شلونكم أخواتي ؟ إن شاء الله بخير ..
والله عارفة اني مقصرة في حق بيتي الثاني (عالم حواء).. وفي حقكم بعد .. بس كل انسان له ظروفه .. واتمنى انكم تقدرون ظروفي .. بس ان شاء الله أعوضكم في الايام الجاية .. وكل الاخوات اللي طالبوني في كتابة مواضيع معينة .. راح أكتبها ان شاء الله إذا سمحت لي الفرصة .. :)
أما اليوم راح أكتب لكم عن تجربتي مع أول جرح عاطفي صار لي .. لاني أعتقد أن هذا الموضوع مهم بالنسبة لكثير منكم فحبيت أفيدكم ..
كثير من الناس تصاب بجروح عاطفية سواء من أصدقاء أو زملاء في العمل أو أزواج أو أشخاص عزيزين ، و قد تستمر هذه الجروح و الالام لفترات طويلة في حياتهم ، وممكن تأثر عليهم و على حياتهم بطريقة سلبية على حسب شخصية كل شخص .
ومن كثرة قراءتي لمواضيع الجروح العاطفية وكيفية شفائها ، صار عندي خبرة وكنت أساعد غيري في شفاء جروحهم العاطفية و إن كان بشكل بسيط .
في البداية ما كنت أعرف شنو المعنى الحقيقي للجرح العاطفي ، و لا كنت أعرف شنو الشعور الحقيقي اللي يحس فيه هذا الشخص المجروح عاطفياً ، إلى أن أصابني هالجرح من صديقة عزيزة علي ، دامت صداقتنا ثمان سنوات ، عطيتها ثقتي و صداقتي و قلبي ، واعتبرتها مثل أختي و أعز ، لكن للاسف خانت هالثقة و طعنتني في ظهري ، كان هالشي صدمة كبيرة بالنسبة لي ، وسبب لي جرح عميق .
كنت أعتقد أن الايام كفيلة بأنها تشفي جرحي ، لكن طلع اعتقادي غلط ، في كل يوم كانت حالتي تصير أسوء من اليوم اللي قبله ، ابتعدت عن الناس وحتى أهلي ، صرت أقعد طول الوقت مع نفسي ، صرت انطوائية ، حتى الأكل ما كنت أشتيه ، في اسبوعين خسرت 10 كيلوات من وزني ، حياتي كانت كلها نوم ، نفسيتي تعبت ، حتى الدموع ما كانت تطلع من عيني ، حسيت أن دموعي جفت و مشاعري ماتت .. استمريت اسبوعين على هالحال..
وبعدها حاولت أنساها ، وأنسى اللي سوته فيني ، و أسامحها لكن تفاجأت اني ما أقدر أسامحها!! رغم اني من النوع المتسامح .. وقلت يمكن يجي اليوم اللي أقدر أسامحها فيه ، بس يمكن محتاجة شوية وقت ، و في هالفترة حاولت كثير إني انسى اللي صار ، وفعلا نجحت .. وظنيت ان جرحي التأم ..
لكن ظني خاب ، بعد 7 شهور انفتح الجرح وجاني الألم من جديد ، لكن هالمرة كان أقوى ، يمكن لو بكيت كنت راح أرتاح لكن ما كنت أقدر أبكي .. وظليت أعاني كلما تذكرتها .. هني أن جرحي ما التأم و ما زال ينزف و محتاج إلى عملية ، لكن مو أي عملية محتاج لعملية روحية تشفي هالجرح قبل ما يزيد نزيفه ..
وبعد مرور سنة كاملة من المعاناة سمعت صوت حنون داخلي يقول لي : ما عليه ، الدنيا للحين بخير ، و انتي مو أول وحدة تتعرض لجرح من شخص عزيز ، تذكري كلامك إلىّ كنتي تقولينه للناس اللي كنتي تعالجين جروحهم ، كوني صبورة لان هالجرح راح يرجع مرة و مرتين و ثلاث إذا ما عالجتيه ، وعلاجك بيدك أنتي .. محد يقدر يساعدك إذا انتي ما ساعدتي نفسك ..
ومن هذاك الوقت قررت أني أثبت لنفسي و للناس و للانسانة اللي سببت لي هالجرح ، إني قادرة أستمر في حياتي ، ولا كأنها كانت موجودة في حياتي من قبل ، و اني قادرة على أني أشفى جرحي ..
وبديت أعالج نفسي بنفسي .. وخطوة بخطوة ..
في الخطوة الاولى استكشفت الجرح .. يمكن وحدة منكم تسأل ليش استكشفت الجرح و كيف استكشفه ؟!
بالنسبة للسؤال هذا : ليش استكشفت الجرح ؟
لانها تساعد في أني أعرف مقدار الجرح ، و أدرك الموقف اللي صار .
أما بالنسبة كيف استكشفته فهذا اللي راح أقوله لكم الحين ..
قعدت على كرسي واسترخيت وحطيت قدامي ورقة وقلم وكتبت هاذي الاسئلة :
-شنو اللي أتذكره من الموقف ؟
-شنو المشاعر اللي حسيت فيها في ذاك الوقت؟
-شلون كانت هذي المشاعر ؟ (يعني وصفها)
-شنو كانت ردت فعلها تجاه مشاعري وردة فعلي ؟
-شنو المشاعر اللي بقت بعد المواجهة ؟
-شنو اللي أحس فيه الحين ؟
وبعد ما حطيت الاسئلة .. غمضت عيني و استرخيت و رجعت ذاكرتي سنة كاملة ، لنفس اليوم اللي اكتشفت الحقيقة وواجهتها فيه و النقاش اللي صار بيني و بينها .. والمكان اللي صارت فيه المواجهة ..
في البداية حسيت بصعوبة بأني أسترجع مشاعري وأوصفها ، لكن بعد ما رحت للمكان للي صارت فيه المواجهة ، حسيت بشعور غريب ..
حسيت أن دمي يفور ، وتذكرت كل اللي صار من ضمنها مشاعري في ذاك اليوم .. وبديت أجاوب على الاسئلة اللي كتبتها ..
وهاذي كانت أول خطوة في علاج جرحي .. بكرة ان شاء الله أقولكم على باقي الخطوات ..
كلامك مره حلــو وأسلوبك مره مميــز
انتي مبدعه :41: