شاركي في النقاش

سجلي الدخول لإضافة تعليق.

التعليقات

23
  1. @aasl_sdr

    حبيبتي الي صارلك صارلي ياخذون ملابسي واي شي بيتي يشرون مثله واي حركه اسويها فشعري او لبسي او بيتي الاقيها من بكراء والعائله كلها لوبغو يروحون اي مكان دقو وشو احسن سوق وحسن مشغل وووووووووبالاخير شاتوني تدرين وش سويت
    مروح لهم الا بالشهر مره وربع ساعه بعد اطق زيني وروح كني عروسه
  2. @miss_mooon

    ..

    اسلوبك في الوصف ماعجبني !


    اولآ .. حبيبتي الأمور هذي أسخف من أنك تعطينها بال !

    التعب عليهم ياروحي مو عليك وش ينقصك اذا قلدوك !!


    ثانيآ انتي عامليهم بالأخلاق عشان ترضين ربك ولايهمك وش ردهم !


    ياليت ترفعين نفسك عن هالأمور هذي .. أحسها حركات متوسط !! مع احترامي لك


    ..
  3. كل العداوات قد ترجى ازالتها الا عداوة من عاداك من حسد


    يا بنات وش هالردود تكفون وش حركات متوسط ووش انتي مغرورة ما يصلح كذا طالعين كانكم اهل زوجها وتدافعون عن انفسكم لا تكونون خواته بس !!!!!!!!!!


    انصحك تصيرين رسميه بالدرجة الاولى وانا مثلك تماما كانك جالسه تتكلمين عن اهل زوجي فعلا مو كل الناس تنفع معاهم الطيبه لانهم يعتبرونها غباء ويحقرونك

    لا تغلطين عليهم ولا تحسسينهم انك احسن منهم لان هالشيء يثير غيرتهم واهل زوجك فيهم ميزه انهم يظهرون اعجابهم بالشيء عكس اللي عندي يتنطزون على اي شيء تسوينه وبعد فتره يوصل لك خبر انهم سووا نفس الشيء شفتي العقليات المريضه الله لا يبلاني خخخخخخخخخ
  4. @trof

    صيري رسميه معهم ولاتكثرين روحات لهم

    وبيحسون انك تغيرتي ويمكن يرجعون...

    بعد انا مع اللي تقول يمكن زوجك مزح معهم ومدح ذوقك قدامهم وانهم يقلدونك وحز في خاطرهم

    والا انتي كل مالبست وحده علقتي على لبسهالو انه كذا احسن ولو انه كذاك احسن

    وحسو انك شايفه نفسك عليهم

    على العموم ياكثر اللي يطيرون بالوحده ثم فجاءه يرزحون بها ...

