي معي وتزحلق وثقل في رجليني ويديني واسفل ظهري ...........!ِ
معاناتك هذي نفسي بضبط طبعا كل يوم تجيني هالهزه ولا تجيني سبحان الله الا في ليل اليوم ازمتي منها اشد من كل يوم .. طبعا انا عندي حساسية بالانف الاذن قالي سليمه بس بتقرير فيها مشكله وهقني هالدكتور المشلكه عطاني علاج حق التهاب الاذن الوسطى .. بس انا شاكه انها شحنات كهربائيه وفعلا قالت لي دكتور 80 % انها شحنات حولتني الى دكتور المخ والاعصاب ..
بسالك مع هالهزه يجيك زي تنميل ونغزات بالجسم اختناق بالحلق مع دوخه وشيء يتحرك بجسمك كانه في عروقك شيء يمشي زي تنميل ..

ايه التنميل يجيني كل يوم ورجلي من اصفطها تنمل على طول امدها والاختناق ايه احس شي ناشب بحلقي ونغزات بالصدر والجسم .. وين دكتور المخ والاعصاب اللي رحتي له .. شكلي بروح معي اني مااحب اروح الدكاتره حامت كبدي مره .. واذا عندك حساسيه خشم انتي مثلي بالضبط خشمي حساس لدرجه ايام ينبض اذا شميت ريحة قويه ولما قريت عن حساسيه الجيوب الانفيه تجيب نفس اعراضنا من الدوخه وانك تحسين الارض تمشي تحتك وكانك في موج بحر .. شفت مقطع باليوتيوب يقول سنتين يعاني ولما اكتشف انه من الجيوب الانفيه صار يستنشق عند الوضوء ويبالغ في الاستنشاق يقول اسبوعين استمريت يقول فتحت عيوني ورجعت كاني مولود من جديد ذاك الدوخه وعدم الاتران والترنح كله اختفى