مشكلة طولت كثير.. ويمكن يكونون القريبين هم السبب 💔! ساعدوني

سلام عليكم
والله يا بنات ما أعرف من وين ابدأ لكن بحاول أختصر المشكلة، مساعدتكم بتفك عني أزمة كبيرة بعد فرج الله .. وسامحوني لو الكلام ملخبط لأن وصلت حدي 💔
بدأت مشكلتي من وأنا ثاني جامعة لين يومكم هذا توني تخرجت ووصلت عمر ال ٢٢ ولا زلت بنفس الدوامة.. لي ثلاث سنوات شخصيتي مهزوزة أو بالأصح معدومة من بعد ما كنت أجرأ وحده بين أهلي وأطلع وأشارك بكل محفل يصير من وأنا صغيرة..
الآن صرت مقدر أحط عيني بعين وحده إذا تكلمت وإذا حطيتها أطلع زي المجنونة أتلوى وكذا ما أعرف أتماسك نفسي من التوتر! وأتلعثم وأكرر الحروف أوقات..
اللي يقهر بالموضوع إني لما أتكلم بيني وبين نفسي أصير قوية وأتكلم زين وكلام مرتب لكن لما أجي عند الناس! سبحان الله وكأني شخص ثاني
قعدت أفكر وش السبب ليه أنا صرت كذا؟ معقولة مشكلة كذا فجأة من غير مقدمات؟ يمكن بسبب الضغوطات اللي صارت لي؟ بس معقولة كيف ضغوطات وقعدت معي هالمشكلة سنين طوويلة؟؟ اسألة كثيرر تدور ببالي .. طبعًا ما أخفيكم عن الليالي السوداء اللي شفتها من بين أيام هالسنين وعن كل يوم سيئ كان ثقيل علي..

حاولت وحاولت وحاولت أعدل من شخصيتي أخالط الناس أكثر وأكثر رغم صعوبة هالشيء بس عشان تنفك هالعقدة عني لكن ما تضبط.. كل شهر من رمضان يعدي كل يوم عرفة يجي أدعي إن الله يرزقني الثقة بالنفس وإن ربي يرجع شخصيتي القوية وإن ربي يرزقني المواجهة قدام الناس.. لكني ما زلت بنفس المشكلة 💔 والله يا بنات إني أكتب لكم وأنا أبكي من حرقة حياتي اللي المفروض تكون أجمل سنين عمري عشتها بأسوء الأيام

كلامي الأخير هذا هو اللي خلاني أكتب لكم المشكلة وأبيكم تقترحون لي وش أسوي،
أنا حاولت كثير زي ما قلت أحل هالمشكلة بنفسي لكن ماا انحلت.. آخر شيء قعدت أفكر هل ممكن يكون هالشيء اللي صار لي عين؟ خصوصًا إن المدة طوويلة ومحاولاتي كثير... وأشك بأشخاص قريبين مني جدًا .. لكن كيف اتأكد ؟؟ بقول لكم عن وضعي العائلي باختصار شديد عشان تفهمون وش أقصد
أنا عايشه ببيئة عائلية سلبية
أمي ما تقدرني ولا تحترمني وتهينني كثير رغم إني أكثر وحده مطيعة لها وأتحملها وأصبر على آذاها لي وكلامها اللي يسم البدن.. لدرجة أخواتي الصغار صاروا ما يحترموني وما ألومهم صراحة لأن إذا الأم ما أعطتني التقدير الكافي "اللي المفروض أكون كبيرة بعيون خواتي" كيف بيحترموني!
عندي أختين ما أقدر أسميهم حتى خوات..
الكبيرة تغار مني ويطلع منها تصرفات أتفاجئ منها وكأن عمرها عشر سنوات! مره من المرات وصلتني هدية بسيطة جدًا من صديقة عزيزة لي بالثانوي زمان، يوم جينا نفتح الهدايا فجأة واحنا جالسين بين أمي وخواتي الباقين قالت ليتها ارتاحت وما جابت هالهدية اللي تفشل! وبعد كم يوم جت عندي تسألني وين الهدية اللي جتك خليني أستخدمها!
دايم هالأخت تستقصدني بالكلام وتفشلني وتحاول تقلل من قيمتي.. حتى لما أقول أي معلومة علمية تضحك علي وتقول أقول لا تخربطين فوق رووسنا وبعد كم يوم سبحان الله تجي تعرف المعلومة وتقولها بنفسها وتنكر إنها كانت تضحك علي!
والأخت الثانيه تعدت مراحل النذالة بجميع أشكالها.. مره اتهمتني إني أكلم أولاد وراحت تقول لأمي ولما فتحت الجوال ما لقت شيء وسكتت ولا راحت تهزأها على غلطها ولا كأن شيء صار.. لما أجي أشكي لها تسوي نفسها ما تسمع وتطنشني! تستغلني بأشياء كثيييرر ولما أجيها وأحتاجها تصرفني! ولو سوت لي تمنّ علي سنين..
سيئة الخلق معي جدًا
صرت أكرههم وأدعي إن الله ياخذني من هالدنيا بلا عذاب ولا سابق عذاب عشان أرتاح لأن خلاص أنا صار وضعي محزن وكأني جسد بلا بروح
اقترحوا لي وش الحل؟ يمكن تفكيري كله غلط وأهلي مو هم السبب.. أنا ضايعة ما أعرف وش أسوي بحياتي..
وآخر شيء بقوله إني حاولت أسيطر على هالوضع بالسنين هاذي بانشغالي بالدراسة ولولا الله ثم هي كان صرت مريضة نفسيًا.. والحمدلله كنت متفوقة ومنشغله عنهم.