حبيبتي كلنا مرينا بنفس حالتك , وما ننلام صراحة أصعب شي لما يكون أول مولود لك معاق


بالنسبة لي بنتي من ذوي الصلب المشقوق ,, وبما أنك جبتي طاري حمض الفوليك فأنا زيك صرت ألوم نفسي وأقول يمكن ما استخدمته زين , مع اني استخدمته وكل شي من ربي بس جنني كلام الدكاترة كل مرة يسألوني هل استخدمته في الحمل والا لا



المهم يالغالية , كلنا كذا تمر علينا نفس حالتك

ما نتقبل عيالنا ولا نبي أحد يشوفهم ولا يتكلم عنهم .....



بس أقولها لك عن تجربه , ماراح ترتاحي إلا لما تفتحي قلبك وتسولفي عن ولدك وتعتبريه فخر لك وليس عيب !!
كل ما انطويتي كل ما تعبتي أكثر


أنا كنت زيك حتى جت اللحظة اللي قررت فيها وقلت خلاااااص

صرت أودي بنتي معي أي مكان , وأتكلم عن حالتها قبل ما أحد يسألني
صرت أعتبرها بنت لأي أحد من أهلي أو أهل زوجي , اللي يبغى يلعبها واللي يبغى يسوي لها تدليك واللي يبغى تجلس معه عادي ,, أبغى الكل يحس باللي أنا أحس فيه
ماعد صرت أنجرح لو أحد قال عنها ما تعرف تمشي أو قال فيها كذا وكذا , لأنها خلقت ربي وماهو عيب عشان أستحي أو أنجرح



والله ثم والله لو جربتي راح ترتاحيييييين



والشي الأهم عندك النت ,, والله صرت أحب النت عشان بنتي

أقابل أمهات سبق أنهم مروا بحالتي وأستفيد منهم ومن تجاربهم
وأشكي عن حالة بنتي بالتفصيل الممل وألاقي الكل يحس فيني ومر بنفس تجربتي
ألاقي حتى بنات كبار حالتهم نفس حالة بنتي , يقولون قصصهم لما كانوا صغار وكيف واجهوا الحياة

بصراحة المنتديات عالم جميل , خاصة لما ودك تتكلمي عن أشياء ما تقدري تتكلمي عنها في الواقع


وأخيراً بالنسبة لحالة ولدك الصحية ,, حاولي تلتزمي بالمواعيد والعلاج الطبيعي لا تهمليه قدر المستطاع
أيضاً وديه التأهيل الشامل يعطونهم إعانه , وتخفيضات , وأراضي



والأيام بتمر بسرعة , ومع الدعاء ربك بييسر لك أكثر مما تتصورين



وخليك معانا هنا بالقسم باستمرار وطمنينا عنك وعن ولدك أول بأول ^_^

طبيعي هالشي اللي انتي فيه
مو حكاية انك تكرهينه بس مقهوره ومغبونه عليه ليه هو كذا وغير عن الناس
بس صدقيني هم الخير والبركه ربي راح يفتح عليك ويسعدك في حياتك ببركة هالطفل المريض
بس خليك قويه عشانه وارضي بالقدر
ومو بس انتي تعانين شوفي كل اللي ردوا عليك
الدور عليك تقوين نفسك وتتثقفين وتعيشين معاه كانه طفل طبيعي مافيه شي

اللهم فرج هم كل ام ردت علي


اللهم اشفي ابنائنا واجعل العافية تملاء اجسادهم


اللهم لا تفجعنا بفلذات أكبادنا


والله يا اخواتي أقرأ ردودكم واحس بماي بارد يصب بقلبي


ربي ما يحرق قلوبنا على عيالنا


ربي يفرحنا بشوفتهم يركضون ويسولفون ويكونو اطفال طبيعين ياااااااااااا رب


يا رب لا تحرمنا الفرحة فيهم


يا رب تجعلهم قرة اعيننا


يا اعظم امهات


اتمنى اكون مثلكم واعرف اخذ بيد ابني مثل ما انتو قايمين بعيالكم على اكمل وجه

الحمد لله على كل حال

اذا جاتك افكار شينه ولا اعتراض على قضاءالله رددي هالجمله وربي غير ترتاحي (( من رضي فله الرضى ومن سخط فله السخط )) وان شاء الله انا وانتي وكل ام عندها طفل من ذوي الاحتياجات الخاصه راضين بقضاء الله وقدره ونشكر ربنا على نعمه

