ازالة جزء من قناة فالوب

السلام عليكم


كل عام وانتوا بخير والله يتقبل منا ومنكم صالح الأعمال


انا مشكلتي طويله الحمدلله وان شاءالله اني من الصابرين المحتسبين


تعرضت لحمل خارج الرحم وتأخروا في تشخيصه لا أسباب أهمها انه كان فيه كيس في الرحم واختفى بعد فتره وضنوا انه الحمل طاح لان الهرمون نزل بعد المهم مابي اذكر تفاصيل الموضوع طويلة ومعقده تم التشخيص في الأسبوع الثامن وعطوني إبره ميثوتركسيت ونزل كيس الحمل بعد الابره بخمس ساعات المهم بعد اربع وعشرين ساعه تعبت وقالوا في ارتشاح بسيط وان شاءالله ماتحتاجين جراحه واليوم اللي بعده مت وحيت من الالم الله يعظم الأجر يارب اكتشفوا ان الانبوب تمزق وصادني نزيف داخلي نزلوني للعمليات بسرعة كانوا بيفتحون عمليتي اللي قبل بس الحمدلله ربي ستر ومافتحوها سويت مناظير وواحد من الفتحات شوي طولوه علشان كيس اللي يسحب الدم


بنات ابي اسالكم الفتحات وايد تألم مب قادره أتحرك الم آلم فضيع تعبني نفسياً متى يروح الالم والخياط متى تطيح العيد جاي ومب قادره أقوم في بناتي ولا اطلعهم
ثاني شي صادني نفس التقرحات في شفتي ممكن تكون من الابره ولا شنو الموضوع
وثالث شي وايد تصير لي تخيلات واشياء واشوف ناس من بعد البنج وأنادي الناس باسماء ثانيه بعدين استوعب تتوقعون عادي حتى امي اصوت عليها باسم حد ثاني


شي ثاني صادني خوف من العلاقة انا اسفه يعني بس بعد العمليه يكون فيه الم ولا عادي ومتى المفروض تصير ويكون كل شي في السليم
الحمل نبهوني هالفترة ماحمل طبعاً انا بناتي حقن مجهري وحملت بعدهم حمل طبيعي بس مايتم اجهاض وحمل خارج الرحم ماعرف هل بيصير حمل اللحين ولا لا العلم عند الله بس مابي أغامر وش أخذ موانع انا عندي موعد بس بعد العيد


اللي عندها خلفيه عن اَي شي تعلمني


ادعوا لي ربي يثبتني ويصبر قلبي ويحفظ لي ذريتي

33 تعليق 4,947 مشاهدة

شاركي في النقاش

سجلي الدخول لإضافة تعليق.

التعليقات

33
  1. @slaty_saaadty_1121

    ياعمري ام سعد الحمدلله على سلامتك وكل شي بأجره
    الفتحات ١٠ ايام وتبدا تخف ارتاحي هالفترة وسوي عزل طبيعي لما يرتاح رحمك


    خذي مسكنات عند الألم واشربي أشياء دافئة تعتبرين زي النفاس
    والله يعوضك بالقريب العاجل من غير علاج
  2. @umsaad_qatar

    صاحبة الموضوع
    صلاتي سعادتي 1121
    ياعمري ام سعد الحمدلله على سلامتك وكل شي بأجره الفتحات ١٠ ايام وتبدا تخف ارتاحي هالفترة وسوي عزل طبيعي لما يرتاح رحمك خذي مسكنات عند الألم واشربي أشياء دافئة تعتبرين زي النفاس والله يعوضك بالقريب العاجل من غير علاج
    الله يسلمج يابعد عمري انا الحمل احس صادتني عقده منه اتمنى اتجاوز هالشي صاير فيني خوف كلمت زوجي رافض فكرة العزل يقول اللي ربي كاتبه بيصير وانا ماخذه ابرة كيماوي اخاف تاثر
    انا ما ادري اذا بحمل ولا خلاص
    مب معترضة على قضاء الله وقدرة سواءً حملت او لا بس احس فيني خوف ابي أتخلص منه والله العظيم شفت الموت وتعبوا هلي معاي الله يعزج دخلت الحمام وافقد الوعي وانا منزله ملابسي 💔💔 وامي دخلت علي وشافتني بهالمنظر
    ودخل علي الدكتور والله حتى شعري ماغطيته من الالم وماعلي الا لَبْس المستشفى الله يسترنا بستره ندمت ندمت

    الله يجزاج خير يارب ويهون عليج ويرزقج تمام الحمل يارب
  3. @alfarsh_18

    الحمدلله على السلامه
    والله يشفيك ويقومك بالسلامه ويعوضك العوض الجميل
    وانصحك بالرقيه الشرعيه والفاتحه وسورة البقره
    حافظي عليها دائماً
  4. @slaty_saaadty_1121

    Um.saad_qatar
    الله يسلمج يابعد عمري انا الحمل احس صادتني عقده منه اتمنى اتجاوز هالشي صاير فيني خوف كلمت زوجي رافض فكرة العزل يقول اللي ربي كاتبه بيصير وانا ماخذه ابرة كيماوي اخاف تاثر انا ما ادري اذا بحمل ولا خلاص مب معترضة على قضاء الله وقدرة سواءً ح…
    لا لازم عزل عشان ترتاحين نفسيا وجسديا اقنعي زوجك بأسلوب حلو قولي له بس ٣شهور وبعدين خلاص

    وخذي فوليك اسد يوميا


    اقري على نفسك وحصني نفسك زين واشربي ماء زمزم بنية الشفا والحمل


    يااارب يسر خاطرك باللي تتمنين ويحفظ لك ماعطاك
  5. @am_slomy8

    لاحول ولاقوة الا بالله
    الله يعوضك يارب ويكتب اجرك
    انا من شهر مريت بحاله مشابهه
    بس بسالك انتي بعد ابرة الكيماوي مفروض راقبتي الهرمون
    وبالنسبه للنزيف من ايش ؟؟
    اتوقع كان توام واحد نزل واحد بالانبوب وهو سبب نزيف
    بس غريبه الاطباء مالاحظوا بالسونار المهبلي شي !!

تابعي تجارب أخرى من هذا القسم.