وأنا معكم على الخط..
خمول وإرهاق وشعور بالتعب.. وكل المسميات الأخرى للكسل..
والله ما أدري شالسببب.. البعض قالوا لي من حبوب منع الحمل.. وغيرتها لكن دون جدوى..
الرياضة تنفع شوي.. لكن العلة الأزلية موجودة..

سبحان الله ما أدري شلون كان حياتي قبل نشاط وخفة؟.. ما أصدق إذا صرت أتذكر..
الحين استغفر الله يمكن لي 6 سنين (من زواجي) وأنا دايم دايخة وتعبانة.. ودي مرة أرجع زي أول أناقز ونشيطة.. لكن ما فيه فايدة صعد الوزن والا نزل ما له علاقة..

ما بقت حبوب فيتامينات مقوية بالدنيا ماأخذتها وبعضها فادني ونشطني لكن شالفايدة ؟ شي مؤقت بس..

أقول يمكن من التعب وهموم الأطفال والسهر معهم.. لكن حتى لو أنام بدري ما فيه فايدة..
والله مليت بجد لكن محتسبة الأجر عند الله.. أحس أني مريضة بمرض اسمه التعب والإرهاق..

وأغبط الناس اللي ما شاء الله يشتغلون طول اليوم والابتسامة من هنا لهنا ولا يشتكون ولا شي..
صرت أستحي أقول لاحد أني تعبانة شكلي سخيف كني عجوووووز.. بس أتشكى ودايماً تعبانة ودايخة!!
حتى المناسبات الاجتماعية ما صرت أروح ولا كثير أماكن.. دايماً في البيت حتى شغلي تركته بسبب الإرهاق والتعب لكن بدون جدوى..

الله يخليكم اللي عندها حل تساعدنا.. والله يجزاكم خير..

عزيزاتي ..

الكسل والخمول والإحساس بالتعب كلها ممكن تكون من أعراض قصور الغدة الدرقية فالرجاء من الأخوات اللي يحسون بكسل وخمول شديدين .. ان يسوون تحليل بسيط عن هرومونات الغدة الدرقية .. وهذي اعراضها :
مع ملاحظة ان احيانا يكون عندك عارض واحد او اثنين منهم فقط .. يعني مو بالضرورة يكون عندك كل العوارض هذي :

أعــراض و عــلامــات قــصــور الــدرقــيــة Clinical features :

الشعور بالتعب و الإرهاق.
زيادة الوزن.
عدم تحمل الطقس البارد.
إنتفاخ الوجه و تغير ملامحه.
ضعف الذاكرة و كثرة النسيان.
الكآبة.
الفتور الجنسي.
الدُراق (تضخم الغدة الدرقية).
إنتفاخ العيون.
تجفاف و تقصف الشعر.
تجفاف و خشونة و تجعد الجلد.
آلام بالمفاصل و العضلات.
ضعف العضلات و تيبسها.
الإمساك.
غزارة Menorrhagia أو قلة Oligomenorrhoea الدورة الشهرية في النساء.
الإصابة بالذهان Psychosis.
نقص في حدة السمع أو الصُم.
الإصابة بالغيبوبة Coma.
بطء الحركة و الكلام و خشونة الصوت.
برودة الأطراف و تورمها.
الإصابة بمُتلازمة النفق الرسغي Carpal Tunnel Syndrome

أنا طلبت من الدكتورة تحللي مستوى هرمونات الغدة الدرقية.. لكنها رفضت.. قالت لو كان عندك خلل بالغدة كان بان الخلل بوضوح في مستوى النبض عندك.. ومستوى النبض عندي جيد.. وكذلك الهيموجلوبين يعني ما عندي فقر دم ولله الحمد ولا ضغط ولا سكر..
ما أدري شالسبب.. مير اليوم حاسة بدوخة الله وكيلك يا الله أمشي وأنا ماسكة الجدران تقل عجوز مكسرة.. كنت بأروح السوق وهونت.. حتى التروايح ما صرت أقدر عليها الله المستعان.. أحس أني بأطيح من التعب والدوخة لو وقفت كثير.. والنفس مكتوم.. الله يعين إن شاء الله..

انا زيكم يابنات وانتي يارسيل كنك تتكلمي عني!
والله كل شي سويته يابنات نظمت نومي ..
غيرت طريقة اكلي وآكل متممات غذائيه..
بس مافي فايده ..
ياليت احد يفيدنا.

ليش يابنات ماتجربون تقرون سوره البقره انا قريتها والحمدالله حسيت اول شي براحه نفسيه والراحه هذي خلتني انسانه متجدده ونشيطه مع العلم كنت مو ماخذه كفايتي من النوم بس كان لي خلق حق كل شي وبالي طويل وعايشه اللحظه اللي انا فيها يكفي احساس التوكل على الله بعد قراءه السوره والايمان بالله ان الله راح يعينك .هذا الشي يسوي شغلات كثيره ايجابيه في نفسيتك
وكذلك الرقيه الشرعيه حيييييل مفيده لهذي الحاله التعب والكسل والخمول وعندي كتيب تحدث عن هالشي وان بالرقيه الشرعيه بأذن الله راح تتخلصون من هالمتاعب و مذكور بالكتيب بالاضافه الى الرقيه الشرعيه يفضل لنتائج افضل قراءه سوره البقره كامله
والرقيه الشرعيه مو ضروري تروحين لشيخ انتي بنفسك نفذيها وان شاءالله تلقون الحل فيها والرقيه فيها علاج لكل مرض وحفظ وحصن لنفس من العين والحسد للي مايشتكي من شي جربوا ماراح تخسرون شي كلها ان شاءالله اجر وحسنات