يا الغالية..أول شي اللي أنتي تمرين فيه إحساس طبيعي جدا..
هل تتوقعين فيه أحد يضحك ورامي الدنيا وراه لو انولد طفله معاق؟أبدا..أي إنسان راح يتألم..وراح يحس أن الدنيا ضاقت عليه..
أنتي تحتاجين وقت عشان تتأقلمين مع الوضع الجديد..لا تقولين مو قادرة تتقبلينه بل قولي أحتاج وقت عشان اتأقلم مع وضعي الجديد..
هذا أولا..
ثانيا..مسألة أنك تشوفين أطفال الناس بخير وطفلك معاق..مع تحفظي على هذه الكلمة..هذا يعني أنك تشوفين جانب من هذي الدنيا..وهذا راح يزيد ألمك ألم..بسس أبشررك..أول ما تاخذين ولدك للتاهيل..أو للمستشفى..راح تشوفين حالات يمكن أصعب..وتقولين الحمد لله..وتتغير نظرتك للأمور..
وتأكدي يا الغالية أن هذي أرزاق من الله..يعطي ناس ويمنع عن ناس..غني وفقير-صحيح ومريض..ما فيه واحد منا يملك أمره ابدا..
ثالثا: بالنسبة لحساسيتك من موضوع ابنك..فشي طبيعي..واعرف أمهات كثير يتحسسون من إعاقة أبناءهم..بسسس..صدقيني الكبت مو حل أبد..الناس راح تتكلم وتتكلم وتتكلم..وانتي حتى الكلام اللي ما يعنيك راح تحسين انه يعنيك..وكذا بتتعقدين وتصيرين تعبانة نفسيا..يعني مو كفاية ولدك؟
عشان كذا..إذا صار لك موقف مشابه..يعني أحد قال لك: بروح اودي زوجتي نكشف وما إلى ذلك...جاوبيه وتفاعلي معاه:" صح..كلام سليم..الله يحميكم من كل مكروه..والله اللي عنده طفل معاق يتألم كثير.."وقتها أنتي تفضفضين وفي نفس الوقت الطرف الآخر ما راح يقدر يقول شي لأنك حطيتيه في مكانك بشكل غير مباشر..
والحب يا قلبي ما يجي من أول مرة!!!!!
يمكن كلامي غريب بالنسبة لبعض الناس..ولكن فعلا..حب الأم لأطفالها يكبر مع الأيام..ويكبر مع العشرة..قد ما تقضين من وقت مع ولدك..قد ما راح ينمو الحب بينكم..
لاعبيه..كلميه..غني له..لا تقولين ما يفهم..والا ما ينفع..أبدا..
الإنسان مثل الشجرة..وقد ما تعطينها من رعاية قد ما تكبر وتثمر..
والطفل المعاق..مثل الشجرة الضعيفة..اللي ما تقدر تمد جذورها بقوة وتاخذ الماء من الأرض بنفسها..فإذا أهملتيها ما راح تنمو..بالعكس راح تقتلين كل ورقة خضراء فيها..
بمعنى..إذا كانت له نسبة ذكاء معينة..أو فهم أو تفاعل مع المحيط..وأنتي ما أعطيتيها حقها..راح تضمر وتتلاشى وتتعطل..وتكونين السبب في إعاقة أشياء اصلا غير معاقة عنده..
ونصيحة..لا تكونين قاسية مع اللي يتعاطف مع ولدك..لأنه أكيد إنسان يدور الخير..ومو قصده يتشمت..ولو تعاملتي بقسوة مع المتعاطفين..صدقيني راح يكرهونك..بالعكس..خلي تعاطفهم فرصة لتكوين جسور المودة بينك وبينهم..لعل دعوة منهم تخفف عنك..أو عنه..
واللي ما يهتم فيه فبرضو لا تزعلين منه..لأن اللي ما يحس فيك ما يحس لأنو ما جرب نفس الألم..والنار ما تحرق إلا رجل واطيها..
عيشي حياتك..أعطي نفسك فرصة لتقبل الوضع..لا تعذبين نفسك بتأنيب الضمير..
الرضا راح يجي..الحب راح يجي..والسعادة بإذن الله راح تجي..
وأخيرا..حاولي تتكلمي مع ناس لهم نفس حالة ولدك..وشوفي كيف عايشين..بسسسس انتبهي من المتشائمين..
تفاءلي..قد إيش التفاؤل يعطي روح للحياة..وبإذن الله راح أحكي لكم قصتي مع بنتي والتفاؤل..يمكن حالة أصعب من حالة..ما أدري لأنك ما قلتي لنا وش مشكلة ولدك..
الله يفرج همك يا الغالية..والدنيا ما تصفى للكل..والحمد لله حتى يرضى..وله الحمد عند الرضا..وله الحمد بعد الرضا..