استفسارات بخصوص زواج الإماراتيه برجل من غير جنسيتها؟!

السلام عليكم ورحمة الله وبركاته

على ما اذكر القانون .. يسحب الجواز منج وعيالج على جنسية ابوهم
ويصير حالج حال الوافد .. قانون تعيس الصراحه .. واسفه على هالخبر السيئ ... لكن اتأكدي قبل ..

السلام عليكم .... أنا دائما أدخل و اقرا.. و هاي أول مشاركة لي بالمنتدى كاااامل

أولا يا اختي و قبل كل شي انا ماريد احبطج.. و لست عنصرية و بجاوبج على اللي اقدر عليه لأني شفت ناس واااايد عندهم مشكلتج

جوازي انا وجنسيتي بعد الزواج ؟
*** صدر قانون مادري كم رقمه بالضبط أو أي سنة بس كان بحياة الشيخ زايد الله يرحمه.. و كان القانون بالتسعينات بس مادري اي سنة بالضبط بسحب جنسية المواطنة المتزوجة بوافد.. و قد تم تطبيقه على بنت انا اعرفها... لأنه تزوجت وافد .. و ادارة الجنسية و الجوازات اتصلوا فيها 100 علشان تسلمه و بعدين لما انتهى ودته تجدده و انحجز.. و بعد طلاقها رجعته (الله يبعدج عن الطلاق) و لكني اقول لج عن تجربة وحدة اعرفها.. مادري ان كان لازال يطبق و الا لأ.. لكن اتصلي ادارة الجوازات و الهجرة و اكيد بيفيدونج.. ووحدة تقرب لنا راحت تتزوج واحد خليجي (خليجي من دول الخليج يعني مش وافد) و تمرمطت بالمحاكم و من محكمة لمحكمة لأنه القضاة يرفضون عقد القران.. و آخر شي راحت منطقة حدودية و ملجت... و اني والله العظيم ما اقص عليج في شي...


راتبي ومعاشي في حال توظفت؟
*** ان كنتي موظفة... و ما انسحب الجواز بيكون راتبج مثل ما هو.. لكن لو كنتي غير موظفة و انسحب جوازج ان شاءالله على اي اساس بتشتغلين؟؟؟ و انتي مسحوبة عنج الجنسية.. بتحصلين شغل بجنسيتج اليديدة (مع اني اسمع اللي عندهم واسطة ما ينسحب عنهم شي)


جنسية الأطفال مستقبلا؟
*** جنسية الاطفال بلا شك بجنسية أبوهم و الا صار الموضوع مهزلة.. و الا انتي مش معايه... كيف يلحقون الأطفال بجنسية الأم.. احنا مش اجانب.. و بعدين نزل قانون تجنيس ابناء المواطنة.. بس ... طبق على فئات قليلة جدا... و تقدرين ايضا تستفسرين من الجهات المعنية اللي هي الهجرة و الجوازات


إقامة الزوج والأبناء في البلاد؟ والسفر وخلافه؟
****ان كان ابوهم عنده اقامه.. فهم على اقامته.. و مستحيل يتسجلون عليج انتي... و الله بالعقل عرفوه.. لكن.. عيال المواطنة ما يتسفرون.. بس يوم ابوهم بيسفرهم انتي ما ترومين تسوين شي.. لا انتي و لا اي محكمة... القانون قانون.. و يوم بيسافرون بيسافرون بأوراقهم.. يعني ماشي مشوهم علشان امهم مواطنة


علاج الأبناء في المستشفيات الحكومية؟
****ما يتعالجون ببلاش مثلنا... بفلوس و طوابع.. و انتي اتصلي بوزارة الصحة علشان تصدقين..


دراستهم في المدارس والجامعات الحكومية؟
****يقبلونهم في المدراس الحكومية و انا شخصيا كنت قارية الاعلان مال تسجيل الطلاب مال هالسنة.. و محطين أبناء المواطنة.. لكن في الجامعات ما اعتقد لأنه كل دولة لها عدد معين من الكراسي في جامعة الاماارت مثلا.. و ما يقبلون الا في حدود العدد و اللي حاصل على التسعينات.. و انا سألت عن هالموضوع حق وحدة من سلطنة عمان زوجها مواطن.. و تقدرين تكلمين سفارة اليمن تتأكدين من الموضوع.. اما الجامعات الخاصة عادي


الأراضي والبيوت الشعبية التي تمنح للمواطنين؟


***يا بنت الحلاال.. المواطنين ميتين موت علشان يحصلون... كيف تبين الوافد يحصل... و المواطنة المتزوجة بوافد ان حصلت بالواسطة و اللف على القانون زين.. كل واحد يحل من بلاده منح و اراضي و بيوت.. و الوافد مستحيل يحصل..


