لي الله

تعبت
انكسرت وانكسر قلبي وانكسر بدني
مصايب وابتلاءات متتاليه هدتني هد
اقعد كل يوم اتسال ليش انا يارب
ليش مايتحقق لي الشي الا بعد كسر عظيم
يتيمه من الصغر خطبني زوجي قلت يالبيه جاء المنقذ وهربت بدري من زوجات اخواني وعذابهم وانا بسن صغير مامداني فرحت مات اخوه واخذ زوجته علي وكنت توي متخرجه لي شهر اهداني احلى هديه تخرج
وكنت احلم تكون لي شقه مستقله ونخطط سوا
لكن
كان يحلف مايترك امه لوحدها لكن قدر يطلع مع ارمله اخوه
وبعد ماتزوج وانكسر قلبي حقق لي حلمي وهو البيت المستقل بعد ماحس بالذنب لكن
دخلته بالم وغصه عظيمه ولا له شعور فرحه ابد
قلبي له خمس سنوات مكسور كسر لايجبر
كرهت الدنيا وكرهت الاحلام والامنيات وكرهت نفسي
والوظيفه مو راضيه تجي
لا ام لا اب والزوج تركني وعايش حياته
ورزقي متعطل حبيسه اربع جدران لاسفر لا روحه لاجيه الزوج سافهنا ويسافر لحاله وانا مامعي ماده تسعدني وتسعد عيالي
تقتلني الوحده والفراغ الروحي محطمه منكسره وفارغه عاطفيا عندي اطفالي الحمدلله قايمه بهم ومالين حياتي


لكن منهاره ومحتاجه من يقوم بي ويلم اشلائي المتناثره
كثير اتمنى اكون زي الحريم تسير ع اهلها تنبسط لكن وينهم الله يرحمهم
كثير اتمنى اسافر لكن وين الزوج اللي يفكر بام عياله وعياله تكلمنا صحنا هاوشنا مافي فايده هذا المعدد اناني نذل
اشوف اللي سافرو بالاجازه مع ازواجهم واولادهم وابكي بكاء عظيم ماقول غير الله يبارك لهم ويخليهم لبعض
ويكون بعوني

61 تعليق 9,469 مشاهدة

شاركي في النقاش

سجلي الدخول لإضافة تعليق.

التعليقات

57
  1. @snaaa9

    خلاص زوجك قلتيها مفلوت لحاله لاتربيطن وناستك بوجوده
    وترى الوناسه واسعاده مو محصوره بالسفر
    خذي فلوس منه اطلعي مع عيالك تمشي مول ملاهي خديقه مطعم مهرجان تقضي للبيت الطلعه بحد ذاتها تغيير روتين لكم
  2. @sn_sonh

    عيشي لنفسك ثم لعيالك محد سائل عنك لملمي شتاتك وافرشي سجادتك وصلي وادعي وتذرعي بين يدين الله بكرا عيالك يعوضونك اصبري وتصابري عشانهم عشان خاطرهم خليك قويه قدامهم لا تيأسين هذي حكمت الله وش بتسوين كاتب لك هذا المصير ودايم اقري سورة البقرة باستمرار مريحه وبركه صلي على النبي واستغفري ان شاءالله تعدل ظروفك وزوجك جيبيه بلين والكلمه الزينه يمكن يحس على دمه ويشوف احوالكم
  3. @aaoatf_trky_2

    مافي شي يحصل لنا في حياتنا عبث
    اجلسي راجعي نفسك وحياتك من الطفوله الى هذا اليوم
    اكيد بتجلسين تحصين كل شي سلبي حصل معك وبتتذكرين الحرمان والخلافات والضيق والمشاكل
    بعد المراجعه والتفكير اسألي نفسك يا ترى وش هي الرساله اللي الله سبحانه وتعالى يبيني افهمها واستوعبها ؟
    اكيد بتلاقين رسايل كثير وحكمه عظيمه لكل أمر
    وعلى رأسها الايمان اللي من اركانه ( الرضى بقضاء الله وقدره خيره وشره )
    انتي محتاجه تدخلين لحياتك القبول
    اقبلي وفاة اهلك واحتسبي الاجر
    اقبلي فراق زوجك واحتسبي الاجر
    اقبلي الظروف الجديده بحلوها ومرها واحتسبي الاجر
    لا تكونين من الناس اللي ينظرون للحياه بعين السخط فينالون السخط
    بالعكس كوني من الناس اللي ينظرون للحياه بعين الرضا والقبول والحمد والشكر
    لا تركزين بالاشياء اللي فاقدتها وما تمتلكينها ولا هي تحت سيطرتك ولا بقدرتك
    بالعكس ركزي في الاشياء اللي تمتلكينها واللي ربي رزقك بها واحمدي الله واشكريه عليها
    والله ان حالك افضل من غيرك
    خذي ورقه وقلم ويومياً اكتبي فيها 30 نعمه وايجابيه في حياتك واستمري في الكتابه لمدة شهر
    ربي رزقك صحه وجسد معافى واطفال اصحاء وسكن يسترك والاكل والشرب متيسر هذي نعم بحد ذاتها عظيمه
    وثقي تمام الثقه لما تغيرين اللي داخلك راح يتغير الخارج وتفتح لك ابواب الخير
    صححي طريقة تفكيرك السوداويه السلبيه المتسخطه واستبدليها بالايجابيه والحمد والشكر والامتنان والرضا والقبول
    اصنعي لنفسك واقع جميل بدون انتظار فلان او فلانه
    لا تنتظرين عطف وشفقه من احد لانك اذا انتي ماحبيتي نفسك وقدرتيها واسعدتيها محد راح يحبك ويسعدك


    الله يشرح صدرك وييسر امرك ويسخر لك ملائكة السماوات وجنود الارض ويسخر لك خيرة خلقه
  4. @sn_sonh

    وليش منهاره وتبين من يقوم فيك لملمي نفسك وخليك قويه قسي قلبك شوي لا تخلينه يضعف ظروفك جت كذا شوفي النعم الي حولك قولي الحمدلله عيالي حولي طيبين وانا طيبه بوسطهم ركزي على النعم الي حولك لا تخلين للشيطان لك مدخل يضعفك او يحزنك
    كلنا عندنا مشاكل وهموم وظروف الله بها عليم وكل البيوت مليانه مشاكل مستحيل مافي بيت خالي منها قوي حالك وقوي دينك وقوي علاقتك بربك بتشوفين الحياه بمنظور ثاني الياس الي انتي منه الزاويه المغلقه الي تشوفينها بتتغير نظرتك منها ليش تدرين ليش لانك قويتي علاقتك بالله علقتي قلبك وجوارحك بس فيه هو ابتلاك ليش يبغاك ترجعين له فقوي علاقتك بالله بترتاحين ان شاءالله

تابعي تجارب أخرى من هذا القسم.