هذاني...وصلنا يوم طبينا برايتن يوم جبهتي صارت صعارير من النوم في الباص...

اسلموا...


.............

طبعا لما قمت من النوم لقيت رجلي العزيز جايبن لنا توست ابيض واسمر وجبن حق الفيجتاريان ..


انا قمت نفسي بطرف خشمي اقول له توست؟؟؟فيه وحدة زيي بنت عز ودلال اقوم اكل توست على آخر زمن ...


قال وهو يكشر عن انيابه ضاحكا متشفيا : الدلع خلاص خليناه هناك بالمطار ياست الحسن ...من اليوم ورايح مافيه ...


إلا....


توسسسسسسسسسسسسست...


همممممممممممم....


زي افلام الكرتون ...قلت عساك ماتحدره ان شالله هذي كله شماته فيني بدل ماتروح تاخذني مطعم مثل الناس؟؟؟

قال والله انتي مطوعة...:) وهنا مافي مطاعم مسلمين انطقي واكلي توست واشربي موية زي الزاهدين والعبّاد...:)


وهم هم يم يم ...


هين اوريك انت وجهك والله لااردها لك يوم ان شالله ...المشكلة توني مصلحتن له سليق يطير العقل مدري متى بنتقم منه وانا كل يوم اقول بكرة:)

قوي فزي طولك صلحي لي شاهي ولاتقللين سكر ابي سكر...

قلت كذه؟؟؟هذا واحنا تونا شهر عسل...اجل لو جا شهر الجبن وش بتسوي بي؟؟


قال هذا شهر التوست...قومي صلحي لي شاهي..


واقوم اعين من الله خير واصلح شاهي بغلاية هتلر ذيك ... وانااصلح لي نسكافية ...

زاد الله ساخرهم لنا يحطون لنا على هكالصينية المتقشعة كم عينة شاهي وقهوة كنكور مدري ككنور...وسكر ريجيم وسكر ابيض وحليب عليبات صغار مرة طبعا انا استهلكه بس ولا رجلي ميحب الحليب...

المهم وارتشف كوبي وانا انظر اليه وهو يطالع جريدة توه جايبها ياذاك اني اعرف انغليزي...

اثره من جنبها قلت حبيبي وش تقول هالصفحة...

قال يحكون بالبرلمان ووش ناقشوا بوول ستريت قبل امس...

واناظر والاهم يحكون عن جبهة الديموقراط حزب العمال يوم كانوا بيشيلون بلير ويحطون ابو خشة ذاك ....بشي ثاني يعني قلت يالله تخلف عليك...:)




جايتكم....بروح اركب على الغدا

للحين طعم الجبن بالتوست في ريقي...

موب طعم شين الحق يقال ولكن طعم اول يوم...طعم التلحيط والحرمان واحسساس اول الغربة اللي تحسين فيه فعلا ان مالك والي ولاعندك الا واحدن ماسكن الريموت يقلب في القنوات الاربع اللي وحدة منهن خربانة....

مع ذلك يطق على الخربانة....يحطه عليها ويقعد يتفرج...أي والله ...


اللهم لااعتراض ....



المهم مر اول يوم من التوست وجا بكرة ومير يصحيني نصلي الفجر...


هو؟؟؟وش صاير؟؟؟

موب عادة يعني هذا هو الغريب في الأمر :)


قال ايه كاتبين في المنيو الخايسة ذي ان فطورهم يبدا من الساعة سبع ...قومي يالله ...

قلت هيييييييه عرفت وش السالفة...

انت مير قم صل الفجر والفطور محنب ميتين جوع...


وهي يصرخ علي: لاوالله الا ميتن جوع ....عقب التوست امس نبي فطور فطووووووور...

قلت خير خير ...الله أكبر...

واقوم اصلي والبس عبايتي وننزل للرسبشن ...

رجلي من الجوع يبي يتكلم من السعابيل ماقدر ....قلت لها البريك فاست وير از ات الله يخليتس لي؟؟

قالت هناك في الرستورنت...

وهي نمشي عرط عرط عرط ياخي الارضية تطلع صوت محرج امش بشويش الله يخسك وهو يقول اسكتي ابي فطوووووووور...


ابو الجوع والله لو انك جاين من ادغال افريقيا تراها بس قبل يوم ونص يوم ناكل رز مندي عند اختك يوم نروح نوادعها...ياحافظ...


