كتبت رد لكن للاسف المنتدى كان معلق فانمسح الرد . .

على كل حال الحمد لله الرد كان قصير ممكمن اكتبه تاني بس استسمحكم احط الرد ده الاول ..



معليش اسمحوا لي اخرج عن الرابطه شويه واتكلم في موضوع شخصي بس عزائي انه اكيد يهم كل وحده فينا لان كلنا ممكن في لحظه ما نمر بنفس الظروف وان اختلفت التفاصيل .. والاهم لانكم اكيد تعودتوا على خروجي عن النص وبقى الطبيعي اني اكتب في اي شيء الا الرجيم والاستثناء غير ذلك .. ماعلينا..

اختي زعلانة من الدنيا ..

بقالي ساعتين عاوزه اكتب لك رد بس بأجل معرفش ليه .. يمكن خايفه كلامي ميوصلش صح او يخوني التعبير ولو ان في الف فكرة وفكره بتدور في راسي بخصوصك من امبارح من ساعة ما قرأت القصة ولغايه مانمت وحتى بعد ماصحيت كان اول شيء عملته اني دخلت النت عشان اشوف كاتبة ايه .. للاسف ردك الاخير زادني حيرة لاني حسيت انك حاطه في ثقة كبيرة فخايفه ان كلامي يحبطك مش عارفه .. على كل حال انا هكتب الي هييجي في بالي وباذن الله هيوصلك المطلوب بالظبط وهو الفكرة الكاملة الي تكونت في راسي بعد ماقرأت قصتك كلها .. بس اتمنى انك تقرأي ردي كويس والاهم انك متقرأيهوش وانتي متحفزه لكل حاجه مخالفة لما تعتقديه وتردي عليها في نفسك .. لاه اقرأيه كله على بعضه وحاولي تفهمي وجهة نظري وفكري فيها يمكن هي الصح الي مش واخده بالك منه ..


امبارح وانا بقرأقصتك أو النهرده الصبح بمعنى ادق لاني قريتها ونمت وصحيت من ساعتين بس .. معليش بقالي يومين ليلي نهار ونهاري ليل يمكن لو مش عشان الصلاة مكنتش صحيت .. بس خير ربنا يعدي الايام دي على خير .. المهم قريت قصتك ومقدرتش اروح انام غير لما اقرأ القصة كاملة .. كنت متفاعله مع القصة لاني حاسه اني بعيش احداثها ..قلت لك قبل كده ردود افعالك وتصرفاتك هي نفسها عندي بالظبط .. نفس الاسلوب نفس الطريقة . .انتي حتى في نفس السن .. من نفس المدينة .. ده انا دلوقت لا استبعد اننا كنا زميلات في الجامعه من غير مانعرف .. يمكن كل ده خلاني اتحمس اكتر ارد عليكي يمكن لاني حسيت اني اكتر وحده ممكن اكون فاهمه ظروفك وحاسه باحساسك فمش هتتكبدي جهد انك توصلي لي المطلوب .. بقولك كل ده لاني مع ذلك للاسف مختلفة معاكي جملة وتفصيلا في الطريقة الي عالجتي بيها الموضوع .. وصدقيني انا مفهمتكيش غلط .. انا فهمتك صح وصح جدا وعارفه انك كويسه وبنت حلال وربنا بيقف جنبك وعارفه انك انظلمتي من زوجك لكن للاسف النتيجه الي وصلتي ليها مش هي ابدا الي كنت احب انك توصلي لها ..

بعد ماقرأت قصتك وكونت وجهة نظري عنك وعن زوجك وعرفت مين فيكم الغلطان ومين فيكم صاحب الحق سألت نفسي امال فين المشكلة؟ انتي قلتي انك عاوزه رأيي في شيء بس ملقيتش حاجه اقول رأيي فيها .. قرارك انتي اخذتيه وزوجك رجع لك يعني القرار لاغي .. لما قرأت ردودك على الاخوات وردودهم عليكي هم كمان اكتشفت ان القرار الي فهمت انه اتلغى مش هو القرار الي اتاخذ فعليا . اكتشفت انك عايشه حاليا منتظره الانفصال عن زوجك في اي لحظه مستقبلا والاهم انك باصه لزوجك بصة احتقار يعني حتى لو هو مطلقكيش فانتي مش هتسكتي على كونك زوجه ليه طول العمر ..

ده الي فهمته من قصتك ومن روايتك واسمحي لي احكي لك القصة بطريقتي انا مع العلم اني فهمتها كويس جدا والدليل على كده اني في اللحظه الي قرأت فيها محادثتك الهاتفيه لما قالت لك ان زوجك هو الي كذا وكذا انصدمت صدمه لدرجه اني بعدها بثواني حسيت بانقباض شديد جدا في الرحم وتذكرت تنبيه الدكتور لي بان عندي رحم عصبي وممنوع علي الانفعالات .. واضح اني نسيت نفسي مع القصة لدرجه اني انفعلت جدا مع الاحداث او لنقل الصدمات الي تعرضتي ليها .. كملت قراءة ووصلت للجزء الخاص بعملية والدتك وهنا بصراحه مقدرتش استحمل الالم .. قمت من مكاني وقعدت الف شويه في الغرفة لغايه ماهدأت اعصابي ورجعت اكمل .. انا بقولك كل ده عشان تكوني عارفة ومتاكده اني حاسه بيك وتماما وحاسه بمقدار الظلم الي وقع عليكي ومقدار الصدمه الي يفترض بيك التعايش معها لكن مع كل التعاطف والاحساس ده بقولك انتي تصرفتي غلط تماما وللاسف الي انتي ناويه عليه جريمه مش هتسامحي نفسك عليها العمر كله لا انتي ولا ابناءك ا لي مصيرهم يكبروا ويعرفوا انتي عملتي فيهم ايه ده اذا نفذتي فعلا الي في نيتك ..

