ست الحسن انا احترم وجهة نظرك وبقوة..

لكن من خلال قراءتي لردك استنتجت أنك تخلطين بين ماهو سياسي وبين ماهو شعبي...

سياسة الخارج في كل الدول الغربية ككل سياسات العالم...قذرة وتتحكم فيها المصالح...


وجرائم الحرب والحروب اللي تشنها الدول الغربية على رأسها امريكا للأسف اساساتها المصلحة وارادةا لسيطرة ولااحد يختلف معاك على قذارة هالدول اللي تطيح عند رجلين امريكا وماتقدر تقول لطغيانها لا...


لكن سؤال بسيط وبريء:) من من الدول في العالم كله وعلى مر التاريخ كانت تحكمها النزاهة والقوة والاخلاق الانسانية ؟؟؟الا الاشياء اللي يقولون لنا عنها في التاريخ وكتب المطالعة:)

تكفين جيبي لي دولة عربية اسلامية تحكم سياساتها النزاهة والنقاء والمواقف الانسانية؟؟؟


لكن تعالي نتكلم على نطاق الحكومات والقانون والشعوب اللي صاغت هالقانون...


انا راح اطلب منك تتخيلين ....

بالله عليكي لو كنتي عاملة وتبحثين عن حقوقك كعاملة في دولتين وحدة منهم غربية والثانية من دول العالم الاسلامي ...

بالله راح اتفضلين اي وحدة ؟؟؟


لو انتهكت حقوقك كعاملة راح تفضلين انك تروحين لمحكمة في دولة اسلامية ولا محكمة في دولة غربية؟؟

طبعا قضية اننا نحكم بالدين وان القانون اللي مبني على غير الدين السماوي هو باطل...انا ماخالفك هنا كثير لكن اقولك انها صارت شماعة للي مايطول العنب...


اولا وش القانون الاسلامي اللي تشوفينه في الدول الاسلامية اللي تقول انها تطبق الشريعة؟؟؟

شوفي عندك صفحات الجرايد وش تنقل عن جرايم اغتصاب وقتل وتعذيب تجري في دول اسلامية والمجرمين يروحون فيها سنتين سجن وكم من جلدة وبس....


لاواردى منهم الناس اللي يقولون انتم وش يدريكم عن اللي يصير في المحكمة ماتدرون لاتظلمون القضاء والقضاة .....اش هالكلام؟؟؟

هل فيه شعب واعي يعرف الحد الادنى من القرآن الكريم والسنة يرضى بهالتلاعب بالشريعة ويقولون لنا اننا نحكم بالاسلام وبالدين ؟؟؟

هذي مهزلة والله ...وبالنسبة للقوانين الغربية ...كلنا نعرف ان القوانين الغربية يسمونها (علمانية) لكنها لو دققتي في طريقة صياغتها وكتابتها بتلاحظين أنها مبنية على اساسات كثير منها مأخوذ من الأديان والكتب السماوية (وترا منها القرآن الكريم على فكرة) ...

يعني واضع الدستور الامريكي في احد المقالات اللي قريتها في كتاب (لاسكوت بعد اليوم ) حق بول فندلي ...واضع الدستور كان يوجد عنده ترجمة للقرآن الكريم ...اضافة الى ان الدستور الامريكي (مثلا) يعتمد على الوصايا العشر اللي موجودة في العهد القديم (وصايا النبي ابراهيم عليه السلام) ..

الكرسي الملكي البريطاني معتمد على مباركة الكنيسة مثلا...ولاتتم المراسم الا في الكاتدرائية وبمباركة البابا طبعا...

هذا يدل على ان الدول الغربي مهما كانت علمانية فان الدين يشكل جزء من تراثها وقانونها...

طبعا مايعني قولهم عنها انها علمانية انها ماهي عادلة....ابن تيمية رحمه الله ذكر في كثير من كتبه مانصه :

ان الله تعالى ينصر الدولة الكافرة على المسلمة بعدل الاولى وجور الثانية...



يااختي الكريمة المسألة في الحكم والسياسة ماهو مجرد احنا مسلمين وهم غير مسلمين ...لا

المسألة عدالة وتحري للعدالة وللقانون..


وزي ماقال الله تعالى في سورة المائدة: ولو ان اهل الكتاب اقاموا التوراة والانجيل وماانزل اليهم من ربهم لاكلوا من فوقهم ومن تحت ارجلهم...منهم امة مقتصدة وكثير منهم ساء ماكانوا يعملون


هذا على نطاق الحكم الداخلي والقانون...