وهو ثفففففففت ثفثفثفت ...

وندخل الرستورنت المذكور ولا فيه طاولات مرززة مافيه الا طاولة وحدة فاضية...كلهم جايين على الوقت ياحافظ ...

ونقعد نطالع وين نروح له مير يطلع لنا واحد هندي ووحدة لبنانية هيلووووووو


وش عندكم هنا الفطور...

ونطالع والا البوفيه يقالكم انه بوفيه (:) ) طاولة مرزوزن عليها يجي ألفين صحن والاكل ماغير كورن فلكس وبسكوت ويت بيكس وكروسان وكيك اكواب...مع جيكين حليب وعصير...

باااااااس؟؟؟

طبعا انا الامر عندي عادي بس رجلي جاه انهيار عصبي قعدت اقرا عليه...:)

لأنه كان متوقع فول وبيض شكشوكة سوسج اي شي يملا بطنه خصوصا اننا متعودين على فنادق خمس نجوم تقدم مشروم وسوسج واشياء اخرى تروع ماتنعد ولاتحصى ..اربع نجوم تقدم بيض شكشوكة مع حركات فول وبيض مسلوق ودجاج مقلقل وبيف مقلقل...لكن هذا ثلاث نجوم على الاقل حطوا بيضن مسلوق او فول الله يخسكم....

قلت هذا بلاه والله من زين النجوم الثلاث اللي محطوطاتن عليه...عطني كروسانة بس وعين من الله خير...

وتخخخخ تخخخخ...والله ياانا رديتها عليه هكاللحظة...شماتة مابعدها شماتة وهو يأكل ببطء وألم واسى على الستين باوند اللي دفعناهن واتلاها تبقشت على كروسان وكيك...

طبعا تبين فطور مطبوخ ميخالف بس ادفعي زيادة (نيهههع) .....:)


هماني قلت لك يابوي وانت مختارن بريطانيا....

ماهنا الا فقرن مقعي ...والفقر المقعي يعني باختصار فقرن يجلس على ركبتيه متقوقعا في بهو الفندق ابو ثلاث نجوم ياعله موب حليل..

عاد يوم جا من بكرة ويعلن رجلي حركة تمرد ضد الجوع اللي تسلط عليه في ذاك الفندق تقولون ماقد اكل ولا شرب...بس تبون الحق..

له حق...احنا من يوم نقوم لين ننام وحنا نمشي نمشي مشين يروّع ...وكل مامرينا مطعم ولا شي فاحت ريحته لين يقوم يسعبل...يعني بالنشبة لزوجي هذا اكبر تعذيب بالنسبة له...


جيبيه وربطيه وحطي عنده سندوتش سب واي ولا كنتاكي....:)

همن نرجع ماناكل الا توست ...والله ماغير التوست حتى ماهوب محمصة ماحطوا لنا حماصة ....

وبااااااااااارد تقولين مطلعن من ثلاجة يعني مايشتهيه حتى الغنم تكرم النعمة...

بس شنسوي؟؟؟

يوم جا هكاليوم وحنا ندوّج نبي نلقى لنا شقة ونلقى محل بيتزا مكتوبن عليه حلاااااااااااال...

حلااااااااااااااااااااااال...ويصرخ رجلي باعلى صوته ....


زي غولام يوم لقى الخاتم حق ساورون ماي برشزززززز ماي برشزززززززز...هههههههه


ويدخل وهو يبي يشرق بسعبولته ويطلب بس طلع غالي بالحيل...قلت ابد انا مابي شي اطلب لك انت بيتزا وكباب ....وهو يطلب ويطلب ويمسك بطنه وااااااااوتش..

عاد صاحب المحل مصري الله يطول عمره والله ياهو طار فينا طيرة....


ويقعد يقول لنا عن محلات الحلال ويعلمنا عن اماكن تجمع المسلمين ومن هالحكي...

ويخبرنا عاد عن الاسعار وانها غالية الى حد كبير لأن المكان ساحل وفيه اجانب واجد فلذلك تغلى الاسعار والايجارات ...

المهم رجعنا الفندق ومعانا الغنيمة الكبرى(بيتزا وكباب ) ياهو كان يوم عيد بالنسبة لرجيلي يابعد قلبي..

يابعد عمري ...يابعد روحي وكل مامني...والله ياانا قامت دموعي تصبصب يوم شفته سعابيله تقاطر قلت والله يارجيلي لو انه فيه فرن والا اي شي نقدر نصخن عليه كان والله لااطبخ لك وانفخ لك وحنا بفندق بس شسوي يابعد عمر بدورة انت وقلبها...