اذا هناك اي صعوبات أخرى اتمنى توضيحها لي؟؟
**** اتمنى انج تكلمين المكاتب الاجتماعية و الاسرية علشان تتفطنين اكثر.. و بما انج قريتي عن المواطنات اللي قطعوا عنهم الشؤون اكيد عرفتي ليش!! لأنه أزواجهم الوافدين عندهم دخل... الدولة مالها خص ان كان دخلهم قليل و الا كثير..

و ان كان هالشخص طيب و محترم و يخاف الله.. و مقتدر ماديا انه يوفر لج بيت من ماله الخاص.. و يصرف عليج و على عيالج بدون ما تفكرين تلجأين للدولة.. توكلي على الله..

بصراحة.. مابا اخوفج... بس لو كنتي تقرين جرايد وايد بتعرفين انه حتى المتجنسين في خطر.. بسبب الولاء و الانتماء.. انا ماقدر اشرح اكثر من جي...

طيب اذا العكس البنت خليجيه والرجال مواطن اماراتي

طيب الخليجي عندكم يعتبر وافد؟؟ اجنبي

السلام عليكم ورحمة من الله وبركاته ...

أختي ماروكو أنا بطمنج من ناحية الجواز ... لا أختي ما يسحبونه منج ... بس أنتي لازم تقدمين طلب وهم راح يقبلون يعني مسأله شكليه ... أعرف وحده خذت وافد عربي من فتره جريبه وايد ومرتاحه معاه وعندها جوازها ... بس هيه قدمت على طلب ووافقو عليه ولا تغير معاشا ولا شيء كله نفس الشيء ... بس العيال والله مادري لأنها ما عندها عيال بعد ... أما بالنسبه ألي قالوه أخواتي أي فوق يمكن هاي قوانين جديمه ... وبعد ألحينه أخت هاي البنت بتاخذ أخو زوجها .
أختي عديل الروح ... بالنسبه لزواج الاماراتي من غير اماراتيه عادي حقوقه أتم مثل ما هي ما يتغير شيء ... وبعد يقدر يقدم حق زوجته على الجواز ويطلع لها يعني مش صعبه ... هذا ألي أعرفه .

يزاكن الله خير على ردودكن
حبيت اوضح شيء عشان تتطمنون .. حاليا ماشي مشروع زواج او ماشابه لكن اضطريت اني اسال لأن احتمال ينفتح هالموضوع مرة ثانيه خلال الايام اليايه بحكم زيارات العيد وبغيت رد بخصوص هالتفاصيل عشان اريح امي (لانه من جهة الوالدة) وعشان مااندم مستقبلا على رفضي لان الشاب بالفعل ممـــيز ومستحيل حد يشك حتى انه مب مواطن..
(طبعا ابوي ماعنده تفاهم في هالسوالف :30: لكن مع هذا قلت استفسر احسن)

أختي بنت زايد
وعليكم السلام ورحمة الله وبركاته
مشكورة اختي على ردج وانا عندي فكرة عن هالشيء ولكن بغيت اتاكد منكم لاني اريد اسمع من اللي عايشوا مواطنات متزوجات من وافدين..


أختي حمامة UAE
وعليكم السلام ورحمة الله وبركاته
مشكورة اختي على مشاركتج صدق اشكرج لاني شاركتي لاول مرة عشان تردين على استفساراتي واشكرج على اهتمامج بالموضوع وردج على كل سؤال فيه :27: وانا مب محبطة صدقيني .. هي السالفة ان الريال يوم قارنته بباقي شباب عايلتنا المواطنين من جهة امي وابوي لقيت فيه هو مواصفات واخلاق اكثر ..بس كتبة من ربي انه يكون الوحيد اللي جنسيته غير ..والله يرزقه كل خير..
والله يجزيج كل خير على توقفج وصبرج في كتابة ردج اشكرج فعلا..

أختي عديل الروح..
الوافد مصطلح نطلقه عندنا على العرب خصوصا .. اما الاجنبي لبقية الجنسيات ..
اما لو الزوج مواطن والبنت من اي جنسيه (غير ارهابيه :30: ) عادي تحصل الجواز بعد زواجها منه بـ3 او 5 سنوات اظن وتكون حقوقها من حقوق المواطنه..



أختي بيسان77
وعليكم السلام ورحمة الله وبركاته
مشكورة الغالية على ردج وعلى توضيحج لهالنقطة
العيال اظن هم اللي بيتغربلون في السالفة كلها اذا الله لا قدر استوى شيء على الريال مستقبلا واتسفر او فصل من العمل ..كيف بيصرف على دراستهم وعلاجهم انا هاللي يخليني اصرف النظر .. مع اني ماادري بالغيب والله يعلم اذا بيرزقني ذرية في المستقبل أو بيبتليني على مثل هالقرارات في حياتي .. بس العقل في هالامور هو اللي يحكم .. والله يجزيج كل خير أختي على ردج ..