My foot care - عنايتي بأقدامي ✨

~

الحين نجي للمهم الترطططططيب اهم شيء زي ما قلت لكم علشان تكون اقدامنا لونها واحد وفيها لق لقه ازاله الجلد الميت والترطيب غير كذا كلام فاضي مع احترامي للكل

انا شخصيا استخدم مرطبين ابدل بينهم واحد كريم ثققققيل مره والثاني لوشن خفيف

نبداء بالاول اللي استخدمه بشكل يومي 💕

هذا المرطب جدا ظريف وخفيف هو خاص بالارجل اللي متشققه بشكل عام ويوعد المنتج بعد استخدامه مرتين باليوم راح تلقين تغير كبير خلال اسبوع . 👍

رائي عنه انه جمممممميل فعلاً ما كذبوا لاحظت تغير مع انه ماعندي تشققات عميقه بس جدا بسيطه لاني زي ما قلت امشي حافيه بس اللي عميقه ممكن تأخذ مده اطول ، لكن يظل بطل ريحته عاديه وفعلا ع انه خفيف لكن يرطب بجداره ويستحق انك تشترينه .




المكان : بوتس

السعر : 20 - 25 ريال ما اذكر كم بالضبط


~

المرطب الثاني اخذته بالصدفه هو ثقيل جدا جدا تقريبا كانه زبده لكنه كريمي لكن تمتصمه الاقدام بسرعه بجد بجد تمتصه بجداره هو للاقدام واليز شخصيا استعمله للاقدام لان احس ثقيل ع اليد وما تمتصه يدي لكن اقدامي انام اقوم القها
امتصته بجداره انا مااستخدمه يوميا فقط مرتين بالاسبوع بعد التقشير او البودكير .



المكان : ذا فيس شوب

السعر : 50 ريال


~

بعد هالترطيب والتعب ع اقدامنا لازم لازم نلبس شراب ولا كانك يا بو زيد ما غزيت ✌️
ليش طيب للزم شراب علشان يحفظ الترطيب لنا طبعا مو نلبس اي شراب لا لا لا لازم يكون خاص للاقدام قبل النوم ويتوفر بكل مكان اغلب هالشرابات تكون فيها اصلا مرطب فزياده الخير خيرين تتوفر بالصيدليات والسوبر ماركت الكبير وباث اند بودي وركس ، اما الشواب العادي بالعكس يسحب الترطيب يعني بدل نكحلها عميناها .

هذا الشراب جدا جدا مريح وناععععععععم استخدمه بعد الترطيب وانام مو لازم تاخذون زيي لا خذو النوع اللي يريحكم بس لازم يكون خاص للاقدام مو اي شراب




المكان : باث اند بودي وركس

السعر : 45 ريال


~

هذي الاشياء اللي اسويها بشكل يومي و اسبوعي لاقدامي طبعا كلن ينام ع الجانب اللي يريحُ

الحين الاشياء اللي تستخدم كل اسبوعين بتكلم بالسريع عنها اللي هي بودكير للاقدام طبعا يبي له موضوع لحاله وندقق فيه بشكل عام بتكلم عن الاشياء اللي استخدمها معه يعني بتكلم بشكل عام ،

نبداء :

في ناس تحب تستخدم بكربونات الصوديوم لاقدامها وناس ورد وناس تحب تحط نقط من الزيت كلن وذوقه طبعا اقصد ينحط الماء الدافي بالاله انا عن نفسي استخدم ملح خاص من بودي شوب جمممميل يعطيك شعور منعنع لاقدام وينظفها لك ويعطيك شعور مريح حلو كتغير لكن يظل بطل يزيل التعب عن الاقدام ويعطيك شعور مررررريح 💆




المكان : بودي شوب

السعر : 46 ريال


~

بعدها استخدم هالمقشر نفس الشيء منعنع ويقشر تقشير جميل بس حبيت بودي شرب اكثر بس ذا يميزه انه عضوي لكن تقشره جميل جدا وينظف من قلب اكثر من انه يقشر ان شاء الله فهموتوا علي استخدمه فقط مع البودكير



انا اخذته من البحرين بكشك صغير بالستي سنتر فا مدري اذا هو عندنا وما اذكر سعره لانه كان مجموعه لكن الشركه ذي معروفه .


~

مره بالشهر استخدم ذا الاختراع الجميل يخلي رجولك بيبي من جد يخيلها بيبي 😭👏👏

المشكله كل ما ابيه اخذه مخلص رحت اربع مرات مخلص مافيش 😒

طريقه استخدامه تحطين رقم واحد اللي هو الزيت ع ماء دافي وحطي ورجلك ارتاحي لنص ساعه وبعدها نشفي رجلك ثم استخدمي اللوشن اللي هو رقم اثنين والبسي شراب ونامي وبعدها تلقين رجولك بيبي

ذي اخره حبه عندي مراح استخدمها لين ما اشتري احتياط لووووول خايف عليه 😂




المكان : ذا فيس شوب

السعر : 20 ريال


~~
وكذا خلصت موضوعي تعبت تعبت عليه وانتم تستاهلون ❤️

بنات بقول لكم نصيحه الاقدام اهتمي فيها لانها تبين لناس نظافتك ممكن تقولون نبالغ بس تدرون قبل لما يخطبون يركزون بأقدام البنت يشوفون نظيفه ولا والله ما امزح 😂😂😂

المهم صدق تعبت عليه ترا استاهل تقيم لول بس ما ابي انتقادات تقلب هوشه اتقبل كل انتقاد بسعه صدر بس بحدود رجاء تطورنا واللي تحب تسوي عنايتها طبيعه براحتها بس انا احب تكون عمليه لان بصراحه خلاص تطورنا مو لازم اخلط واحط ولا القي شيء كذا اريح واسرع وامتع لنا المهم اهتموا صبايا واللي تبي اتكلم عن اي موضوع تامر امر عاد العيد قرب الله الله 🌞

ماشاء الله تبارك الله - ذكر الله زين 🌚


دعواتكم لي بنات اختباراتي قربت دخولي بيكون قليل ادعوا ربي يوفقني ويسهل على 😔💕

الله يسعدك يا اختي

بخاخ الرجل يدوم فتره طويله؟
اقدر استعمله قبل لبس الجزمه الله يكرمكم؟

مآشآء الله






موضوع رائع طرحتي أشياء مهمه

والله انا وجهي وهو وجهي مره مهملته .. لو رطبته بكريم عيوني تحرقني واحسها يصير فيها زي الضباب بتقولي لا تقربي منها الكريم بقولك هي اكثر منطقه جافه وتعبانه :(

مشكوره موضوعك جميل