تصدقي اكتشفت عنك شيء يمكن متعرفيهوش انتي شخصيا عن نفسك .. وجهة نظرك الشخصية انك انسانه قويه وصبوره وعندك قوة تحمل غير عاديه وكمان شخصية بتقدري تاخذي قراراتك وتتحملي تبعاتها .. بصراحه لن اجادلك في وجهة النظر دي لاني حاسه ان معظمها ان لم تكن كلها صحيحه .. دي تقريبا وجهة نظري عنك برضه .. بس كمان ضيفي لها انك انسانه متدلعه جدا وبطريقه يمكن انتي نفسك تستغربيها .. اكيد هتقولي مش صحيح وانا وانا .. لكن صدقيني صحيح .. انتي مدلعه جدا والدليل على كده تصرفات اهلك حواليكي مش هحكي عنها كتير ارجعي لكلامك واقراي وشوفي . النقطه التانيه الي لازم الفت نظرك ليها انك مخترتيش طريق البيع زي ماهو متهيء لك انتي اخترتي طريق الهروب .. ايوه بالظبط .. واجهتك مشكلة مع زوجك فاقنعتي نفسك انه ميستاهلش وانك خلاص مش عوزاه .. الصحيح انك خفتي من الي حصل وتزلزلتي فقررتي ان اسلم طريقة هي ترك الجمل بما حمل .. ثالث حاجه استنتجتها عنك من خلال كلامك هي انك برغم ذكائك الواضح إلا ان خبرتك في الحياة والناس قليلة جدا بل وتكاد تكون منعدمه .. يمكن ده راجع لسنين طويلة من العزلة الاختياريه الي فرضتيها على نفسك .. للاسف رغم عقلك الكبير إلا انك مش فاهمه الدنيا ولا عارفه الامور في الواقع بتمشي ازاي ..

ونرجع لمشكلتك مع زوجك ..

ايوه انا لو مكانك هفكر كده بالظبط بنفس التفاصيل ..اسيبه في ستين سلامه خليها تشبع بيه واروح اشوف نفسي بقى لاني خساره فيه وفي اهله الباردين الي مش مقدرين الجوهرة الي مع ابنهم .. صدقيني هفكر كده بالظبط .. ولكن في النهايه مش هنفذ الفكرة دي نهائيا هحطها على جنب خالص وهركز كل تفكير في إزاي استرجع زوجي بكل السبل سواء كانت محاولاتي دي لاستعادة حياتي معاه حبا فيه أو حبا في نفسي ..

تعرفي .. كتير ناس بيشتكوا لي من حاجات معينة بينهم وبين ازواجهم .. حتى انا نفسي لما بزعل من زوجي في كل المرات دي سواء بيني وبين زوجي او بين صديقاتي وازواجهم بسمع صوت واضح جدا في وسط القصة .. مش صوت الي بتحكي .. ده صوت الشيطان بيحكي لها .. دائما وابدا .. الاقي نفس النغمه .. انتي صبرتي وضحيتي ووقفتي معاه وهو في النهايه ميستاهلش .. هو ناوي يبيعك بيعي انتي الاول تغدي بيه قبل مايتعشى بيك .. سيبيه وبكرا تاخذي سيد سيده الي يقدرك ويعمل لك الف حساب .. ده حتى لو قرأتي قصص الخيانات الزوجيه اعاذنا الله تلاقي الوحده بتخون زوجها وتقولك اضافة لكل ماسبق منه لله هو السبب هو الي اضطرني لكده لو كان اداني الحب والحنان من الاول مكنتش دورت عليه برا .. شوفي الشيطان لما يتكلم عمره مايتكلم بالعواطف دائما بيكلمك بالعقل ودائما كلامه بمنطق فدائما بيتصدق .. بنصدقه بس للاسف كله غلط في غلط ..

سبحان الله كل الرجاله وقفنا جنبهم وساندناهم ايام الفقر وضحينا وتنازلنا وقبلنا نرتبط باشكالهم الي تسد النفس وفي النهايه سبحان الله كلهم بيقابلونا بنفس الجحود .. كانها وصية بيتناقلوها بينهم وبين بعض .. بس للاسف الحقيقة مش كده بالظبط الحقيقة اننا لما بنزعل او نغضب او تصعب علينا نفسنا بنصدق كل الي عاوزين نصدقه مش الي حاصل فعلا .. حبيبتي انتي مش شهيده .. انتي اتظلمتي الى حد ما .. او لنقل انظلمتي كتير لكن على الجانب الثاني جوزك برضه تحمل كتير .. وكتير جدا ..

مش عاوزه اكون قاسيه معاكي لاني كواحده سمينة عارفه قد ايه سخيف جدا اننا نفتح الجرح ونتكلم عن الطخن وتبعاته .. بس معليش مضطره اكلمك بصراحه او بجاحه يمكن بس عشان يوصلك المطلوب لان واضح ان محدش تاني هيقولك الكلام ده وللاسف لو مقلتوش انتي هتعرفيه لوحدك لو اصريتي على المضي في التجربه الي قررتي تخوضيها وهي الانفصال عن زوجك والبحث عن حياه جديده بدون اي اعباء او مسؤوليات .. وللاسف هيكون الوقت ساعتها متأخر جدا على التراجع يبقى الاحسن تسمعيه مني دلوقت والخيار مازال في يدك ..

