قبل كم سنة بداية طلاقي كان فيه وحده كنت احسبها صديقة لي وكنت ما انساها من الهدايا والعزايم مع باقي صديقاتي وكانت كل يوم تكلمني واكثر من مره نطلع سوى في الاسبوع الواحد واكتشفت من وحده انها تغار مني وتحاول تشوه صورتي عند باقي صديقاتي بامور فظيعةلين جا يوم حلفت هذي الانسانه بالله انها شافتني اصور صديقاتنا سناب وارسله لواحد وسمته بالاسم كمان وتفاجأت اني بس رجعت البيت ونمت صحيت لقيت القروب كله حاذفني ومبلكيني من كل مكان وما ادري ايش الموضوع الا هي ادق عليها ترد ومالها نفس وتقول بعدين بعدين اكلمك وتضحك ، صليت المغرب وقتها ودعيت قلت يارب ارني الحق حقاً وش صاير ليه كلهم كذا وقررت اني اروح لبيت وحده واعرف منها ايش اللي صاير لان موطبيعي كلهم ثاني يوم يحذفون ويبلكون واحنا بيننا عشرة عمر اقل وحده نعرفها ذاك الوقت كانت من سبع سنوات ، شوي الا دقت علي وحده منهم وقالت لي يا ريهام انا ماقدرت اقطع علاقتي فيك بدون ما اتكلم معاك وقلت لها وش الموضوع قالت تعاليني البيت الحين وكانت مصرة ان الحين ، رحت ولقيت منهم اربعه والانسانة اللي تكلمت فيني عندهم قاعده بكل ثقه وقالوا لها الحين واجهيها اذا انتي صادقة قامت قالت كل كلامها الكذب والافتراء علي بوجهي قدامهم وانا مذهوله منها طلعتني راعية شباب ونصابة واصورهم وتحلف بالله باغلظ الايمان انها شافتني بعينها وحجتها قدامهم اني لما تزوجت رحت لمنطقة معروفة بانفاتحها شوي وكان زوجي لاهي عني ولا يدري عني وعن اطفالي وقتها واني استغليت هالشي وانها شافت بعينها وبعد طلاقي ماقدرت اترك هالدرب وانه سبب طلاقي وانا ما علمتهم بالسبب الحقيقي لطلاقي قلت لها خافي الله توك مملكه ماتخافين ينتقم منك قالت ليه ينتقم انا صادقة واصلا انا بقطع علاقتي فيك ما ابي اتزوج ويعرف زوجي اني اماشي وحده مثلك انا وراي زواج وسمعة ماني مثلك مطلقه
قمت أنا مسكت جوالي وفتحته وحطيته ع الطاولة قلت يلا بنات هذا جوالي فتشوه وطلعوا لي محادثة او رقم او واحد بالاسماء اللي قالتها والصور والفيديوهات والسنابات قالت البنت الكذابه اكيد منظفة جوالك قبل تجين قلت وش بيعرفني وش موضوعكم وبعدين انا ما عندي مشكلة اخلي جوالي عند اي وحدة فيكم يوم كامل عشان تشوف بعينها مين يدق والا يرسل لاني انسانه نظيفة واخاف الله وكلامك عني حسبي الله ونعم الوكيل فيك الله يفضحك قدامهم وقدام العالم ويرد كيدك بنحرك ، والمهم رفضوا البنات يمسكون جوالي وانا اقسمت عليهم بالله وقامت وحده وفتحته وقعدت تقلب وذيك وجهها الوان وقالت يابنات ترا البنت جوالها ما فيه شيء قالت لهم وانتم مصدقين هالاشكال اصلا هذي بكره بتفضحكم بين رجاجيلكم اذا ماهي لافه على احد فيهم وهات المصحف احلف لكم عليه هنا انا خفت من طغيانها وهي تطلبهم مصحف قلت لها خافي الله في نفسك عموما انا وريتكم جوالي وكلمتي قدام كلمتها امام الله وكل وحدة فيكم صدقت فيني شيء اسأل الله عز وجل ان يرده لها في نفسها وزوجها وعيالها واشوف نصري فيكم بعيني وقبل اطلع قاموا البنات يمسكوني ويحبون راسي ويعتذرون مني ولا تطلعين هذي خذتنا بالحلف ويبكون ويترجوني قلت خلاص انتهى وهذي اللي تكلمت وتحلف لفيت عليها وقلت لها نذر علي لأدعي عليك مادمت حية لين اشوف حوبتي فيك .
وفعلا يابنات كل يوم لا ارادي من وقت لوقت فجأة القى نفسي ادعي دعاء مادعيته على مخلوق بعبارة وحدة بس ( اللهم عليك بفلانه فإنها لاتعجزك وارني فيها عجائب قدرتك) وحسبي الله ونعم الوكيل ، ومرت الايام والبنت الظالمه هذي جهزت لزواجها وافخم قاعة وقبل زواجها بثلاث ايام يكتشف خطيبها شيء عنها ويكنسل الزواج وقال المهر كامل يرجع والا بفضحك في المحكمه ان لك علاقات سابقة والادلة موجودة ، و بنفس الفترة ذيك يقدر الله سبحانه ويفصلونها من دوامها فجأة ويقلب عليها واحد من اخوانها بعد مشكلتها من خطيبها وصارت مسجونه في غرفة اخوها يقول دبري فلوس للرجال صرفتي المهر كله وماعندي اعطيه والا خليك معلقة ، والكل درى بسالفتها وفضيحتها من خطيبها واهله ، والى الان لها خمس سنوات معلقة واللي مفروض يتزوجها تزوج وعيل .
والبنات قطعوها كلهم وصارت منبوذه و معلقة ومديونة وبدون وظيفة وجاتني اخبارها لعندي وانا قاعدة اتقهوى في مجلس قلت سبحان الذي ينصر المظلوم
واعتذر ع الاطالة
النوايا مطايا 👌🏻 و كما تدين تدان
متابعة النقاش، صفحة 4