    مع كل جديد بس لايهمونك اللي عليك سويه والمجاملات الزايده اتركيها..
  5. السلام عليكم..
    ياعزيزتي المشكلة إنك حساسة وتحمّلين الأمور أكبر مما تحتمل..
    وفيه نقاط حبيت أعلق عليها بموضوعك..
    أولا: عادة الحمايل يطفون بآخر عروس تدخل بيتهم..ويبدأون المقارنات بينها وبين اللي قبلها..من كل الجوانب!!حتى بالأصل والفصل--للأسف--
    أتذكر أول ما تزوجت,,زوجي هو أكبر أخوانه,, وتحته ثلاثة متزوجين,, كانت خالتي طايرة فيني لدرجة إنها قالت قدام حريم عيالها: فلان-زوجي يعني- أكبر أخوانه,,وزوجته أصغر من حريم خوانه كلهن!!
    حسيت إنهن حقدن علي شوي وتضايقن-ويحق لهن بصراحة-..بس من لحظتها على طول عرفت إن الأمور بينهم مهيب ذاك الزود..
    وزوجي ماعنده إلا 3 خوات..والناس اذواق,, كانو يعجبهم ذوقي وداايم يسألوني عن أحسن مشغل وأحسن سوق وأحسن محل حلويات و.......و......,,وهالشيء ما يضايقني,,بالعكس والله كنت أعطيهم أسامي المشاغل وأدق على الاستعلامات أجيب لهم الرقم عشان يحجزون..وما أحس بأي حزازيات..لأن هالأماكن لو ماعرفوها مني بيعرفونها من غيري,,مهيب ملكي بلحالي أو حكر علي,,وبالأخير أقدر أضيف لمساتي الخاصة وأتميّز..بعدين لو اتصلت عليك وحدة من زميلاتك وسولفتو بهالأمور ما راح تتضايقين صح؟؟ طيب وش الفرق بينها وبين حمولتك؟؟:)
    ويوم انتقلت أخت زوجي لبيتها الجديد اتصلت علي وسألتني عن المحل اللي فصلت فيه الكنب..وعلمتها,,وقلت لها أبخلي أخوك-اللي هو زوجي- يمرك ويوديك للمحل برسم الخدمة,,صحيح أحب أتميّز في بيتي وأحب إنه يكون متفرّد,,بس برضو سماحة النفس-خصوصا مع الحمولة-واجبة لأنهم حسبة الأهل..وأرجع وأقول لك ما فيها شيء لو يقلدونك..بالأخير كل وحدة لها لمساتها الخاصة..
    لكن أحيانا تتدخل غيرة الحموات..وإذا شافو إن ربي منعم عليك بشيء ماهو عندهم ممكن يكيدون لك عند حمولتك..أو أحيانا تجلس تزن على راس زوجها تبي مثلك,,وهو يروح لأهله ويشتكي لهم ..وتبدأ البلابل!!
    وبالضبط زيّك بعد سنتين من زواجي بدأت المشاكل..وصاروا يلومون زوجي ليش يوديني لأسواق غالية,,مع إني موظفة وعندي راتب..
    وصارت أخته تقول له:زوجتك شخصيتها قوية,,ويبي لها شكم ودقم والا ترى بتدوس مهابتك-مع إنها متزوجة..
    وإذا قصر زوجي بزيارة أهله أو الاتصال عليهم ,,دقت عليه أمه وقالت:أنت ولدي وأعرفك..البلا من هاللي عندك..
    يعني تدخّـل وإثارة مشاكل..يمكن سببها الغيرة..بس وش الحل في هالحالة؟
    اتبعت معهم أسلوب جديد..والحين لي 6 سنوات متزوجة ويعاملوني أحسن مما يعاملون حريم عيالهم الباقين..بس بدون ما يغلطون على أحد عندي..وصارو يحترموني ويسوون لي ألف حساب..وإذا دخلت بيتهم -ولو زيارة عادية- أشم ريحة البخور,, ويقدمون القهوة بأحسن صوانيهم,,والحلى والمالح...:انها عزيمة,,وهو مافيه إلا أنا وبناتهم بس!
    أولا رجّعي المياه لمجاريها بالتدريج..يعني كلمي خالتك..بأسلوب لبق ومحترم,,وإعزمي نفسك على فنجال قهوة وقولي بنجي نسلم عليكم..وخذي معك صينية حلى..ولاتجلسين أكثر من ساعتين..وحافظي على الابتسامة والبشاشة واللباقة..وإذا سلمتي على خالتك حبي راسها..
    ثانيا: خصصي لك يوم كل أسبوعين,,تروحين تتقهوين عندهم بعد المغرب إلى العشاء..تقومين بالواجب وتعملين بأصلك..وكل فترة إعزمي خالتك وبناتها على القهوة ببيتك..وكل شهر شهر ونصف اعزمي العايلة على العشا..
    ثالثا: قللي الكلام عن نفسك..ولاتقولين رحت وجيت وسويت وجاب لي زوجي...هالكلام ترى يثير الغيرة في نفوس الحريم,,ويعتبرونه تفاخر وتعالي..ويمكن هالشيء ينفرهم منك بدون ما تدرين..
    رابعا: تحملي الكلام الجارح..وتذكري إن دفع السيئة بالحسنة هو من خصال المؤمنين,,لاتردين على كل كلمة..خصوصا إذا من خالتك..إبلعي الكلام واحتسبي الأجر..ولاتتشكين عند زوجك..ربي بياخذ لك حقك مهوب زوجك..
    خامسا: إذا صار عندهم مناسبة أو عزيمة ,,إتصلي إسألي وش يبونك تساعدينهم فيه..ولو قالوا لك مانبي,,بيقدرون اهتمامك واتصالك..
    سادسا:لاتسمحين لهم يسبون حمواتك عندك..وإذا جابو لك طاري وحدة منهم قولي:الله يستر علينا وعلى المسلمات..وذكريهم بإن هالشيء غيبة وماتبين تشتركين معهم فيه..
    سابعا: لاتسالينهم عن خصوصياتهم..ولا تنتقدين ذوقهم أو تصرفاتهم..باختصار احتفظي برأيك فيهم لنفسك..
    وأخيرا: غلطتنا يالمتزوجات إننا نحط حمولتنا زي أهلنا..ونتوقع يعاملونا زي بناتهم..بس ننسى إننا لنا خصوصيات مع أزواجنا ,,وإذا خليناهم يمونون حيل بيتدخلون حتى في الخصوصيات..حافظي على منطقة محظورة ماتسمحين لأحد يتدخل فيها..ولا تعطينهم مساحة كبيرة للتدخل بس لأنهم يمدحونك ويسمعونك حكي حلو..
    والله يوفقك مع زوجك ويستر عليكم ويرزقكم الذرية الصالحة

تابعي تجارب أخرى من هذا القسم.