اذا كتب ربي النصيب يجي على اتفه سبب (شاركونا بقصص الخطبة )

مساء الخيرات لكل الحلوات :)

حبيباتي بدخل بالموضوع على طول

بالبداية بوضح للجميع ان الزواج قسمة ونصيب

<< على بالها جايبة شي جديد

انا من زمان اسمع هالكلمة بس سبحان الله مدري ليش توي استوعبها

لأني لاحظت كذا حالة اذا كتب ربي النصيب سبحان الله يصير على اتفه سبب واذا ماكتب ممكن الوحدة تنخطب وتشبك وتجهز ثمن ينتهي كل شي بلحظة


زبدة الموضوع هواننا نتشارك بقصص الخطبة ( طبعا ً واقعية )

<< تموت بالقصص

بالبداية بقول لكم قصة خطبة اختي اللي تزوجت من 4 شهور

اختي الكبيرة صار لهم تقريبا 12 سنة ساكنين ولهم جيران ومعارف يوم كانوا ببيتهم الاول

المهم حصل وسمعت اختي عن حادث صاير لعائلة يصيرون من جيران اختي ببيتهم الأول اختي تذكرت جيرانها القديمين وقالت لا يصيرون هم المهم دورت الرقم اختي وحصلته ودقت تطمن عليهم للمعلومية اختي مازالت علاقتها فيهم لكن متى تكون وصار لها تقريبا كم سنة ما اتصلت


اختي دقتها سواليف وذكريات مع ام الجيران وسألتها عن عيالها وش صار عليهم وش وصلوا بالدراسة ومن هالكلام المهم قالت لها ام الجيران انهم يدورون لولدهم الكبير قامت اختي ذكرت لهم اختي الصغيرة

يوم كتب ربي النصيب جو وشافوها وشافها الرجال وتزوجوا وصارت ام عياله هههههههههههههههه

سبحان الله يعني البداية كانت من حادث !!!!

صدق مصائب قوم عند قوم فوائدهم


القصة الثانية

خطبة بنت اختي عاد هالمرة أنا وولدي الخطابين :22:


ولدي الله يصلحه متعلق بالجوال ويحب يحوس بهالجوال المهم مرة من عرض هالحوسات :hahaha: دق على وحدة من صاحباتي اخر ما كلمتها من سنة تقريبا ً

طبعا ً انا مادريت بعد ساعة تقريبا ً جتني رساله ( فضلا ً اتصل بي على الرقم ..... ) المهم انا ماعرفت الرقم لكن دقيت عليه قلت كانهو احد اعرفه بيطلع اذا دقيته على طول لأني مخزنته بالجوال

المهم دقيت وطلع لي اسم صاحبتي هذي مالي بها علم من العام وردت

طبعا ً انا وياها كل وحده تتشره على الثانية هي تقول اخيرا ً تذكرتي ان لك صديقة وانا اقول انتي اللي اخيراً تذكرتين :hahaha:

هي على اساس اني داقه قبل ساعه عليها وانا طبعاً مدري وش القصه استغربت تتشره علي وهي اللي مرسلة لي هههههههههههههههههه

المهم تفاهمنا تذكرت ان ولدي كان يلعب بالجوال قلت اكيد انه هو اللي داق بالغلط

سولفنا تقريبا ً ربع ساعة ومن ضمن المواضيع قالت لي انهم يدورون لأخوها عاد انا بعد التحري والسؤال هل هو:30: متوظف أم لا وهل هو يدخن :30: يوم شفت انه مايدخن ووظيفته زينة قلت لها ان بنت اختي تدرس بالكلية وعطيتها اوصافها

تحمست هي مرة واخذت رقم بيت اختي وخطبوها وكتب ربي النصيب بينهم

يعني البداية كانت بتنغيز الجوال !!!!!! والا لا نا ولا هي فكرت وحدة فينا تكلم الثانية بس سبحان الله ربي مدبر كل شي

عاد الحين تعالي شوفي البنات ( قرايبي ) يقولون لولدي كل يوم العب بجوال امك يمكن ربي يرزقنا !!!:hahaha:





ان شاء الله أعجبتكم القصص والمعذرة عالاطالة وأرجو منكن التفاعل والمشاركة



تحياتي ... :26: :26: :26: