🍬التباشير السابع لمواليد (مايو)و(يونيو)🍬 2019

يمزح بس مزحه ثقيله

تطورت يا ذكريات قولت يمكن اولد هههههه

انا ماخيطت ولاسوت لي توسعه ومدري وش الوضع بعد الاربعين 😣
ولاداتي قبل كلهن خياطه هالمره لا الله يستر ولاقلت شي لابو الشباب ولا راح اقوله ماني ناقصه 😭

انتبهي تخلينها كذا وانتي عمليه
شوفي حبوب الرضاعه مع رضاعه مع الواقي احس تكفي مع بعضهم عشان اذا مانفع واحد يغطي الثاني

السلام عليكم ومبارك لكل اللي ولدوا
جيت بالاكشن الله يهون عليكم
رحت يوم الاثنين موعدي وقالت الدكتوره خلاص ندخلك تنويم عديتي موعدك
والثلاثاء كشفوا علي لقوه واحد سانتي والراس تحت لكن تقول موب ثابت سبحان الله بيدها من برا عرفت وعطوني تحميلة الساعة ١١ الصبح يوم بدأ الم الطلق خذت المسكن اللي بالفخذ واستمر الطلق لما الساعة ٣ الفجر يوم بدأ يبرد قاست لي لقوه بس ٢ سانتي لكن الراس ثابت الحمد لله كان قمة التحطيم وعطتني تحميلة ثانية لما حمى الطلق خذت مسكن ثاني لماجاء الصباح على الساعة ١٠ كذا لقوه نفس الشئ ٢ سانتي عطوني تحميلة ثالثة وبعدها بدأ يزيد الطلق تحملت شوي وطلبت مسكن ورفضوا يعطوني قالوا كثرنا
ويضر رئة الجنين كنت في كربة الله اعلم بها على الظهر قالت خل اقيس لقته ثلاثة سانتي قالت تبين اساعدك اوسعه عشان يدخلونك ولادة ووافقت ووسعته لما ٤ سانتي وبعدها قالت الحمد لله صرتي ٥
نقلوني لغرفة الولادة وطلبت ابرة الظهر تقريبا خذوا نص ساعه او ساعة الا ربع لما خذتها كانت اطول دقائق الانتظار ولاعطوني حقنة شرجية لاني كنت اتألم بقوة ورفضت
والحمد لله بعد الابرة خذت نفسي واستعدت قوتي شوي لما وصلنا لطلعة الراس والحمد لله ماعانيت فيها لان المنطقة مخدرة
وبعد الولادة جاني نزيف جلسوا يحاولون يوقفونه ساعه كاملة ولا قدروا ومع الاسف دخلوني عمليات ببنج نصفي ووقفوه وسلمت انا وولدي الحمد لله
تجربتي لأبرة الظهر كانت ممتازة ولو رجع بي الزمن باخذها صح الوقت اللي خففت علي فيه كان قليل لكن استرجعت نشاطي وقوتي وقدرت ادفع لأني كنت منتهية من الالم
عيبها جتني رجفة في جسمي قوية بعد الولادة ويقولون انها من اعراضها لكن عادي حسناتها اكثر وانا سبق وجربتها قبل في ولادة سابقة ولاسببت لي رجفة لكن يمكن لأني اخذت نوعين بنج ومنوم وقت العملية فجسمي ماتحمل
مكان الابرة يألمني شوي اذا جيت اقوم لكن عادي مع الوقت يخف
وهذي نهاية تجربتي
على قد ماتعبت على قد ماانا مستعدة اتحمل اكثر من هذا الالم مقابل حضن ولدي اللي انتظرته تسع اشهر
كان شوقي له يخفف ألمي كل ماجاني الطلق تخييلت لحظة خروجة وبكيت ورفعت راسي لربي ادعيه
الحمد لله اللي ماخيب تعبي وقرت عيني بشوفته اكتب لكم الحين وانا اتذكر ايام انتظار الدورة وشكي بالحمل وفرحتي الشديدة فيه
واتذكر ايام انتظار السونار عشان اسمع نبضاته
وايام الوحم الشديد وعذابه
وايام انتظار الشهر الرابع عشان اعرف نوعه
وايام السوق واستمتاعي وانا اشتري ملابسه واتخيلها عليه
وايام صدمتي بنزول المشيمة وخوفي عليه وانتظاري لارتفاعها
وايام فرحتي بارتفاعها
وايام انتظاري للطلق والبحث عن اسباب تحرضه
كل وقت الحمل كان خوفي عليه هو موب على نفسي ولما جاني النزيف كنت خايفه عليه هو لو جاني شئ لاقدر الله لكن الله سبحانه لطيف بعباده
تعبت في ولادته صح لكن كل الم نسيته بشوفته
فعلا تفداه روحي وقلبي والتعب
دام اخر المشوار شوفة عيونه