هقولك تجربتي .. الخاصه .. وربنا يسامحني ان كان من حقي اتكلم في خصوصياتي انا وزوجي بس يمكن ده يمنع بيت من الخراب .. وزني كان 125 كيلو قبل ماعمل العملية بسنة يمكن او ست اشهر مش فاكره .. طبعا توزيع الدهون عندي غير عندك بدليل انك بتقدري تحملي مع الوزن الزائد بينما انا مستحيل احمل لو وزني زايد بناء عليه فاكيد شكلي في 125 اسوأ بكتير من شكلك في الوزن ده لان الدهون عندي متركزه على منطقة الوسط .. الخلاصة كان وزني زايد وكانت علاقتي بزوجي طبيعية لكن احيانا مكنتش بحس بلهفه منه علي .. ببجاحه كنت عوزاه يبص لي ويتملى مني ويتغزل في جمالي .. من حقي طبعا .. كنت بشوف اني عامله له كل شيء وبحط مكياج وبهتم بلبسي طيب ليه مش بحس انه بيستمتع بالنظر لي زي ماكان بيعمل زمان او زي ماكان نفسي يكون .. مكنتش شايفه ان في حاجه غلط غير اني ( مليانة ) شويه.. المهم خسيت خمسه كيلو برجيم بعدين عملت العملية والحمد والشكر لله نزلت حاجه وعشرين كيلو بعدها .. نزلت عن المية كيلو .. هنا شفت التغيير .. مش هقولك غير اني كنت متصوره صورة بقميص داخلي من الامام والخلف والجنب عشان اقارنها لما وزني ينزل بعد كده .. كنت متصوراها ووزني 121 كيلو .. اتصورت صورة تانيه بوزن 102 كيلو .. قارنت الصورتين .. وانا ببص للصورة الاولى اقسم لك بالله العظيم وبلا مبالغه شعرت برغبه في التقيوء .. قرفت من منظري ومنظر الشحم الي باين من ذراعي وكتفي .. تخيلي اذا انا شخصيا قرفت من نفسي فمابالك بالمسكين الي كان شايف كل ده وساكت ومش معترض .. لاه وبوقاحه متناهية النظير كنت عوزاه كمان يستمتع ويتغزل .. احمد ربنا دلوقت انه متقيأش علي في اي يوم من الايام الي كنت قاعده قدامه فيه بالمنظر ده وهو بيبتسم قال وايه عوزاه يقولي كلمه حب ..

بتقولي ان زوجك وانتي لسه زعلانه منه ببجاحه بيطلب منك حقه الشرعي .. صدقيني اختي ولا اقصد اي اهانة لاني معاك في نفس المركب .. هو فدائي انه بيطلب الحق ده وده دليل دامغ ان الشخص ده مسكين الى اقصى درجه او يائس إلى اقصى درجه انه يطلب حقه ويستمتع بيه رغم انك مش عاوزه تديه له وبرغم انعدام الاغراءات .. الراجل ده شاريكي فوق ماتتصوري ولولا انه بيحبك أو شايل لك شيء من المشاعر فمفيش اي شيء يجبره على انه يحتفظ بيك معاه دقيقه وحده .. كان يكفي جدا ايام لما كان وزنك مقارب للميتين انه يخليكي لرعايه الابناء ويدور هو على حل شعره زي مابيقولوا ومكانش حد ابدا هيلومه وقتها .. كان يقدر يقولك ببجاحه انتي للعيال والخدمه وانا هشوف نفسي .. لكن الحمد لله هو معملش كده .. هو خلاكي للعيال وللخدمه وليه هو كمان ودي نقطه لصالحه اتمنى تفكري فيها كتير قبل ماتاخذي اي قرار تاني ..

للاسف الشيطان تمكن منك في لحظه ضعف .. اقنعك انك خلاص هتخسي وتبقي ملكة جمال بيبي فيس على مانيكان .. ولسه صغيره 32 ده الي في عمرك لسه متجوزوش .. وان كان على العيال هرميهم لابوهم يحتاس بيهم واشوف انا حياتي .. هتتجوزي راجل يحبك ويموت فيكي وسبحان الله هيكون غني ويفسحك في الدنيا كلها .. هتقولي لاه مش مهم غني انا مش عاوزه غير واحد احبه ويحبني ونعيش نعبد ربنا بقية عمرنا .. صدقيني اختي مش هيحصل .. بتقولي انك خايفه تفضلي مع زوجك الحالي لانه مصيره يطلقك في النهايه بس هيكون العمر فات وقتها ومفيش قدامك غير دار المسنين .. هقولك ده كلام الشيطان واضح وبقوة .ضحك عليكي وقلب لك الموازين .. الي هيحصل ان زوجك مش هيطلقك لو كان ناوي يطلق كان طلقك وانتي مش نافعه في شيء لكن النهرده بعد ماقربتي تبقي انسانة طبيعية مغريه وفيها كل الصفات الي تجذب اي راجل تفتكري ممكن يتخلى عنك وهو صبر عليكي لما مكانش قدامك غيره؟

ولو فرضنا جدلا انه ناوي يطلقك فعلا بعد كده وانك هتلحقي نفسك دلوقت وتشوفي غيره .. ولو فرضنا جدلا انك لقيتي زوج تاني مع حالة العنوسه المنتشره والآنسات الي في سنك فعلا مش لاقيين زواج مابالك لو اصبحتي مطلقة .. هنفترض جدلا انك برغم كل ده لقيتي زوج مناسب .. تضمني منين انه مش هيطلقك هو كمان بعد عشره ولا عشرين سنه .. بلاش يطلقك افرضي حبك ومات فيكي ونساكي جوزك وعيالك وكل ايام الضنا والشك الي عشتيها .. تضمني منين انه يعيش معاكي لآخر العمر وميموتش منك في نص السكه ؟ .. تعالي بقى نتكلم لو ده حصل .. هتكوني في عمر متقدم .. مينفعش تتجوزي تاني .. هتروحي تدوري على عيالك .. انسيهم .. انتي بعتيهم وهم صغيرين ورميتيهم لابوهم .. اقل واجب يعملوه انهم يرموكي برضه بنفس المنطق .. انتي رميتي لما كانوا محتاجين لك يبقى هم لازم يرموا لما تكوني انتي محتاجه لهم .. بصراحه لو تطلقتي من زوجك ورميتي له العيال زي مابتقولي هتبقي بتحكمي على نفسك بدار العجزه الي خايفه منها .. مفيش مكان تاني .. لاحظي انك اخترتي تبيعي زوجك الي بينك وبينه عشره وابناء او هو اختار يبيع لا فرق .. المهم ان العشره والحب والكفاح وكل ذكرياتكم المشتركه مكانتش عائق ابدا انها تمنع الي ناوي فيكم يسيب من انه ينفذ بجلده .. تفتكري بقى الغريب الي هتتجوزيه بعد كده هيشتريكي على ايه؟ هيشيل لك ايه ويتمسك بيكي ليه؟ صدقيني لو انتي بايعه النهرده قيراط الغريب الي مفيش بينكم الي بينك وبين ( فلان) دلوقت هيبيع اربعه وعشرين ..

