انا من عشاق رجيم البروتين مهما رحت وغيرت ارجع له
اولا : ما اجوع نهائيا.. اكل حتى الشبع و طبعا ما اكل بالليل وانام علطول... بس ما اتعب من نقص الطاقه او هبوط الدم
ثانيا: شعري ما يطيح و بشرتي تتحسن و جسمي يشد ويصير اقوى
ثالثا: انا مدمنة اجباااااااااااان اعشقها واحب النقتس و احب التشيز كيك و الموزاريلا المقليه و الدجاج المقلي و احب المقلي احب الاكل الدسم .. طعم بشكل غير طبيعي
بس الشي اللي كان يخليني اقطعه رغم انه يرضيني بشكل كبير.. نقص الحلى.. ما في حلويات بشكل كبير
مافي خبز وبريد .. اشتاق له يعني
بس مع البحث المضني انحلت المشكله وقلت اكتب لكم كم شغله لذيذه جدا جدا جدا و ماتحسين انك مسويه دايت
موضوعي متجدد كل ما سويت طبخه كتبت لكم و ان شاء الله اصور بعد مو بس اكتب عشان الكل يستفيد
نجي الحين للوصفات الاتكنزيه
اولا المسقعه اللذيذه
شخصين دبيين - 4 اشخاص طبيعين<<< انا من الدبيين
ربع كيلو لحم مفروووم
حلقات باذنجان تقريبا من 8-10 حلقات حسب الحجم
كوسا مقطعه حلقات تقريبا حبة كوسا
كوسا برتقاليه Squash مقطعه حلقات او مكعبات <<< اللي ما تحبها لا تحطها بس انا اموت فيها. الكميه اللي تعجبك
بصل
صلصه طماطم
بهارات
زيت او زبده
نص علبة قشطة قيمر مذابه في 3 ملاعق ماء او نص كوب قشطة خفق
125 غ موزاريلا
الطريقه
طبعا شوحي الخضار في الزيت في مقلاه حجمها متوسط مع اضافة الملح عليهم و رشه اوريغانو لو عندك .. لو ما في مو لازم..
حطي الخضار على منديل عشان الزيت الزايد يتشربه المنديل
الحين بنفس المقلاه .. حطي البصل .. حمريه مع البهارات اللي تشتهينها .. حطي شوي مويه و حطي الصلصه ((انا استخدم ربع علبه صلصه حق الربع كيلو))
بعد ما تتجانس الصلصه مع المويه حطي اللحم و حمري و خليه يستوي ويتسبك ..
بالخلاط حطي القشطه والموزاريلا :) و ملح وفلفل
الان في صينيه قد حقة الباي .. وانا استخدمت الالمنيوم الدائريه.. عرفتوا المقاس؟
حطي نتفة لحم بالقاعده
خضار
لحم
خضار
لحم
وفوقه صبي خليط القشطه والموزاريلا
حطيها بالفرن على حرارة 350 لمدة 20 دقيقه
حمري الوجه
يممممممممممممي عجييييييييييييبه
طبعا الكارب بالصينيه كامله = 7.5
طبعا انا استخدم تورتيلا قليلة الكارب .. تلاقونها عند التميمي
كل حبة تورتيلا = 5 غ كارب و 6 غ الياف .. انا اكل 2 بصراحه
********************
Oopsie Rolls
هذي مسويه صرعه في عالم اللو كارب .. وهي بديل للخبز و بديل للبانكيك و بديل للاكلير وبديل للكريب
و بديل لعجينة البيتزا
خفيفه ولذيذه .. انا اكثر شي اكلها بانكيك
3 بيضات
100 غ فيلادلفيا
ربع م.ص كريمة التارتار << ضروري
رشة ملح
م.ص سكر صناعي
اللي تحب فانيلا تحط بس يكون شي تسويه للحلى
افصلي الصفار عن البياض
اخفقي البياض مع كريمة التارتار والملح والسكر حتى يصير ابيض و ثقيل زي الكريمه .. اذا قلبتي الزبديه ما يتحرك << ياني اكره هالمرحله
اخفقي الجبن والبيض لحالهم ثم ضيفيهم بشويش وقلبيهم بشويش عالبياض... عشان ما تشيلين الهوا اللي دخلناه بعملية الخفق
الحين حطيه في صواني صغيره او صينية مفن او كب كيك حجم كبير او صغير او بالملعقه اسكبيها في الصينيه بشكل كتل .. المهم حجمها لا يزيد عن بيتزا صغيره
اخبزي على حرارة 350 لمدة 15-20 دقيقه حسب فرنكم :35:
لذيذه جدا جدا جدا وخفيفه
في ناس ياخذوا حبتين ويسووا همبرغر وناس يسووها بيتزا وناس اكلير وناس بانكيك حسب راحتك
هنا حلوه للاكلير ااااااااه يا قلبي
برغر عجيب
لمحبات الباي والبيتزا و حتى يصلح خبز برقر لو صوانيك اصغر
بيتزا و خبز برغر
يكفي صور .. فهمتوا الفكره الخنفشاريه
لو تبينه بانكيك .. لا تخفقين البياض... اخلطي كل شي وصبي البانكيك
***************************
خلطة الكيك والخبز (( 3 دقائق))
هذي لخلطه اليوم سويتها .. افتقدت للاكل المنفوش زي الصامولي ..
بس هذي ارضتني جدا جدا جدا خصوصا للي يحبون نكهة النخاله .. نفس الشي ترى ..
خبز المايكرويف:
الكميه تعطيك ما يعادل 4 توستات و ممكن يدخل الفريزر ويحفظ لوقت الحاجه
4 م.ك زبده
بيضتين
10 ملاعق ماء
5 حبات سكر ريجيم أو 1 ملاعق سكر ريجيم حق الطبخ<< انا استعملت الحبوب ..
