:) الله اسلمك يا امولة

اريام الله اسلمك حبيبتى ومشكورة على مشاعرك الطيبة وربى يجمعنا فى القريب مع امواج ومنفقدوها

ياريت تقولولى كيف حالها وشنى اخبارها

السلام عليكم ورحمة الله وبركاته
كيف حالكم كلكم يا بنات

مرحبتين سلفيه الحمد لله على السلامه ,,,
نورتى كندا
كيف حال الصغار وكيف حال البنوته الجديده ؟
ان شاء الله ما اتعبتوش غادى
وكيف حال الاهل فى ليبيا وعائلة زوجك كيف اخبارهم ان شاء الله صابرين ؟
وانتِ شنو صار فيك وان شاء الله صحتك تمام وكل شيئ ماشى اكويس
ان شاء الله انكلمك اليوم وانهدرز عليك

يا بنات كلمت امواج وحالها باهى افضل من قبل واتسلم عليكن كلكن وقالت توا اتحاول اتخش واتهدرز
المهم هى يوم هكى ويوم هكى من الوحم بس على العموم افضل من قبل
ان شاء الله ربى يخفف عليها ويسهل امورها

امشيمشه
الف لا باس عليك ان شاء الله
معليش الحمل ديمه هكى متعب ايجوك ايام باهيه وايام مش ولابد
والسفر متعب ,,
حتى انا ثانى يوم فى الرحله تعبت وخربت عليهم الطلوع ومن العشيه رقدت لثانى يوم الصبح وما نندريش على الصغار وبوهم شنو داروا بس ثانى يوم نضت ناشطه وحالى باهى
بس السفر بالسياره دوخنى اشوى خصوصا المسافه حوالى ست ساعات واشويه فى الطريق ...
تعرفى قرمناكم فى الطريق لما خطمنا على كينجستون قلنا ياريتكم فيها راهو هدرزنا عليكم اشوى
وخطمنا على الالف جزيره قلنا اكيد امشيتولها لما كنتوا بحذاها
زعما شنو فيها كان زرتيها احكيلنا عليها ...

وان شاء الله اليوم حالك افضل والصغار باهيين ..

ليبيه
تمشى واتجى بالسلامه ان شاء الله
وسلمى على بنغازى واهلها كلهم
والله حتى انا مستاحشه لاهلى وخصوصاً بعد رجعة بوى من السفر خاطرى نمشى
لكن بسبب الحمل ما نقدرش توا
ان شاء الله نطمنوا عليك وتوصلو بأمان ...

عيونى وينك ؟
امس كلمتك ما هناش
ان شاء الله سمعتى اخبار عن القبول
فرحينا ...
ربى يسخر لك الخير فى طريقك ويبعد عنك السوء ..

وسطيه
كيف حالك وحال اوليدك ؟
شنو اخباركم ؟
بالك الويك اند انديروا زياره للندن مرات نتلاقوا كان مازلتوا تلتموا يوم الجمعه ...

ام تقى
اكيد يا اما مشغوله بالسفر او سافرتى
خليتى مكانك وكلامك اللى ايخش الخاطر
طريقك زينه واميسره ان شاء الله

حياه
ان شاء الله حالك افضل توا وامك حالها اكويس
وخيرك امكسده قبل كنتِ انويشطه ما شاء الله
هيا يا حبوبه ارجعى زى زمان

ليبيا قلبى
طمنينا شنو صار فى بنت اختك ان شاء الله تحليلها اكويس
ربى يفرحكم بيها وتطلع سليمه مكتمله النمو الجسدى والعقلى ...

مدام على
ماشاء الله فالحه ربى يحفظ لك ايدياتك
ورينا شغلك هنا فى التجمع كان تقدرى

اريام
كيف حالك وكيف الاولاد وجو هولندا معكم ؟

كوكم
شنو اخبار موريتانيا ؟
ومعليش كلنا كيفك اتجينا ايام نشتاقوا وايام انحاولوا ننسوا غربتنا
هى الغربه هكى كر وفر زى ما ايقولوا
وان شاء الله كله بأجره ...
انا نعتبر فى الغربه جهاد لأنها بالفعل جهاد على الفراق وجهاد لشهوات النفس اللى الواحد ايحاول فيها طاعة ربه رغم كل المغريات ...
ان شاء الله اتزورى البلاد قريب وتشوفى اهلك

امل
شنو اخبارك
ما شاء الله كلكم امسافرات للبلاد
ربى يوصلكن بالسلامه .
ما قعدت غير انا وامواج شكلنا
الله كريم ...