خلاص انتي اتحطيتي بين فكي كماشه .. مفيش مفر .. اخترتي بكامل ارادتك انك تتزوجي ( الممول ) الي انتي على ذمته دلوقت .. وخلفتي عيال .. خلاص قطعتي على نفسك طريق الرجعه معادش ينفع تسيب البيعه كلها كده وتنجي بنفسك .. خلاص انتي شئتي ام ابيتي ارتبطتي بالراجل ده لغايه ماتموتي مفيش قدامك طريق تاني .. هتسيبيه يبقى خذي عيالك معاكي .. متقدريش على نفقتهم يبقى خليكي عاقله واعرفي انك مجبره لا مخيره في بقائك مع الشخص ده ويبقى الشطاره بقى انك تقنعي نفسك انك معاه باختيارك وانك بتحبيه برغم كل شيء عشان المركب تمشي .. واعتقد مش هتلاقي صعوبه في الموضوع ده ابدا لان باعتراف الشيطان لك انك كنتي مخدوعه طول السنين دي كلها وبتحبي شخص ميستاهلش ـ على كلامه ـ حبك ده .. يبقى خلاص بسيطه تاهت ولقيناها .. هتحبيه تاني رغم انه ميستاهلش ومش هتاخذي بالك ابدا من الحكايه دي ..

نيجي لموضوع خيانة زوجك .. هقولك حاجه تساعدك شويه على انك تتقبليها .. مش يمكن الراجل ده مخانكيش فعلا؟ انا بميل لتصديق الروايه دي لعده اسباب .. اولا ممكن البنت نصبت عليكي وكذبت في كلامها بالظبط زي ماانتي كذبتي عشان تحرقي دمها .. لاحظي ان اتصالها بيه في وقت متاخر ممكن يكون مؤشر قوي جدا لتعمدها انها تكشف العلاقه الي بينهم .. لو هي فعلا على نياتها مكانتش اتصلت في الوقت ده ابدا .. خاصه لما كنسل لها كذا مرة .. دي وحده تعمدت تفضحه لما حست انه بيكنسل عشان جنبه حد ..قالت كويس العب لعبتي والكل يعرف بعلاقتنا عشان تنتقل للخطوة التانيه ..

خلينا نقول ان البنت دي مجرد بنت عرفها من النت او الماسنجر وعاش معاها قصة حب وهمية .. ومتزعليش مني زوجك الى حد ما معذور .. راجل عايش في بلد غريب ولوحده زوجته مش ممتعاه ولا مدياله الاحساس الي مفتقده .. الى حد ما معذور لو فكر يجرب طعم الحب بره والشيطان شاطر .. لاحظي اني بقول كل ده على افتراض ان جوزك مغلطش ومرتكبش الزنا سواء مع دي او مع غيرها .. والحمد لله لغايه دلوقت مفيش عندنا اي دليل انه عمل كده .. ولو حتى عمل وبما اننا منعرفش هنفترض انه تاب وفي الحاله دي حسابه عند ربنا مش عندنا .. ملناش غير بالظاهر والظاهر إلى الآن بيقول انه معملش حتى هو بينكر فخلينا ناخذ ابسط الامور انه معملش ونبني حكمنا على كده ..

السبب الثاني الي بيخليني اصدق ان الي بينه وبين البنت دي مجرد علاقه عابره وانها هي القصة الوحيده في حياته وأن مفيش بنات في استراحه ولا كلام فاضي .. هو وصفك لمنظره لما جالك في المستشفى .. الوزن الفظيع الي نزله والاعياء الي باديء عليه .. يابنتي دي ردود افعال واحد مبتديء .. عمل عمله في نظره انها سوده وهي علاقته بالبنت دي ولما انكشف امره احتاس وشال الهم ومبقاش عارف يتصرف ازاي .. شال الهم لدرجه ان وزنه نزل واتبهدل بالشكل ده .. لو ان زوجك محترف خيانات زي مالبنت دي حبت تصور لك مكانش ده بقى حاله ابدا .. كان زمانه ولا اهتم ولا اهتزت فيه شعره لكن كونه يتزلزل بالشكل .. مكانش اصلا هيحس انه عمل حاجه غلط .. ده شغل المحترفين .. اما رد فعل زوجك يدل الى حد كبير على ان دي اول مرة يعملها ومهوش عارف يتصرف ازاي او يصرف الموضوع فين ..

ده انا حتى بفكر احيانا ان زوجك كذب الكذبه وصدقها واستمتع بفكرتك عنه انه مقطع السمكه وديلها وعشان كده مش راضي يريحك وعمال يخترع قصص عن علاقته بالبنت دي .. عاوزك تبقي شاكه على طول .. عجبه الدور الي حطيتيه فيه .. الراجل النمس الي مدوخ مراته ومش عارفه تمسك عليه شيء .. لو فرضنا ان التحليل ده صحيح يبقى فعلا جوزك لخمه وميعرفش ستات غيرك .. يجوز ولا لأ؟

