حزينه على وضعي *مجرد فضفضه*

ماعرف كيف ابدا بالموضوع بس تعبت ابي افضفض عن مشاكلي انا تزوجت وانا صغيره عندي ٥ بنات كبااار جبت بنتي الاولى عمرها ١٨ بعدها بسنه جبت بنتي الثانيه عمرها ١٧ بعدها باربع سنين جبت بنوتتي الثالثه اسيل عمرها ١٤ بعدها باربع سنين جبت بنتي عمرها ١٠ واخرتها اخر العنقود توها داخله اولى الله يحفظهم ويخليهم لي بناتي كلهن يدرسن ذي المشكله ان كلهم كبار وربي اني حزينه مره على وضعي معرف كيف اتصرف مدري من وين القاها عندي مليون مشكله ابي اتكلم عنها والله العظيم مهمووومه جسمي خرب متناسق وعندي خصر بس سيلوليت بفخوذي مقدر البس قصير وزني ٧١ غير بناتي الكبار والله العظيم معرف كيف اتصرف معاهم بناتي الثنتين مدرستهم مع بعض الاثنين بثاني ثانوي وبنفس المدرسه مع كل هذا مايطيييقووون بععضض ورب الكعبه اسمع بنتي الكبيره الي عمرها ١٨ تقول انا اخترت علمي عشان ماقابل اختي وسمعت انهم مايمشن مع بعض!!!! ويسوون نفسهم مايعرفون بعض بالمدرسه مايتقابلون الا بالمدرسه غير الضيييييم تويتر ياويلي وربي فاتحه تويتر بنتي الي عمرها ١٧ واولول من الكلام انا معطيتهم حريتهم عالاخر وادري ذا غلط والله العظيم ماكذبت بولا كلمه بنتي ذي انا ماحاسبها ولا اكلمها حتى شعرها حتى ماتكلمت عنه على انه ناحتته مو البوي الكثيف لا ناحتته من فوق وسكتت لقيت تويترها ورب الكعبه اني مصدومه كله كره لنا والله يلعن اهلي واكره خواتي وياليتني عايشه لحالي هذا وانا ماحااااسبها على ولا شي غير التسجيلات الصوتيه مع صاحباتها غير الجروح تخيلن عندها غمازه تهببلل بذقنها مصوره وهي تجرحها!!!!! بنتي ذي مرت بحاله اكتئاب من طفولتها انا عصبيه عليها واعترف بغلطي انا ادعي عليها وقاسيه مره معها مره قصت شعر اختها الصغيره ودعيييت عليها ومن داخلي اتقططططعع شعر اختها يجننن ناااعم وطويل قصته لكتفها دعيت عليها تنقص يدها الله يسامحني والله العظيم اني ندمانه كانت تروح لبيت جدتها عشان تهرب من المشاكل بس لحد يجي يحاسبني انا جايه افضفض انا مكتئبه من جدي بشكل محد يتوقعه ماني ب بحال شي زوجي لااا مبااااللليي كل يوم هوشات معاه غيرر المصيبه الكبرى ان الدوره مقطوعه عني وشاكه اني حامل لحد وانا ماصدقت بنتي تكبر اللهم لا اعتراض على قدرك مو قصدي اعترض على هالنعمه بس والله تعبت ماصدقت اتخلص من الكرش ٥ حملات وبوقت قصير شوفوا التعب لحد يقوللي سن اليأس لانني لهالحين مادخلت الاربعين احس اني تعبت مكتئبه وحزينه ممكن هاذي مشاكل بسيطه وتافهه بس وربي محد يعلم بالحزن الي فيني غير الله انا الحمدالله محافظه على صلاتي واذكاري بس حزينه من اشياء كثير اول شي بناتي الكبار وكرههم لبعض وبنتي وكرهها لنا والدوره وجسمي ومشاكل زوجي ماعرف اراعي نفسياتهم مااهتم لهم احس اني تبلدت شعوور غررريب بنتي الي باولى قبل تموت بكا لو طلعت مع خواتي ولا صاحباتي وتركتها بالبيت تخااف تموت صياح الحين اطلع اروح اجي ماتدري عني بنتي الي عمرها ١٤ هي الوحيده الي تدرس لحالها هي بالمتوسط جاتها حاله طول وقتها خاييفه وجاتها نوبات هلع تجي بوسط الصاله وتموت صياح وبكا وتتشنج يدينها صرنا نسويلها تحاليل ع التشنج الي يجيها وطلعت سليمه وهي تطمنت ذا الكلام قبل شهر بعدها صارت عصببيه تصاارخ لدرجه لو اختها الي اكبر منها جات تسألها عن شي او تسولف معاها تتحول لمشكله بالبيت تصارخ وتضرب وطول وقتها عابسه وربي تعبت تعبت