اطفالى حياتى
كيف حالك وحال الصغار ؟
وعلى رأيك لازم نستنوا نين يرقدوا وألا انخشوا للنت كان هم فى المدارس ...
ربى يسهل امور الكل ان شاء الله

نجمه
استعيذى بالله من الشيطان وان شاء الله ربى يسهل امورك ويشرح صدرك
وكيف ما قلت ضيقة الخلوق كلنا انمروا بيها
وهذه الدنيا ما حد خالى
بس المهم الواحد يلجأ لربه ويدعيله انه يسهل امره وكل شيئ يسهل ان شاء الله

ام الاء
كيف حالك مش عطيتك لوحة مفاتيح عربيه حاولى تستعمليها وألا ديروا حل لكمبيوتركم بيش تكتبى بالعربى ...

باقى البنات أن شاء الله اخباركم اكويسه وحالكم باهى ...

بدايه ونهايه
ربى يسهل اموركم فى ليبيا
بس ننصحك ما تمشوش ألا وعقد العمل عندكم جاهز واموركم الماديه مستقره
وخصوصا لو عقدكم مع جهه عامه (الدوله )لازم كل شيئ يكون موثق قبل ما تمشوا لليبيا
لأن الشئون الماليه تأخذ وقت طويل والروتين الادارى عندنا للاسف يمشى على اقل من مهله (هذا لو الجهه عامه يعنى مع الدوله تحديداً لو عقدكم مع الصحه أو التعليم )

بس لو كان عقدكم مع جهه خاصه او شركه فأموركم حتكون افضل وتتم بسرعه ...

بما انك ماشيه لطرابلس خلى فى اعتبارك ان الايجارات حتكون غاليه مقارنه بالمدن الثانيه ألا لو الجهه اللى حتتعاقدوا معها حتوفر لكم السكن ...
بالنسبه لتوفر المواد الغذائيه والملابس والاحتياجات حتلاقوا كل شيئ والتسعيره تختلف على حسب الجوده ...
المواصلات ايضا طرابلس الاسعار اغلى من المدن الثانيه خصوصا سيارات الاجره
لكن يوجد ركوبه (الميكروباص)وهذه بربع دينار يمكنكم استخدامها بس حتكون متعبه لو معك اطفال ويجروا بسرعه جنونيه..
فيه ايضا سيارات خاصه اصحابها بيستخدموها سيارات اجره
بس هذول خلى بالك قبل ما تركبوا اتفقوا معهم على الثمن وفى الغالب بيرضوا بالعرض اللى تقوليلهم عليه

على وجه العموم الليبيين شعب طيب وكريم الاخلاق ويقدروا حسن المعامله والاخلاق الحميده
بمعنى لما تعاملى الناس كويس حتلاقى منهم معامله قمه واخر ذوق ...

واى اسئله اتفضلوا واحنا انجاوبوك ...

السلام عليكم
كيف حالكم كلكم فردا فردا....ان شاء الله تكونوا بخير
سلفية ...ألف الحمد لله على السلامة...آنستينا فى اللمة...كيف حالك وحال البنوتة...هيا تعالى هدرزى بالتفصيل...كيف حال ليبيا ووين امشيتى وقداش قعدتى ...{{ ٌقصقصة }}
مشيمشة...لاباس عليك ...سلامتك ألف سلامة عليك وعلى البيبى
أم محمد ...الحمد لله على السلامة ...شنى انبسطتى فى الرحلة ..؟ باهى غيرتوا الجو
أم تقى الدين ...شكلك مشيتى ليبيا ...ان شاء الله تمشوا وتجوا بالسلامة
أمواج ...كيف حالك وان شاء الله تمر هالفترة على خير سلامتك انت والبيبى
سلامات توا