يبقى كده الي حصل انك كبرتي الموضوع جدا .. واحد بيكلم وحده في التليفون .. انا لو مكانك هموت فيها .. بس هخاصمه يومين واحط شروط والموضوع ينتهي على كده .. لكن اهدم بيتي واشرد عيالي .. لاه لازم وقفه .. انتي عارفه الرسول عليه الصلاة والسلام بيقول ايه؟ بيقول ان الشيطان لعنة الله عليه بيكون جالس على عرشه ويأتيه خدمه من الشياطين الصغار .. الي لسه تحت التمرين .. يعرضوا عليه اليوميه وعملوا ايه في الدنيا والناس .. يقوله الاول انا فضلت ورا فلان حتى شرب الخمر .. يقوله الشيطان الكبير الحكيم .. ما اتيت بشيء .. يعني معملتش حاجه ايه يعني شرب خمر .. ييجي الشيطان التاني فرحان بانه عمل حاجه ( انقح ) من الاولاني يقوله وانا مازلت بفلان حتى زنى .. يقوله ما اتيت بشيء .. ايه يعني زنى مش حاجه اوي يعني ان الشيطان يوسوس بيها لبني آدم .. شوفي ده كلام الشيطان الكبير الخبير الي فاهم الدنيا وفهماه .. الزنا جريمه لا تغتفر لكن في عرف الشيطان ومن وجهة نظره في جريمه تانيه اكبر يفرح بيها اكتر .. ييجي الثالث يقوله مازلت بفلان حتى طلق زوجته .. فيهش الشيطان ويبش وتنفرج اسارييه ويقوله هو ذاك .. هو ذاك .. ثم يقربه اليه .. يعني يقول للي وسوس لغايه ماخرب بيت برافوا عليك انت الفت البت النت .. انت الي عملت الي محدش يعمله ويخليه من كبار الشيطان الي عملت الي محدش يقدر عليه ..

ده كلام سيد الخلق عليه السلام مش كلامي .. عشان تعرفي بس مين الي جريمته اكبر .. الي شرب ولا الي زنا ولا الي خرب بيت وشرد ابناء .. خراب البيوت مش بالساهل ابدا وربنا سبحان وتعالى مسمي الي بينك وبين زوجك بالميثاق الغليظ .. تخيلي انك لو تطلقتي فعرش الرحمن هيهتز .. شوفي انتي لما زعلتي من زوجك امك فقدت اصبعين شوفي لما ربنا بجلاله وعظمته ينزعج من طلاقك .. دي ملهاش حساب ؟ عشان بس تعرفي حجم الجريمه الي انتي مقدمه عليها ..

مجمل كلامي ليكي اني مش هقولك اخزي الشيطان واستهدي بالله وارجعي لزوجك زي الاول وبس .. لاه انا هقولك اعقلي واياكي ثم اياكي تفكري مجرد تفكير ولو بينك وبين نفسك انك تتطلقي وتتزوجي شخص تاني .. مستحيل ومش هيحصل .. هتقولي خانني هقولك مفيش دليل .. هتقولي فقدت احترامي له ومقدرش اعيش مع شخص مبحبوش هقولك ليه مش محترماه ؟ ده واحد بقاله سنين متغرب وشقيان عشان يفتح بيت .. بيوفر لك كل طلباتك انتي وابناءك ومدخلهم المدارس الي نفسك فيها وبيصرف عليهم بالبذخ الي انتي مش قادره عليه.. هاتي لي كام واحد النهرده في مصر عنده استعداد يفتح بيت ويصرف ويعيش ست بعيالها من غير ماتشتغل ولا يطلب منها شيء .. صدقيني نسبتهم كل يوم في تقلص واحتمال ينقرضوا قريب .. متقوليش انه في المقابل انتي عامله ومسويه.. انا لي صديقه متزوجه زميل لها في العمل وراتبهم هم الاثنين كبير .. هي مسؤوله عن التنظيف والترتيب والمذاكره للابناء كل ده بعد ماترجع من نفس الشغل الي جوزها راجع منه .. ولو قصرت في العمل المنزلي بيشتمها ويهزأها وبيضربها كمان .. لاحظي ضرب مش الي بنضرب بيه عيالنا .. ضرب من الي بيسيب عاهة مستديمه .. فوق كل ده هو بياخذ راتبها بالكامل وبخيل ومش بيديلها شيء من الفلوس سواء فلوسه او فلوسها لها عنده الاكل والشرب بس في اضيق الحدود وباقل الامكانيات .. وياويلها لو فتحت بقها وقالت له راتبي .. الضرب والاهانة مصيرها ورافض الطلاق ومهددها لو تركته هياخذ منها الاولاد ..برغم كل ده هي صابره ومحتسبه وتقول بس عشان اولادي مش هقدر اسيبه .. وربنا يتولاها .. تخيلي لو انك مكانها كنتي هتعملي ايه ؟

صدقيني كلنا بتيجي لنا اوقات نقول ان ازواجنا دول ميستاهلوناش .. وسبحان الله يمكن في اللحظه الي قبلها مباشره نكون بنقول العكس وان ازواجنا خسارة فينا وان ازاي ربنا اكرمنا بكل الكرم ده .. احنا كستات كده .. دي طبيعتنا ودي تركيبه في الجينات والهرمونات اننا متقلبات فيا لمزاج والحكم .. امال ليه قالوا عننا ناقصات عقل ودين ؟ .. لما ييجي لك الشعور ان زوجك اقل منك وانك افضل وانه ميستاهلكيش فكري في فلانة وعلانه الي احلى منك الف مرة واذكى الف واغنى الف ومع ذلك حظها في الحياه اسوأ بثلاثين الف .. شوفي حواليكي هتلاقي مليون نموذج .. من صاحباتك من قريباتك من حتى الممثلات او المشاهير .. هتلاقي في ناس منجيش نصفهم في الامكانيات او حتى الشخصية او او .. ولو حسبناها بالارقام كان المفروض يكونوا اضعافنا في السعاده وومع ذلك هتلاقي انك بتقفلي بيتك عليكي كل يوم وعيالك جنبك وجوزك جوا ( بيشخر ) صوته مونس البيت بينما فلانة دي مشرده في الاقسام بتحاول تحصل على طلاق من زوجها أو قاعده تضمد جرح من خناقة لسه منتهيه طازه مع الي يفترض يكون بينها وبينه ( موده ) و ( رحمه ) .


يبقى لما ييجي لك الشعور بانك ( خساره ) في الي ميتسماش يبقى مش معنى كده انك كده فعلا .. ده كلام الشيطان بس المشكلة ان صوته بيبقى عالي شويه وهو بيتكلم ..متصدقيش الشعور ده ومتنساقيش وراءه..

