اختي بنت الهاشمي

وعليكم السلام ورحمة الله وبركاته

انا مثلج أعاني من صدمة كبيرة بحياتي و ما أثق بأي أحد
بس نصيحيتي لج انج اذا عندج مشكلة اشتكى لله سبحانه و تعالى و الله يمسح على قلبج .. صدقيني الناس مالهم أمان يوم معاج وعشرة عليج ..

و اذا تبين صديقات نصيحة من قلبي بس كوني صدقات حق الوناسة مو أكثر
لالا لا لا لالا لا تكونين صداقات عشان تقوليلهم أسرارج طيعيني

و بالنهاية أقولج ..
وحدة الانسان خير من جليس السوء عنده
وجليس الخير خير من جلوس المرء وحده

و الله يعينج حبوبه

الصديق مهم جدا في حياتنا
و يبين الصديق وقت الشدة
و الصداقة ماتصير في يوم و ليلة
تاخذ وقت على ما تعرفين هاذي الإنسانه تستحق انك تقولين لها اللي ما تقوليه لأحد غيرها
عن نفسي و تحملوني اذا طولت بالكلام لأني احب الهذرة(الكلام الزايد)
اذا صرت بين ناس جدد علي
مثل زميلات عمل أوبالجامعة أوبمكان يحتم علي اني احتك بمجموعة من النساء
تكون مشاركتي بسيطة في حواراتهم مجرد ابتسامه أو تعليق مختصر
و أراقب كل واحدة و اتعرف عليها عن بعد
بعدين اكون فكرة عنهم و تبين الواحدة من كم قعدة و تعرفين شخصيتها
الناقلة لأخبار الناس
اللي تكبر الموضوع براس زميلتها و تخرب عليها
اللي تعطي نصايح تزيد من المشكلة بدل ماتحلها
و أنواع كثيرة
بسسسسسسسسس لا بد تحسين بواحده غير و تستشعرين من كلامها و حوارها انها متزنه
و لو خليت خربت
من تجربتي:
أول يوم لي بالعمل قعدت مع مجموعة كبيرة من الموظفات اللي عوروا راسي و رجعت البيت
كأني راجعة من سوق الغنم الله يعزكم لأن الكل يتكلم و بس آنا أسمع تقريبا
وفي واحده في البداية خذيت عنها فكرة سيئة لأنها متبرجه و تتكلم بطريقة غير محبببه
و لكن مع الأيام اكتشفت فيها صفات قلما تجدينها في هذا الزمن
هي لا تخشى أن تقول كلمة الحق حتى لأكبر مسؤول
هي لا تبخل بالنصيحة التي تفيد صاحبة الشأن خصوصا فيما يتعلق بمشاكل الأسرة
هي خزينه بأرقام سريه للغاية لأسرار الناس
و صفات كثيرة عرفتها فيها مع الأيام و كل يوم تكبر بعيني و تتوطد علاقتي فيها
و لوخليت لخربت
بس نصيحة مو كل سر ينقال في أشياء خير للإنسان انه يحتفظ فيها لنفسه لأن ه مافي سر بين اثنين
و مع الأيام الله يخفف الحمل و يفرج عن الإنسان
و انشالله تلقين الصديقة اللي بتكون لك متنفس
ولا تنسين
التجربه خير برهان
عطيها طعم سر صغير لو كذبه بيضا و شوفي تنجح بالاختبار أو تسقط
و موفقة

بنت-الكويت
كلنا نشكي الصدمة من صديقات كانوا ويانا .... طيب من فينا الزين .. الوفي .. اللي نقدر نثق به ؟؟؟
إن كان على اطباع الانسان فأنا اتغاضى عن وايد أمور ... لكن وحده ابوح لها وتزيد من عندها وتنقل الكلام
هذا اللي ما اتحمله ...
لكن حتى صديقات وناسة نكد ... لأنهم مايحاسبون بالكلام !!

------------

أم فتوشة
على طاري الاختبار أحيانا شو يصير ... بهذا الاختبار تلقين إنه السر ( كلام كذب ) ماتنقله وبعدين تثقين فيها
ويمكن الكلام الحقيقي ( الــسر ) ممكن تقوله لو لشخص ...
المهم ممكن تكون طريقة ..
وانا في مجال العمل لي زميلات ....
اتكلم مع الكل واحس كل وحده لها معاملة ...
لكن وحده منهن احس ودي ابوح بأسراري لها .. لأنها ما اسمع إنها تتكلم عن حد، هذا اللي يخليني اندفع
بالكلام وياها .... وإلا غير هالكلام ماعندي !

كلامك صحيح بنت الهاشمي
بس أكيد هذا الاختبار بيكون بعد ما تعرفينها زين
عموما مثل ما قلتي الوحده تبين إذا شفتيها تتكلم عن الناس و تقول أسرارهم
لا تعطينها أذن لأن إذا سمعتيها بتكونين مشتركه معاها و موافقتها على فعلها
و بعد لا تندفعين و تقولين أشياء حساسة لصديقتك لأن الدنيا تدور و لا تدرين شيصير فيها
عدو الأمس يصير حبيب و صديق الأمس يصير عدو الله لا يجيب هاليوم
و مثل ما قالتdomoo3x لا تثقين بالحيل و لا تخونين بالحيل