داخلة زواج ولاحرب !!

بالفعل
وانا شفت هالحالة بعيني
واحد من جماعتنا مطلق وعنده ولد وتزوج مرة ثانية
دخلت بحرب طاحنة مع ابنه لدرجة تقولي اختي انها تبكي وترمي نفسها بالارض لا زارهم الولد
والاب يحب ابنه حب شديد مايرضى يسمع فيه حتى لو كان غلطان الاب يوقف معاه
والله تقولي اختي زوجها يقول ان الولد ضرب طالب ونزل الدم من راسه وراح ابوه هذا
المدير والمدرسين والكل يقولو ابنك غلطان وهو يصرررخ ويقولهم ابني صح وماله ذنب
اخر مرة تقوله انت مخلي ابنك هنا وانت عارف ان هذا الشي يكسرني ويزعلني وتقوله بعده عني
وكلمة من هنا وكلمة من هناك قالها انتي طالق بالثلاثة وكرشها بيت اهلها ورجع حرمته وجاب منها عيال
وللحين ماتزوجت البنت هذي
بعض الزوجات الثانيات يدخلون حرب فعلا ويصيرو ظالمين واشرار بحجة الغيرة
يقعدون يحرضون الرجال على زوجته وتوصل فيهم اانهم يقسون على اطفال مالهم ذنب
وبعض الرجال للاسف يسمعون

معك 👍

ماهو بس الزوجات الثانيات بعضهم يحقد ع الاطفال ..
نسيتي سالفة قتل الطفله ريم قتلتها زوجة ابوها الاولى ..
بغض النظر عن الزوجات << الاطفال خط احمر سوا من الاولى ولا العاشره .. ماهو الزوج يتزوج ويستانس وهي يقل عقلها وتحط حرتها بالاطفال

الحمدلله والشكر .. الا يطلعون الحريم خطا والرجل ملاك منزل ..


ارجع وأقول ترا هو الي تركك ببيتك ولا فكر فيك وراح خطب وتزوج وأعلن ولا همه زعلك ولا الي يتشمت فيك .. لذالك خافي ربك وسوالف رجعي زوجك حبيبك لحضنك ودلعيه ولا تتركي فرصه لثانيه تاخذه منك واشغليه بالطلبات 😂

ترا هو الي اخذ الثانيه وجابهااا عندك ..

الرجال لو انه حازم معها ما كان تجرأت ع طبينتها

الاحظ أن البعض في الردود اخذ موقف من الزوجة الثانية وكأنها كانت مخططة على الرجل وتزوجته، ترى هالمسألة قسمممة ونصصصيب والله اني رفضت وضيعت سنوات من عمري أرفض المعدد ما ابي المشاكل لكن القسمة والنصيب مكتوبة للإنسان
واعرف وحدة من المتزوجات مسميات الزوجة الثانية خطافة رجالة وخرابة بيوت وتسب وتقدح إذا فيه وحده أخذت معدد، وعندها شوفة نفس وتسمي اللي ترضى بمعدد ناقصة وعانس ودارت الايام وتوفي زوجها وهي عندها اولاد منه بالآخر كانت تبحث ودور وماعندها مشكلة مع المعددين الين ربي رزقها وأخذت معدد، فالشاهد هذه قسمة وتصيب سواء للأولى ولا الثانية
بالنسبة للظلم ومين يظلم الزوجة الأولى ولا الزوجة الثانية هذا الأمر نسبي يتعمد على ظروف وشخصية ودين كل وحدة فيهن، بالإضافة للزوج لا أغفل عنه يتحمل جزء كبير من المسؤولية.
انا زوجة ثانية ومن اول مادخلت حياته وخطبني شرطت عليه العدل وقلت له يومها لها ويومي لي و الله يسعدها ويهنيها وكنت ابحث عن السلام لكن ما اقول غير الحمدلله لم أجد منها إلا الحرب وشغل المكايد والتنقيص والتركيز على عيوبي وتكبيرها في عين زوجي وأنه خسر بزواجه من العجوز وتمشي مع الناس زوجي تزوج عجوز وعصلاء ورحمها خرباان مايمسك شيء لكن انا بزوجه الثالثة والمناسبات والعزايم بين العائلة موصيته اني ما احضرها وسمع كلامها صارت اي مناسبة عند امه أو إخوانه أو خواته أو عند الجماعة يرفض يخليني اروح لها لأن زوجته رافضة اني احضرها وبعض هالعزايم تصادف في يومي فيروح في يومي ويحضر العشاء معها ومع عيالها حاولت معاه وتعبت وبالاخير استسلمت وبعض الايام والليالي يتعذر انه رايح شغل وهو عندها وهذا غيض من فيض غير اتصالاتها ومكائدها انا انسانه مسالمة جداً ومضى على في حياتي قبل الزواج كثير مشاكل اضعفتني وخلتني اي جدال أو شد يوتر اعصابي وتظل اعصابي مشدودة لأيام حتى النوم ما اقدر انام الا بحبوب فصرت اعرف نفسي وابعد عن أي مشكلة واعرف انه هو وياها هاضمين حقوقي لكن اعصابي ماتتحمل مواجهة وشد وجذب وجدااال.
فالفكرة احيانا تكون الأولى أعصاب حديد وقوية شخصية وهي إلى تدير الحرب مو شرط كل الحروب بسبب الثانية
الله يهدي الأحوال وتفرجها على وعلى كل مسلمة يا حي ياقيوم