واوعي تقرني شعورك بان زوجك تحت وانك راضيه بيه انك بكده كمان تحت او قليله .. بالعكس ..لو لم تكوني انسانه مميزه وتستحقي كل خير مكانش بقى ده زوجك .. انتي ممتازه ومتميزه وكل يوم بعد التاني هترد ثقتك في نفسك اكتر يبقى كل ماانا اطلع فوق وتزيد اسهمي في الحياه كل ماازداد تمسك بزوجي مش اتكبر عليه واقول اني استحق من هو خير منه .. انتي زوجته واذا ربنا رفع فيكي يبقى عشان هو يستحق زوجه فوق فمتحاوليش تبخسي الي ربنا بيسعى لرفعه ..

في كل مرة تشوفي في زوجك عيب يخليه ينزل من نظرك او تحتقريه فكري في ( الآخر ) الي ممكن ترتبطي بيه تضمني منين ميكونش فيه نفس العيب ويمكن اكبر كمان .. عارفه نكته الصعيدي الي باع التلفزيون واشترى بثمنه فيديو؟ اهو كل ماشفتي في جوزك عيب فده لاننا دائما بطبيعتنا كبشر بندور على الي ناقصنا ونحاول نكمله فانتي بتشوفي ايه ناقص زوجك وبتحسي ان العيب ده قاتل وان حياتك مش هتمشي من غير اصلاحه بينما الواقع ان حياتك كامله في جوانب تانيه كتير وان للاسف لو تركتي زوجك سواء بعد كده ارتبطتي بشخص تاني يكمل النقص الي مش موجود في زوجك أو مرتبطتيش هتبقي في الحقيقة اشتريتي الفيديو بس لكن للاسف مش هيكون له اي لازمه او اعتبار لانك خلاص بعتي التلفزيون ..

طيب نيجي للنقطه الاخيره وهي ماذا لو كان زوجك مبيت النيه للغدر وناوي لك على نيه زي مابتقولي .. يبقى هنا بقى تظهر الشخصيه القويه بجد وهنا لازم تطلعي معدنك الحقيقي .. انتي كده في تحدي يبقى لازم تكوني قده .. قولي بينك وبين نفسك في وحده عاوزه تخطف زوجي مني لكن لاه .. البيت الي انا شقيت عشان اعمله واعيش فيه لازم يفضل مفتوح ولازم يكون مفتوح بحسي انا مش حس وحده تانيه ..

انتي عملتي الخطوة الاولى والصحيحه في مشوارك لاستعاده بيتك وهي انك خفضتي وزنك .. وزنك الي كان واخدك وبيجري على الموت .. الحمد لله انتي قطعتي شوط كبير وباقي لك جزء وتكوني على حافة الامان .. خفضي وزنك .. اهتمي بنفسك وبيتك اوعي في يوم زوجك يشوفه مش نظيف .. جوزك بيرجع يومين في الاسبوع خليه يعيش شهريار في اليومين دول .. هتقولي مش قادره .. هقولك انتي حاولتي عشان تعرفي ؟ جربي بعدين احكمي ..

فكري دائما في زوجك بطريقة ايجابيه متفكريش في عيوبه ابدا .. فكري في مميزاته .. شوفي حنانه مع ابنائه شوفي مش بيستخسر فيهم شيء ازاي .. متقوليش اصله كذا وكذا .. ملناش دخل بالاسباب شوفي التصرفات .. تخيلي لو ان زوجه اب جاءت وشغلت عيالك خدامين عندها؟ تخيلي لو انها قالت له مش عاوزه العيال دول عندي فقالك خذيهم وانا هصرف عليهم .. هتوديهم فين لو كنتي تزوجتي بعد كده وزوجك رافض وجودهم؟ هتوزعيهم على الملاجيء ولا يشتغلوا خدامين في بيوت اقاربهم؟ يبقى المركب لازم تمشي ..ولازم القبطان يكون راضي عنك عشان تضمني بقائك في المركب دي كسيده المركب الاولى والوحيده مش مجرد حاجه على الهامش ..وكل ماشفتي في زوجك عيب واضح وصريح فتذكري ان احيانا من كتر الثوب ماهو ابيض البقع السوده بتبان فيه .

طبعا هيطلع الشيطان ويقولك ليه يعني وهو كان مين انخان وانذل واسكت وكمان عوزاني اتودد له واحبه؟ هقولك للاسف احنا مش هنغير مجتمع ولا هنحط اسسس من اول وجديد .. للاسف الشديد ده الواقع الي لازم تتقبليه .. وسواء رضيتي او لم ترضي هو الي هيحصل .. انتي مجبرة انك تبقي مع زوجك عشان ابناءك وعشان برضه هو مش وحش للدرجه الي تغصبك تهدمي بيتك على الي فيه .. يبقى الشطاره بقى انك تشوفي اسلم الطرق عشان تاخذي عقل زوجك وترجعيه يحبك زي زمان او حتى يحبك من اول وجديد وميشوفش اي ست تانيه فيا لدنيا غيرك .. وصدقيني الهدف الي بتسعي ليه ان بيتك يفضل مفتوح وعيالك تتربى بين ابوهم وامهم يستاهل كل ده انك تكافحي وتفحري في الصخر باظافرك كمان عشان توصلي له ..


اوعي تفتكري ان الحياة الزوجية اما سعاده او شقاء وان في ناس مبسوطين في حياتهم وربنا موفقهم في ازواج كويسين وفي ناس العكس .. الحياه مش كده ابدا .. كل شخص فيه الخير والشر وكل حياه فيها السعاده والشقاء .. يبقى متجزعيش ابدا لما زوجك يظهر جانبه المظلم فجأه ومتخافيش لما تلاقي نفسك عايشه في خضم يوم من ايام الشقاء .. شطارتك انك تخلي اليوم ده يعدي باقل الخسائر متسلحه بذكرياتك عن ايامك التانيه الحلوة والي اكيد هتلاقي منها في ذاكرتك كتير ..


مش هقول غير ربنا معاكي يهديكي للصواب ويبعد عنك الشيطان الي خلاص قرب ياخذ غرضه منك .. ربنا يخزيه ويرده خايب زي ماجاء .. بعتذر لك لو كلامي كان فيه شيء من الجرأه او ضايقك لكن انتي طلبتي رأيي ولاني اعتزيت بيك جدا سواء لما قريت قصتك وحسيت قد ايه انتي كافحتي ومازلتي أو سواء لرأيك الشخصي في والي اخجلني ومش عارفه اشكرك عليه ازاي .. وأكيد لاحساسي ان عندي كلمه عاوزه اقولها ومقدرش اني اسكت من غير ماوصلهالك يمكن يكون فيها انقاذ لبيت فيه اسرة واطفال .. ارجوكي متزعليش مني واتمنى انك تفكري في كلامي كويس جدا .. وعلى قولة المثل يابخت من بكاني وبكي علي ولا ايه؟

بما اني فاضيه اعيد الرد الي انمسح تاني .. توكلنا على الله..

زووف ..
الف مبروك العملية فرحت اوي لما لقيت لي اخوات كتير من الرضاعه بدأت عمليتنا تنتشر كالنار في الهشيم ومش بعيد بعد كام سنة نغير اسم الرابطه ونخليها رابطه المتدبسات ونذل الكام وحده الي ينعدوا على الاسابع الي هيكونوا رابطين وقتها .. اخيرا جاء الوقت نبقى اغلبية .. بس ادعوا لي اكون لسه عايشه وقتها ..

( بمد إيدي آكل حته خبز بجبن ) ..


عسوله ..
مالك يابنتي حاسه ان اخبارك مش تمام من يومين .. بتقولي في حاجه حصلت هتغير مجرى حياتك .. خير؟

كوكيتا ..
الله يبارك فيك يارب .. منوره الرابطه وبجد لك وحشه ياوحشه

متحمسه..
مفهمتش كلامك عن امينة رزق .. بصراحه فهمت بس بقول ارجوا اني اكون فهمت غلط .. لاه انا فهمت غلط مش كده؟

بنت الكبيسي ..
ههههههههههه وضحكت عليكي ياحلوة .. تعيشي وتاخذي غيرها .. طبعا اكيد انتي دلوقت عملتي العملية خلاص والالم في كل حته من كتره مش عارفه الضرب جاي منين .. بس خلاص ياحلوة الفاس وقع في الراس هتعملي ايه .. معليش متبصيش تحت رجلك وعزائك الوحيد ان بعد ثلاث شهور باذن الله من دلوقت هتحبي نفسك اوي بس اوعي تبوسي نفسك في المرايه لما تبصي لها ساعتها..

توته البنوته ..
معليش مش بايدي ياولدي .. اربعه وعشرين ساعه آكل .. صحيح في 12 ساعه منهم بستفرغ لااكل بس على مين .. باكل واستفرغ ثم اكل واستفرغ إلى ان يقضي الله امرا كان مفعولا وآكل ومستفرغش وساعتها بقى بنزل في الاكل مبرحمش.. يابنتي انا باكل طفاسه تخيلي الواح من الشوكلاته .. آيسكريم ولازم يكون حجم عائلي .. انا باكل انتقام .. تسع شهور وانا ماسكه على نفسي من حقي افك شويه .. بس المشكلة ان الحاله دي جات لي زمان وفقت منها لقيتني 125 ربنا يستر بس خايفه اروح انوزن .. اقولك .. ادعي لي ..

السلام عليكم ورحمه الله وبركاته

حبيبتي ام عتريسه
مش عارفه فعلا اقولك ايه...قريت كلامك كله حرف حرف واعدت القراءه مره واتنين وتلاته..
ومش هااكابر واكدب عليكي.......كنت باتمني فعلا اني الاقي ان جوزي مظلوم واني انا اتخدعت او اتسرعت او ان البنت دي عملت تمثيليه علي.......فعلا كنت اتمني من كل قلبي.
لا واقولك الاكتر من كده...........انا كتير باندم اني عرفت العلاقه دي وباتمني لو اني ماكنتش عرفت حاجه اهه علي الاقل كنت مبسوطه اكتر من دلوقتي بكتير..........

في تفاصيل كتير مااتقالتش وخلي بالك انا مش باحاول اني الاقي تهم الصقها بيه........لا والله لاني فعلا في ناااااار...ومش هااكون سعيده ابدا بيها

علي فكره جوزي مكانش عمر الشريف يعني لا والله اولا وزنه كان 145 كيلو وطوال عشر سنين جواز محاولش انه يغير شكله ماغيروش غير لما عرف واحده تانيه..........يبقي مين اللي كان فدائي
يعني هو لما نزل وخاسس مكانش من الفكر ولا من الهم اللي شاله لا كان علشان يعجب الله اعلم بقي مين وكام واحده بالظبط............
بس اقولك علي حاجه بسيطه ولو اني مش عاوزه ادخل في تفاصيل الموضوع تاني........
في نفس الوقت اللي كان هو فيه هنا وقبل سماعي للمكالمه بكام يوم قالي ان معاه في الشغل جابو بنات كتير.........وانهم مايعرفوش انه نزل اجازه لا يعرفوا انه في ماموريه.........صدقته طبعا ومجاش في بالي ابدا انه بيقول كده تحسبا لو اي واحده اتصلت وانا رديت عليها مثلا.......

وعلي ليسته الاسماء في موبايله لقيت اسماء 4بنات مااهتمتش بالعكس قلت لنفسي اكيد دول معاه في الشغل.......حتي لما كنت بادور علي اسم البنت مااهتمتش اني اقف عند اسم اي واحده غيرها.....
بس الاسماء كنت حفظاها في راسي........

