ما شاء الله لا قوة إلا بالله ايه يا مانو الكلام الجامد و الحركات اللى تهبل ديههههههههههههههههه
تسلملى و يسلم عمرك يا جميل و ما شاء الله تحفة بجد كلهك انا عجبتنى جدا الكيكة الألمانى ديه و على طول حطلتلكم الرابط بتاعها و ان شاء الله هاجربها انا كمان

و التورتة التانية ديه تحفة انا اصلا بعشق الفراولة يلا عايزين الطريقة

و بالهنا و الشفا يا احلى شيف امانى :cook:

ما شاء الله لا حول و لاقوة الا بالله

ايه يا اماني الشغل الجامد ده


بسم الله ما شاء الله عليكي

لالالا كده في السريع وصفة الكراميل


لا يا حلوة اديني المقدار بتاعت الكراميل

لحسن شكلي كان وحش اوي و انا بقول لجوزي الصوص باظ


الكيكة اصلها كانت هشه و خرافة بجد

في انتظارك

امانى ايه الكلام الكبير اللى انتى مصوراه ده
يا بخت اللى هياكلو منها

يا بختهم بس :30:

أنا عايزة من ده :angry2::icon33::icon33::icon33:

تسلمولى يا بنات اخجلتم تواضعنا وده بعض ما عندكم يا قمرات
منمن انا كمان بموت فى الفراوله وهيا موسمها الايام دى شكلها فعلا يجنن وخصوصا فى تزويق التورت اما عن طريقة التورتايه فأنا بعمل الكيكه نفس طريقة كهرمانه لانها عجبتنى اوى وبتطلع جميله اوى واستخدمت دقيق 5نجوم تحفه فى الكيكات والتورت نجى بقى للمقادير 6بيض \ كوب دقيق \ كوب سكر ناعم بس انا عملتها بسكر عادى \ ربع كوب نشا \معلقه ممسوحه BB \
2باكو فانليا فى الاول طبعا بتضربى البيض مع الفانليا وبضيفى السكر براحه وتفضلى تضربى بالمضرب لحد ما يعلى الخليط ويبيض لونه بعد كده تكونى نخله الدقيق مع BBوالنشا( يفضل تنخليهم مرتين او حتى تلاته ) وتضيفيه براحه لخليط البيض مع التحريك بمعلقه خشب او بلاستك حركه نص دايره براحه وبس كده تحطى الخليط فى صينيه مدهونه زبده ورشة دقيق وتدخليها الفرن وفى نص ساعه تكون عندك احلى تورته هشه وخفيفه اوى لانى انا كنت فى الاول كنت مستغربه حكاية النشا ده فى العجينه بس اتضح انه له دور كبير فى نجاح التورته اما بالنسبه للزواق انا كنت خبزتها قبلها بيوم وتانى يوم زوقتها ودهنتها بفرشه بشربات خفيف علشان يدى شوية طراوه للكيكه وقسمتها تلاته وطبعا حشيتها بالكربم شانتيه مع قطع فراوله واناناس وعلى الوش حطيت صوص شكولاته وهو عباره عن شكولاته سايحه مع معلقة زبده ومعلقة عسل ابيض واربع معالق كريمه من اللى زوقت بيها التورته وبحرك الخليط لحد ما يبقى قوامه كريمى شويه واصبه فوق التورتايه واسيبه ينزل على الجناب علشان يدى منظر جميل لتورته وطبعا فوق صوص الشيكولا رصيت الفراوله بعد ما غطستهافى الشيكولا وبس كده طبعا الزواق ده لكى مطلق الحريه تتفننى فيه وتبدعى زى ما انتى عايزه ويارب اكون افدتك واى سؤال انا فى الخدمه يا احلى منمن
لوزه بصى يا قمره انا هاكتبلك الكرميل بتاع منال العالم وهاقولك انا عملته ازاى لانى كتير باخد الوصفه واكيفها انا على حسب الحاجات اللى متوفره عندى والحمد لله بتظبط معايا وهاقولك بالتفصيل كل حاجه وما تقلقيش الحياه كلها تجارب بس الشاطر اللى يتعلم من التجارب دى وياخد خبره مش كده يا جميل المهم نيجى للمكونات الكراميل
نص كوب زبده \كوب ونص سكر منال بتستخدم السكر البنى انا باستخدم الابيض\ نص كوب كريمه لبانى وفى كسروله على النار بتحط الزبده وبعدين السكر لحد ما يدوب السكر مع الزبده وبعد كده بتضيف الكريمه براحه لانها هاتغلى وتفور جامد خلى بالك وتحرك وتطفى النار
اما الكراميل اللى عملته انا
معلقتين زبده تدوب شويه فى الكسروله وبعدين ضفت كوباية سكر وبحرك بسرعه بمعلقه خشب لحد مايدوب السكر ويبقى لونه دهبى مش غامق وعلى طول اروح ضيفه ربع كوباية لبن واحرك وبعدين ضيفت 3معلاق كبار من الكريمه( الكريم الشانتيه اللى مضروب وزوقت بيه التورته لانى لاقيت انها فعلا بتدى نتيجه حلوه فى الصوص الكراميل والشيكولا زى الكريمه اللبانى والمعلومه دى جربتها واكتشفتها وبقت معتمده عندى وباستخدمها على طول ) وعارفه ساعات ما بيبقاش عندى كريمه بحط بعد اللبن علبة قشطه بتاعتنا العاديه دى وبرضه بتدى نتيجه حلوه وبس بحرك الكراميل لحد ما يبقى قوامه حلو كريمى وقطعت التمر وحطيته معاه وبعد كده صبيت الكراميل وهو سخن فوق الكيكه وبالهنا والشفا ويارب اكون اقدرت اوضحلك الطريقه
طبعا يا نوئه ماقولكيش الحاجه اتنسفت وكويس انى عملت للولاد الكيكه وصبرتهم بيها احسن كانو هايكلونى وكان نفسى يا بت يا شيمو اعزمك بس قولت كفايه عليكى الكحك اللى فطرتى بيه على الريق كده وخليها المره دى صور بس