ابي وحده حكيمه تدلني ع حل تعبت// عواطف تركي ردي علي تكفين

والله اذا هذه تفكيره وهذه طبعه من يوم اخذتي
والان لك ١٤ سنه ماقدرتي تغيري
بصراحه زوجك اناني الرسول صلى الله عليه وسلم قال خيركم خيركم لاهله وأنا خيركم لاهلي
اول شي عليك بالدعاء ولاتيأسي تحري اوقات الاجابه وادعي وانت محسنه الظن بالله يسخره لك ويحنن قلبه عليك
ثاني شي لاتعلقي نفسك فيه اطلعي ابسطي نفسك بنفسك مع اهلك مع اخواتك صديقاتك جاراتك
ادخلي تحفيظ ادخلي نادي المهم اشغلي نفسك
وابسطيها زي هو ماهو شاغل نفسه وباسطها

الله يهديه لك

احتمال زوجك يخرج برا البيت ويطول هروب من اسلوبك وحنتك


الظاهر ان عندكم روتين ممل قاعدين تعانو منه انت تدوري على زوجك وطول وقتك نازله فيه عتاب ومركززززه حياتك فيه وهو طفش وصار يخرج وعاجبته الخرجه برا بدون حنه ومشاكل ويرجع ينام حتى يتجنبك


غيري نفسك غيري حياتك الحياه مو بس زوج واطفال ربي اخر الخلفه عنك لحكمه يعلمها خلاص اشغلي نفسك لنفسك سجلي في تحفيظ قران اشتركي في نادي رياضي جددي نفسيتك وغيري سلبيتك لايجابيه دوري لك دورات طوري هواياتك


معقوله ١٣ ساعه قاعده بالبيت حاطه يدك على خدك تنتظري زوجك يحزن عليك ويجي يقول حرام كسرتي خاطري تعالي امشيك وانت تقولي نظرته للمرأه انها للبيت؟!!! انسي انه الرجال يقول للزوجه تعالي اخرجك لو مو هي اللي تطلب ماظنتي تشوف الشارع الاصدفه


روحي زوري اهلك واخواتك وصديقاتك جددي نفسك غيري اسلوبك خلي زوجك يحب كلامك ومع الايام احتمال يتغير ويصير يحب يخرج معاك


اعزمي اهلك او اهله

ولاتنتظري من الرجال يعبر عن الحب بالكلام او يعتذر ويقول اسف اغلبهم حبه واعتذاره افعال والزوجه هي اللي تفهم زوجها وتعرفه

وبطلي عتاب لان الرجل يكره كثرة العتاب ويتنرفز وتبدا المشاكل ويشوفك نكديه ويبعد عنك

ماشاء الله زواج 14 سنه يعني زوجك تعود على هذا الاسلوب
كذلك ربما انتي من البدايه اعطيتيه مجال يتعود على كذا
هو مرتاح وعايش حياته
وانتي جالسه تاكلين وتحرقين بنفسك تتحسرين على الطلعه
انتي عرفتي نوعية زوجك وتفكيره وغلظته وشدته
يعني ابداً لا تفكرين تستعطفينه وتتذللين له اذا بتطلبين منه طلعه لانك جربتي وشفتي النتيجه
ابحثي عن حلول اخرى لا تستمرين تستخدمين معاه نفس الاسلوب والطريقه الاستعطافيه
مره سمعت اخصائيه تقول اذا زوجك نوعيته متحجر وتفكيره صعب وكل شي عنده عيب وطلباتك ماتجي الا بالتعب سواء مشاوير او سفر خلاص افهمي ان زوجك تركيبته وعقليته وتربيته غصب عنه يتصرف كذا لما تطلبينه شي يتجاهله ويعطله ويماطل فيه لانه بداخله مايقّدر حجم حاجتك ورغبتك للشي الفلاني ولا يستوعب وش كثر يهمك ويعني لك الحصول عليه يعتبره شي تافه وغير مهم حسب تفكيره واظن هذا الشي واضح لك في زوجك
الحل اجلسي سايسيه وسلكي له ولا تعترضين على طريقة تفكيره وتحجره
كبدايه حطي لك خطه مدتها مثلاً 6 شهور وحددي الهدف او الشي اللي تبينه مثلاً سفر
وانتي عارفه عنده امكانيات ماديه وقادر يسفرك ومافي معيقات غير عقليته ورفضه هنا توكلي على الله بالخطه
اول شهر اقترحي عليه فكرة السفر وشوفي رد فعله اذا ثار وتنرفز خلاص لا تجادلينه قولي بس فكره جات براسي وقفلي الموضوع
ثاني شهر شوفي لك وقت روقان وافتحي سالفة الطلب بطريقه تعبرين فيها عن مشاعرك اتجاه الطلب الفلاني وركزي على الجانب العاطفي واحساسك وشعورك انك نفسك بهذا الشي وانك ودك تحسين بكذا وكذا معاه كزوج لما يعطيك الطلب واسمعي رده بدون لا تتنرفزين او تبالغين يعني اعتبري نفسك تفضفضين عن شعورك بالنقص وكيف راح تفرحين بالشي لو انه عندك وبس قفلي الموضوع يعني خليه يكون كأنه مجرد سالفه لا تنجرفين للزعل والتعصيب
ثالث شهر شوفي لك اي واحد من اقاربه الرجال او اصحابه او جيرانكم او جماعته اللي يكونون مثل عقليته ونوعيته واضربي فيهم المثل قدامه بدون مبالغات او دق بالكلام يعني تكلمي على سبيل المدح ان فلانه ماشاء الله تقول ان زوجها عمل لها وفعل لها كذا وكذا مثلاً عزمها مطعم مفاجأه او اخذها المكان الفلاني ويمدحونه وعبري كيف ان زوجها كان مبسوط معاها وادعي لهم وعبري عن فرحتك لفلانه وزوجها وبس لا تلمحين له ولا تدقينه بالكلام لان المقصد انه هو في تفكيره يراجع نفسه ان فلان اللي يشبهه بالتفكير عادي يسوي كذا وكذا مع زوجته فتنفك منه العقده
ورابع شهر شوفي لك اسلوب وحيله مختلفه لفتح الموضوع حتى لو تكررين احد الطرق السابقه
واذا وافق يعطيك طلبك لا تطنقرين او تقولين ماجات من خاطره ولا استانست بالعكس رفعي به للسماء واشكريه وامدحي فيه الصباح والليل وقبل النوم وبعد النوم حسسيه انك كنتي في جنه معاه بهذي الطلعه واشكريه وماقصرت والله لا يخليني ولا يحرمني وادهنيه وغرقيه بالمدح على هالطلعه
تقول ان اللي جربوا الطريقه استفادو وتحسنت الاوضاع
واهم شي يكون عندك طول بال وتتوكلين على الله وتنوين بداخلك التغيير وتسعين فيه وتسألين الله بصدق ان ييسره لك وان يؤلف بين قلوبكم ويسخره لك
وحاولي تصنعين لك اجواء خاصه فيك انتي بدون زوجك
يعني اطلعي مع صديقاتك وجاراتك واهلك لا تعتمدين عليه في اسعادك كأنه اخر حبه واخر حل
الحياه فيها سعه حاولي تسعين فيها وتجربين حاجات جديده بدون زوجك