4 ملاعق بذر كتان مطحون
4 ملاعق طحين اللوز ((المهباج يبيعه - بنده - او انتي اطحني اللوز حقك كويس))
2 سكوب بروتين مصل الحليب بنكهة الفانيلا <<< غير محلى اللي عندي من جي ان سي وكل سكوب فيها 3 غ كارب
0.5 م.ك بيكنج باودر
رشة ملح
اخلطي كل شي و حطيه في صينية التوست اصغر حجم او اذا عندك اي اناء يتسع للخلطه ويدخل بالمايكرويف
اختاري الطبخ و شغلي المايكرويف 1.5-2 دقيقه ...
لو تبين تسوين كيك زيدي السكر الى 20 حبه أو 8 ملاعق سكر ريجيم و ممكن تحطين كاكاو بودره
بس ترى كل م.ك كاكاو = 2 غ كارب صافي ...
ممكن تحطين فانيلا . بشر برتقال او بشر ليمون . نكهات صناعيه مثل روح الموز او ممكن تحطين فيها عين الجمل
راح تصير سايله لكن لما تدخل المايكرويف تنفش كأنها حقيقيه .. كأنها كيكه قديمه يابسه شوي لكن مازالت حلوه . اتوقع كا خبز توست بتكون احلى لانها ناشفه تتحمل الصوصات حقت اللحوم اللي بنحشيها فيها ويفضل تدبلين الكميه للخبز عشان يرتفع من جد و تخلينها كما هي للكيك
حلوه بصراحه واعطتني احساس الكيك بدون حرمان ..
الكميه كامله = 12 غ كارب بدون مكسرات ..
تحذير: لا تفتحين المايكرويف ابدا اثناء الخبز والا ما بترتفع صح ...
********************
سلطة السيزر اللذيذه
عشقي الازلي
صدر دجاجه متبل بخل ابيض وبودرة ثوم و بودرة بصل و ملح وفلفل و قليل باربكيو سوس واللي تحب مسترد تحط ..
عندك طريقتين لطبخه ..
الاولى تشويح عالنار ..
الثانيه وهي الالذ .. تغمسينه في بيض ثم في طحين الصويا او طحين اللوز و تحطينه بالثلاجه نص ساعه ثم تقلينه
جهزي السلطه وهي عباره عن كوبين خس .. خياره - جبن بارميزان مبشور او جبن تشيدر مبشور بس البارميزان احلى
6 حبات كاجو مقليه او محمره بدون زيت .. كيفك
الصوص : يا اما صوص جاهز قليل الكارب تاخذين منه ملعقتين وتخلطينهم مع ملعقة زيت زيتون وملعقة خل ابيض
او صوص انتي تسوينه : ملعقة لبنه - ملعقة مايونيز - بودرة السيزر سلاد حقة كنور - زيت زيتون
*************************
بيتزا بقاعدة الجبن
حطي موزاريلا على الصينيه
فوقها صوص بيتزا على ذوقك بكميه قليله طبعا
خضار البيتزا اللي تجوز لك
ببروني او سلامي او دجاج او اللي تحبين
طبقة موزاريلا ثانيه
اخبزي بالفرن حتى تتحمر القاعده ثم حمريها من فوق
*************************
اومليت لذيذ
3 بيضات
ربع كوب سبانخ او نص كوب لو انتي مثلي تعشقينه
جبن تشيدر << البرتقالي الاصلي وان ما حصلتي حطي الازرق حق البقاله
ملح
فلفل
بيكون لو تحبين
شوحي السبانخ مع الملح والفلفل و اطبخيه كويس
حطي الجبن واخلطي
حطي البيض و خليت يستوي
جدا لذيذ
*************************
تاكو اللحم
خبز التورتيلا قليل الكارب
لحم مفروم
صلصه
بهارات التاكو
بصل
زيت
خس
افوكادو
طماطم
جبن تشيدر مبشور
قطعي الافوكادو صغار
خبز التورتيلا حمريه بالفرن وهو مسفوط لحد ما يقسى شوي
حمري البصل وبهارات التاكو واللحم و الصلصه
الخس وفوقه اللحم ثم الطماطم و الافوكادو و فوقه الجبن ورجعيه الفرن عشان يذوب الجبن
**********************************
بينت بتر كب
اولا الشوكولاته
0.5 كوب كاكاو بودره
0.5-1 علبة قشطه قيمر ((حسب لو تحبي كاكاو غامق او فاتح))
4م.ك سمن كريسكو <<التميمي او زيت جوز الهند ((يكون قاسي مو سايل))
0.5 كوب سكر رجيم او حسب الكميه اللي تحبي
فانيلا
ذوبي السمن و حطي عليه الكاكاو و الفانيلا و اخفقي كويس ثم السكر والقشطه
ثانيا الحشوه
0.5 كوب بينت بتر طبيعي بدون سكر وملح <<او بمطحنه كويسه اطحني كوب فول سوداني مع ملعقة زيت لحد ما يصير ناعم قدر الامكان مع رشة ملح و سكر ريجيم حسب رغبتك أو 2/3 كوب سكر ريجيم + فانيلا
في القوالب الورق حطي كاكاو ثم بينت بتر ثم كاكاو و عالفريزر
كل حبه فيها 1.5 غ كارب أو حسب الماركات اللي تستعمليها
تحفظ بالفريزر ..
***************************
اكمل لكم لما اجرب باقي الوصفات .. وان قدرت اصور ما راح ابخل عليكم
اتمنى عجبكم الموجود
انا كل ما فكرت في هذا الدايت غيرت رايي
بس طريقتك حلته في نظري