الشماته وماادراك مالشماته

موضوع نحتاج التذكير فيه جميعا
لايوقف
واتمنى كل شهرين ثلاثه ننزل مثل هالموضوع عشان نتعض نحتاج للتذكير والله

الله يعفوا عنا جميعا ولايؤخذنا بما فعلنا
وببما قلنا.
واستفدت كثير من القصص شكرا لصاحبه الحساب ولكم جميعاً
لو عندي اضافه راح اجي اكتبها

الله يعينك ع نفسك 😂
داخله كل المواضيع وتتحركش ف الناس شكلك فااااضيه الله يشغلك 😚

موضوعك عن الاستهزاء والتنمر وكيف الله يسقي الواحد بنفس ماسقى الناس ..
الشماته غير معناها ان احد يطيح بشر لسانه وافعاله ونشمت فيه ..
،، المهم
لي موقف وخذوه عظه وعبره
تزوجت ومعاي عروس بنفس اليوم .. يعني اخوه معاه
وقتها عمري صغير 22 سنه ...المهم انا حملت بسرعه وجبت بنتين ورى بعض والي تزوجت معاي ماحملت وكان هذا الشي متعبها نفسيا مهما كابرت .. المهم هو كان عليها تصرفات تقهر شوي بس مو لدرجة انها سيئة يعني كانت محترمه ذاتها تقريبا بس لابد من غيرة الحريم
المهم انا كذا استغرض قدامها ببناتي والمح يعني باللي تاخر بالحمل وبس احب اتكلم عن موانع الحمل ولا اراعيها وان فلانه تزوج زوجها عليها لان ماتحمل .. وكنت اشوف الصمت والحزن والربكه بوجهها وعادي كن ماهمي ولا كان هذا الشي من ربي ،، صارت اخر شي تجنبي وتحاشى مني
المهم مرت السنين والحمدلله كبرت وهداني ربي وصرنا زي الخوات وهي الحمدلله انجبت بعد سنوات علاج وزال همها ،،
لكن انا الان صرت محلها في الغبنه والقهر من ناحيه ثانيه .. اقلكم قصتي انا متخرجه من 15 سنه وممتازه بس ماتوظفت تخصصي ماعليه طلب واذا جا تعيين يكون اخر الدنيا ... بنات عمي و خوات زوجي واخواتي الي اصغر مني ثنتين كلهم تعينن والي ممرضه وكذا وصرت مغبونه مره انا شاطره كنت وممتاز ولاتوفقت بوظيفه والي اصغر مني كلهن توظفن .. اذا اجتمعنا اغلب الكبيرات بالسن من الحموله يسالوني بلاك ماتعينتي فلانه اصغر منك توظفت !! والمعلمات من الحموله والي ببنك ومستشفى كل كلامهم عالرواتب والمظاهر والي تسال وتفلسف ماتقدمين انتي ؟ وانا ساكته مغبووونه مدري القاها من قل حظي والا من كثرة اساله ليه وليه
حسيت الدنيا دارت علي وزي ماكنت اتعمد واستعرض بحملي وقدامي وحده محرومه وقدرها من ربي والرزق مو بيدها ... هذا انا الان ماشوف الا وحده تستعرض ووحده تتلقف وتسال حتى عن معدل وكذا ليش ماتوظفت وانا محرومه وقدري من ربي والرزق مو بيدي
صرت اتحاشى جمعاتهم ودارت رحى الدنيا علي

والله الشماته مو زينه اختي الله يهديها من النوع الي تشمت بالناس ماسكه على وحده تحمل ورى بعض ماشاء الله واختي مسميتها دجاجه ودايم تعيب عليها سبحان الله من ثالث طفل لاختي صارت تحمل على طول طفل ورا طفل اهلكها الحمل والولاده وكل ولاده تتعسر عليها لين راح شبابها كله وسوت ربط نهائي😂😂الله يهديها وهي حاسه بغلطها بس ماتتوب