اما السياسة الخارجية فمانختلف انا وانتي انه كانت اوربا ومازالت مجموعة دول استعمارية مصّت خيرات الدول العربية والاسلامية وتعاملت معها بوحشية وكان الاساس للأسف ديني ....

وحرشت بينها واثارت نزعات طائفية وبلاوي ومشت..

زي اللي يصير الحين في العراق....

لكن حتى في ذيك الفترة ايام ماكانت يسمونها غريت بريتن وكان القانون البريطاني لسه في طور التطوير كانت تسيّر مظاهرات شعبية واحتجاجات في البرلمان على ممارسات المستعمرين ضد دول الكومنولث (اللي صارت فيما بعد كومنولث) والمستعمرات الافريقية وماوراء البحار...غير البلدان العربية اللي انكوت من الاستعمار اللي لعب فيها لعب...



ولعلمك حاول الكثيرين من الثائرين على سياسة الاستعمار عمل اعتصامات واحتجاجات وطالبوا بمحاكمة مجرمين الحرب...واستغرق هذا جهد وتعب وعمل اعلامي متواصل ومحاولة الوصول لقلب الحدث في المستعمرات الانغليزية....

وتجاهلوهم السياسيين في البداية لكن لما وصل الامر للجرايد والاعلام حوكموا اللي ادانوهم بجرايم حرب وكان عليها شهود ...

بالله عليك شعوب(لاحظي انا اقول شعوب مااقول حكومات) زي كذا وش تقدرين تقولين عنها؟؟


وزي مايقول النبي عليه الصلاة ولسلام..كما تكونون يول عليكم...


لما تكون الشعوب فاهمة وواعية ومتحضرة ويهمها ضميرها وتعرف بالضبط اش اللي يدور في العالم وتكون لها الحرية انها تعترض وتحتج على ممارسات حكوماتها..هنا تحترمين الشعب وتحرمين حكومته اللي معطيته وجه انه يتكلم ويحتج...حتى لو كانت مجرمة...

ارجو اني اكون وضحت لك وجهة نظري اني لما اتكلم عن احترامي للغرب كـ(حضارة) مانشوف منها الا الجانب السيء ...ان فكرتي أني انا اشوف منها جانب جيد مضيء اللي هي (طريقة التفكير المستقلة) يفترض اننا نحتذيه ...وننبذ الجانب السيء...ونحاول نصوغ حضارتنا الاسلامية المستقلة القادمة باذن الله...


اشكرك اختي ست الحسن على مداخلتك الثرية وتعليقك...

وفعلا كثير من الناس لما ينظرون للغرب تختلف نظرتهم...منهم من ينظر للسياسة وعمل السياسيين في الخارج ويحكم...وبالمقابل ناس تشوف الفساد الاخلاقي والقرف والصرمحة وتحكم على كل الحضارة..وناس تشوف الاخلاق الجميلة عند الاغلب منهم...وتحكم....


لكن في النهاية مانختلف على انها حضارة تبهرنا في جوانب بقدر ماتقرفنا في جوانب...

على فكرة اخوات فيه اخت نبهتني على حديث تقوم الساعة والروم اعز الناس...


الصحيح تقوم الساعة والروم اكثر الناس...موب اعز الناس...

مع اني اتذكر اني قرأته في كتاب موب في النت انها اعز الناس....


واشكر الاخت الكريمة على تنبيهها...

كذلك الاخت نفسها تقول ان الحديث اللي اوردته الاخت مجنتا انها ماوجدته في بحثها...

فلذلك جرى التنبيه....

ورود الدار انا حاليا لااجيد الا شغل البيت والبربرة على النت:)


بس ان شالله انتظر قبول السفارة لطلب الالحاق حقي...

دعواتكم لي بالتيسير ياغاليات...

الاخت الوردة الفريده ... والهدرزة والدارزي بأي لغة ان شاء الله ؟؟ مع خالص الشكر للتوضيح

اما الاخت بدورة .. عندي سؤال السفرة شهر عسل يعني توريست تريب ولا بزنس تريب يعني ريزدينت يعني اقامة للعمل .. لقافة بس
...
لي قراءة لما اقترحتي علي قراءته .. خالص الشكر
(شكل تخصصك تاريخ :) )

هلا ماجنتا الغالية..لاوالله سفرتنا دراسة وين شهر عسل الله يرحم الحال...

بس اقول شهر عسل لأني توني (عروصة)مالي الا سبع شهور متزوجة...

ولابعد تهنيت والله ...:)


تخصصي لغويات ...لكن التاريخ هو امتع واروع مااحب قراءته...

لو تبين مراجع تاريخ اعطيك بعد ...طبي وتخيري...:)