وقبل المكالمه دي بيومين بالظبط.......انا كنت عارفه الباسوورد بتاعته وفتحت الايميل بتاعه اطمن ...
لقيت اوف لاين ماسيدج مكتوب فيها(خير يا حبيبي 002ده رقم مصر وانت قلتلي انك رايح الامارات)

دعبست في الموبايل علي المكالمات الصادره والوارده لان معني الرقم ان في اتصال حصل.......ولقيت في تقرير بتسليم رساله الي واحده هي نفس الاسم اللي علي الميل ومش اسم صاحبه المكالمه......

وفي نفس اليوم ده لقيت ايميل جايله من احدي المواقع ......مش عارفه بس حاسه اني مش لازم اتكلم بالتفصيل هنا في الرابطه.......

عموما في تفاصيل كتير جدااااااااااا ماتعرفيهاش
اولا :مش هااقولك اتحملت فقره وتعبت معاه وعملت وخليت..........كل واحد بتستحمل مع جوزها
بس هااقولك اني شفت من اهله اساءه معامله واهانات مش ممكن واحد تشوفها واستحملتها سنين وسنين علشان حبي ليه............وهو كان سلبي لابعد الحدود

ولا هااقولك انهم قاطعوني وانا طبعا قاطعتهم من سنين..........بس هااقولك اني كنت في المستشفي ايام كتيره وليلي وشهور ومفيش حد منهم فكر انه يبص علي او حتي يسال بالتليفون علي عيالي......ومع ذلك كنت باحاول ادوس علي كل ده واتودد له وماحسسوش ابداااااا باني زعلانه من اهله بالعكس كنت باعوض بعدي عن اهلله وبعدهم عني بحبي ليه واغمره بحنان يمكن عمره ماشافه مني قبل كده.........
لا وفي نفس الوقت اللي هم مش بيسالوا عني كان هو غرقان في الحب مع واحده تانيه وانا باموت في المستشفي واولاده متيتمين اب وام من غير ذنب..........

علي فكره ام عتريسه مش عارفه هاتفتكريني ولا لاء انا بنت طنطا الي اتكلمت معاكي من سنتين لو تفتكري وكان يومها اهله هاينني وطردوني من البيت.........وكان كل كلامي معاكي محوره حاجه واحده

اننا بنحب بعض بس اهلله بيبوظا عيشتنا..........ولما اخته هانتني في بيتهم وبعدين جات عندي في البيت وكان هو هايسافر تاني يوم وجيت علي نفسي وبوست راسها علشان خاطره وعلشان يسافر وهو مرتاح..............ودي النتيجه الحتميه لكل اللي كان بيحصل

انا بس ماكنتش فاهمه وقتها كان متهيالي ان حبنا هو اقوي شئ في الوجود ماكنتش اعرف ان رضاه علي اهانه اهله لي هو اول خطوه في اللي احنا فيه.........

علي فكره كلامي مش مترتب يمكن لاني متوتره لاني بجد لما بافتح الموضوع ده باعيش كل تفاصيله وكانه حالا

طبعا هو الف اكتر من قصه عن علاقته بالبنت دي.........ويمكن انا مصدقه لحد كبير انها الفت حكايه البنات والاستراحه علشان تحرق دمي علي رايك........

بس المحير في الموضوع هو اخر قصه الفها عنها لما جه المستشفي علشان ارجع علي البيت......انها اصلا كانت صاحبه زميله وكانت بينهم علاقه بالتليفون وصديقه ده حب يخلع منها بس هي بتطارده في كل حته فلجا ليه بشهامته المعروفه علشان يتدخل ويرمي شباكه عليها يوقعها في حبه وبعدين يسجلولها المكالمات وكده يبقي زميله مسك عليها زله يقدر يكسر غينها بيها لو كلمته
..........................صديقه مسيحي.............بالزمه ده كلاااام يصدقه عقل؟؟؟؟؟؟؟؟؟؟؟؟مع العلم انه عاااااااااااقل جدا وله هيبه شديد
ولما سالته وقتها مين(ن)اللي كانت علي الايميل قالي اختها
ومين(ع)اللي اسمها علي الموبايل قال زميله اختها في الجامعه
ومين فلانه وعلانه.....................اصحابها
طيب ليه ارقامهم معاك وليه في اتصال ورسايل وشات بينكم لو الامر كده فعلا يقول علشان كنت ساعات باطمن بس عليها...............بزمتك في واحده تصدق الكلام ده

اوعي تفتكري اني سعيده باللي حصل
ولا سعيده باني ضعفت عن تنفيذ قراري في الوقت اللي اخدته فيه برده كنت هابقي مرتاحه اكتر من دلوقتي بكتير
ولا سعيده بوجودي هنا بشكل مؤقت .........ولا سعيده باي شئ لا والله العظيم
سيبك من اني اعيش مع واحد مابحبوش ومش بيحبني
بس الاحترام ولو جيت علي نفسي وتعايشت معاه ومش مهم احتراه ولا حاجه طيب ازاي بس اقدر اربي ولادي زي مااتربيت علي احترام الاب اللي المفروض انه المثل الاعلي..........

مش عارفه اقولك ايه بس انا بجد تعبانه جدااااااااا وكل يوم باتمني وبادعي ربنا ان اجل واحد فينا ينتهي قبل مااكتشف او اقرر او اعمل اي حاجه............

انا فعلا مش عارفه اكتب دلوقتي حاجه مش شايفه الحروف اصلا بس حبيت اشكرك علي اهتمامك ومتابعتك سلام مؤقت

أم عتريسة
أكيد فهمتيني غلط . لأني والله أمزح , ومزحي هذا ما أخذت منه درس لأنه موديني ببلاوي ويخلي الناس يفهموني غلط دائما , وأنا والله ألبي زي البفتة البيضا
تيجو أدخل معاكم اللوكايشن وأبأى مين ....... أبأى مين ......؟ أبأى نشوى
حبيبتي أم عتريسة وزعلانه من الدنيا والله أحبكم موت , واعذروني محشورة بينكم أقرى حواراتكم حرفا حرفا

ممكن اعرف كم تكلفه العمليه واحسن طبيب يسويها في الرياض طبعا م خاص ؟؟؟