أهلاً أهلاً بالعيد مرحب مرحب بالعيد هيه هيه

أهلاً أهلاً بالعيد مرحب مرحب بالعيد هيه هيه

من العايدين ومن الفايزين وكل عام وأنتم بخير جميع قبل الزززززحمه...

أهلا بكم معنا في برنامج أفراح وتهاني ومشاعر وشموخ وأسيرة الذكرى وأم العيال المشغولة وكل البنات في المنتدى والواحة الترفيهية خصوصا..ههههههاي

للعيد فرحه وفرحتها تترجم في عيون الكل والكل أكيد راح يكونون مبسوطين مبسوطين من أيش من مقدم العيد والعيد بعد يومين هذا الإحتمال الأكيد والأكيد أنكم متجهزين للعيد >>> وانتم متجهزين تكفخوني على هالهذره هع هع هع..

المووووووهم..
أنا ماراح أسألكم هل أنتم مبسوطين لمقدم العيد لأني ماني خبله لها الدرجة عشان أسأل هالسؤال,,

لكن إلى أنا حابه اليوم التليقف فيه هو برنامجكم في أيام العيد ...

وملابسكم من ألوانها وأسعارها ومن وين أشتريتوها وهل أشتريتوا لي مثلها ولا لا>> أمزح حابه أعرف ألوان ملابسكم بس..

وبعد أيش بعد متى تصحون في أول يوم بالعيد ومن أول من تحرصون تعيدون عليه وهل أنتم بالعادة تروحون تعيدون على أحد في أول أيام العيد ولا أنتم تستقبلون حدااااا ...

...

وأنا راح أبداء بتدشين هالموضوع ..

برنامجي في أول يوم بالعيد (غالبا أكون مانمت يعني أكون مواصله في أول يوم نشاط مب على السنع يعني المهم أبداء أنا من الساعه1الليل نجهز حلويات العيد ونحطها بصحون مغلفه عشان تكون تحت الطلب غالبا ماأروح أصلي لأني كل ماأروح ماالحق إلا على التسليمة ههههاي يعني طيحة وجه مب على السنع,,
أخواني هم إلى يروحون للمسجد العيد وأولاد أخواني وأبوي الله يعافيه ويخليه لنا ويروحون لمسجد العيد بعد مايطقونها كشخة وتزين ويكون بيتنا بعد مايروحون لصلاة العيد كله ريحته عوووووده تهبل..
المهم بعد مايطلعون اخواني نجلس نجهز الكبسة على هالصبح لأن أخواني يودونها بعد مايرجعون للمسجد وهذا متعودين عليه أغلب المساجد برياض عندنا وأهل الحارة متساعدين بها الشيء..
بعد مايطلعون أخواني من البيت للمسجد (شكلي كتبت لكم برنامج اخواني هههاي) انا بعد مايطسون نشيك على نظافة البيت وبعدها أروح أتروش وأدهر بنفسي لين تطق الساعة عشر تمام وأروح بعدها أسلم على كل أهلي ومن حولي وأعيد عليهم وأجلس معهم الساعه 12 الظهر يجونا زوجات أخواني وأخواتي المتزوجات يتغدون عندنا ويعيدون علينا الظهر غالبا ننام شوي لين العصر وبعدها يكون بيتنا قد أمتلىء زوار إلى داخل وإلى طالع من أقارب وجيران وحبايب وهذا الجو العام والسائد عندنا ..نسيت أقولكم إني أطيح بفراشي الساعة 10الليل من الإرهااااااااااق..ومب انا وبس لا الكل من المغرب ألقاه طايح بزاوية ..

ملابسي (أول يوم طقم لونه ترابي) والثاني (موف) .. واحد شتوي واحد صيفي احتياط...

وكمان أيش كمان متى تصحوون في أول يوم بالعيد ومن أول من تحرصون تعيدون عليه وهل أنتم بالعادة تروحون تعيدون على أحد في أول أيام العيد ولا أنتم تستقبلون حدااااا..
إجابة هالسؤال كله سردته بردي الأول ههههههههاي..

أكبر عيديه حصلتي عليها:
(150ريال) دفعه وحده مب شيك لا مسلمه ميه تنطح خمسين من أخوي أيام الترف والبذخ عنده ولا أمهات الريال وعشره وخمسه التلقيط يعني (200) ريال يوم كنت بخامس خبيتها وانسرقت مني (ههههههههاي)..

ودي أقولكم موقف حصل معي بأحد الأعياد بس والله مستحية هذرتي والله زايده عن الحد المعقول وأنا اتمنى منكم المشاركة جميع لأن الدعوة مفتوحة للجميع..