خل ربي يفرجها ويصير لنا بيت واوريك والله لااعوضك عن كل دقيقة انحرمت فيها من البلع والاكل اللذيذ الساخن ...



ياحبي لك يارجلي....بروح اصيح شوي واجيكم اكمل لكم يوم قرب يدخل رمضان ...ويوم رحت المسجد اول مرة ...



جايتكم بعد صلاة المغرب على طول...

ياشيخه شلووون؟؟

تصدقين انا ولله الحمد ماصار لي شي

حتى كنت متغطيه وعدوني ولاطلبو افتح وجهي
زعفشي ورب الكعبه مافتحووه

اللهم سالوني جايبه فرش فوود
جايبين فلوس
وبسسسسسسسسسسسسسسس

وانا جايبه عفووش الدنيا معي
ولابسه عبايه سودا ونقاب بعد
بس الحمدالله عديييييت اسهل من السهل
لكنهم يسبوون مطار نيويورك انا مادخلت امريكا منه
انا دخلت من ديترويت

ماجنتا كلامك فعلا صحيح...

مشكلة قومنا للأسف انهم يحبون انفسهم ويحبون واقعهم رغم انهم يسبونه...

يعني عندنا انتهاك حقوق وعندنا مشاكل ياسف لها العدو مع ذلك قايمين قاعدين نقول ماحد مثلنا ومافي احد مثلنا...

والغربيين يعانون من التفكك الاسري والمخدرات والضياع:)

ياناس ماشفتوا من الحضارة الغربية الا اسوأ مافيها الخمر والصياعة ؟؟؟

طب ليه ماتشوفون اجمل مافيها احترامهم للقانون وسيادة كرامة الانسان والعمل المؤسساتي بيناتهم ؟؟


بالنسبة لتطور الانسان الغربي ياماجنتا هو امر معقد جدا جدا اكثر من الحديث النبوي المذكور ...

فيه حديث آخر رواه ابو هريرة رضي الله عنه عن النبي عليه الصلاة والسلام انه قال تقوم الساعة والروم اعز الناس...

قال عمرو بن العاص رضي الله عنه آلله أنت سمعت هذا من رسول الله يقصد ابو هريرة؟؟؟

قال آلله سمعته من رسول الله ...

قال اما وقد قلت فيهم هذا فإني أعرف فيهم اربع خصال ماكانت في احد الا عز...

أحلمهم عند فتنة (يعني لما تصير عندهم مشكلة يتعاملون معها بحكمة موب يقعدون يصايحون ويصارخون زي طريقتنا للأسف)...

وأسرعهم افاقة بعد مصيبة...(يعني اذا صارت عندهم كارثة موب يقعدون قرون يصيحون عليها لا على طول يبدون العمل)...

ولايتركون فقيرهم بينهم (تخيلي هذا من عهد عمرو بن العاص*..)

وامنعهم من ظلم الملوك (يعني مايخضعون للملوك والاستبداد السياسي ) ...


لو قريتي في التاريخ الاوربي لوجدتي انهم عانوا من التسلط السياسي بشكل بشع يمكن ابشع مما كانا عليه الحال في البلدان العربية هلحين..


مع ذلك بالاصرار والعمل وصلوا للي وصلوا له ....


لو قرييت في التاريخ الاوربي وكيف كان الانسان الاوربي يعاني من قلة الوعي والجهل والتخلف والتعصب الديني كان اقشعر جلدك ...

لكن حنا يالمسلمين ولله الحمد التعليم عندنا متاح من ايام النبي عليه الصلاة والسلام مافي احد يمنع من التعليم ...لكن مع ذلك عندنا قلة وعي للأسف...


حنا بامكاننا نكون افضل منهم لو رجعنا لحقيقة ديننا القائمة على التسامح والمحبة والاخلاق العادلة والقوية موب مجرد مظاهر مع اهمال الاخلاق الاسلامية...

والله انك صادقه يابدوره الحلوة هذي مشكلتنا يالعرب عندنا بلاوي الدنيا ونرفض رفض قاطع مجرد مناقشتها ونغضب عندما نقارن بالغرب لو نعترف بس اشوي باغلاطنا كانت تغيرت اشياء كثيره ولكن واسفاه