لااااااا اجل بانبسط معك :)
انا برضو احب اقرأ في التاريخ
بس غريبة (ممكن اعرف ايش يعني تخصصك لغويات )
لاني اعرف هنا في لغويات في الفيزياء وهو صعب جدااااا فهل هذا تخصصك المقصود ..
ولا غيره
جربي اقرأي (أجهدتني التساؤلات معك ايها التاريخ ) مافي معلومات كثيرة بس كتاب حواري مع التاريخ حالم
وفي كمان كتاب مذكرات وريثة العروش موجود بلندن
وكتاب مالكوم اكس خطيييييييير
وهاتي اذا عندك كتب

طبعا مرت الايام البئيسة بالنسبة لزوجي انا كنت مبسوطة كرشتي خفت والبتاعات كل شي نحف والبناطيل صارت تنسلح...

والعبايات صارت تسحب وتخبخب...ياسلاااااااااااام....

صرت كني عروسة اسلامية ...

على طاري العروسة الاسلامية في قصة تبي تبكيكم بطلتها امي قبل تمرض الله يجزاها الجنة ويحرمها على النار...


بس ذكروني فيها عقب...خلاص؟؟؟اتفقنا...؟؟؟


خل نرجع للأيام المؤلمة والتعذيبية بالنسبة لرجلي...

رجلي الحبيب قام هكاليوم الجمعة...وهو يتحفز وياقف قال بروح اصلي الجمعة...

قلت يالله تهديه ..يالله تخليه ...يالله تصلحه....

ابد دقايق والبس عبايتي واتوضا واجيك ...

قال وش عبايته اطقي بالبيت الحريم مالهن جمعة ولاجماعة...

قلت اقووووووول...

ترا والله لاازهم على توني بلير يجي يمحطك...


وش هالحكي وش هالكلام وش هالخرط حريم وماحريم...

يعني عشان حريمنا مايصلون الجمعة في ديرتنا خلاص صار حرام؟؟؟

ماتدري ان الصحابيات على قولت عائشة ام المؤمنين :"كن يشهدن الفجر مع رسول ويرجعن متلفعات بمروطهن مايعرفهن احد من الغلس"

قال ايه هذولي الصحابيات موب انتي وخشتس....تخيلي لو نلقى سعوديين هناك وقاموا يقززونك؟؟

ولييييييييين...


ياولد الحلال وشهوله يقزوني بكارفور حنا ولابغرناطة؟؟؟

حنا بنروح للمسجد وانا بعباتي وش انت خايفن منه...

وطق وطقيق قلت والله ماتروح تصلي بدوني :)


اخر شي رضخ للأمر الواقع ...لعن ابو بليسك اول مرةاروح المسجد؟؟؟


ونروح وهو نفخ ...وتنبيهات..انتبهي تلتفين...انتبهي تلكمين...انتبهي تنحنحين...

مادري هو يحسب ان المسجد مختلط ....شكله كذا...

ولا موب طبيعي هكالي سواه فيني ...


حتى انا تصورت انه مختلط ...


يوم وصلنا له بعد لأي ولفلفة وندخل والا فيه اخ سوداني ينظفه ياحبي له ...

طبعا المسجد تحسبونه منارة ومّأذنة والله اكبر الله اكبر...


ماهنا الا عمارة مكتوبن جنبها لوحة وانيننها...(مسجد المدينة)...


وندخل وتلاقينا ريحة العود...عوووووووود...يالله من فضلك ..يالله الجنة...


فعلا ريحة مسجد ...

ويدخل رجلي وهو يقول اص اص لاتكلمين بسألهم عن مكان الحريم ..


وافصخ بوتي كان مطر الله يعزكم رطسنا وقال لنا السوداني الحريم فوق...



ويهبط رجلي اشوى...وارقى فوق...



والقى ...آآآآآآآآ...هذي يبيلها جلسة يابنات ...بس مبدئيا بقول لكم وش لقيت...

لقيت ثنتين اخوات يتدارسون القرآن...

الله ..يخلف علينا...



طبعا الاختين هيلين ....وهاجر...

برجع اقول لكم ان شالله وش صار بالتفصيل الممل...

المسجد...

اخ يالمسجد...

وش احتاج عشان احكي عن مكان زي مسجدنا؟؟؟

مسجد المدينة؟؟؟؟

احتاج قدرة احلام مستغانمي على سبر اللغة...

احتاج قدرة رجاء الصانع على الرصد...

احتاج قدرة فيكتور هيغو على تقمّص الشخوص..

احتاج قدرة كل الأدباء عشان اقول لكم وش الشعور اللي حسيت فيه يوم دخلت هكالمكان...


طبعا ...كوني حساسة...كوني رومانسية..كوني عاطفية ...ورقيقة (اخسي يا شيخة:) )...


هو اللي يمكن يخليني ارتبط عاطفيا بهالقوة مع الاماكن والاشياء...


طبعا لازم تعرفون اني وقت دخلتي للمسجد كنت بأمس الحاجة الى اني اشوف شي يذكرني بالاسلام...

بالعروبة...تخيلوا والله يوم اني شفت الصمري ابو محل البتزا بغيت ابكي ...


صح الناس هنا اجاويد وبحالهم بس ابي مسلمين ابي اسلاااااااااااام يانااااااااااس...

ابي مسجد ...ابي آذاااااااااااان....ابي الله اكبر اكبر....ابي ...

والله شوي وانهار...



لاوازيدكم من الشعر بيت فندق ابو ثلاث نجوم مافيه انترنت ...لاوايرلس ولالس...

يوم انا دقينا على الرسبشنه قلنا لها نبي انترنت قالت وشو؟؟؟:)


قلنا انترنت..واير لس...

قالت جربوا...ان لقيتوا:)


والله العظيم...

فانقرفنا وتعطلنا وتحسرنا لاقدرنا نحول فلوس لاقدرنا نتصل باهلنا لاقدرنا نسوي شي..

لو على الاقل نعرف وين القبلة نسمع اذان لو مسجل ميخالف...

بغيت انهبل لين رحت المسجد...

موب يوم اني شفت المصلى ومن الهبال ابي اصف وان اماادري وين القبلة ...

قلت لهيلين قبل اتعرف عليها وير از ذابراير دايركشن...

وهي تبدا تحكي عربي : اتبعي الخط المستقيم وهذا هو اتجاه القبلة...


طبعا فيه خطوط على الفرشة عشان تدل المصلين على اتجاه القبلة...


وانا افرح وارجهن...
وابدا اصلي..

وااااااااااه..ياكان شعور...كأني اول مرة أصلي (شكلي أسلمت :) )....


فعلا شعور غريب...شعور انك من جديد رجعتي لاهلك ...لناسك لربعك...

ويوم خلصت واقصعرّ لحالي (اقصعرّ مصطلح زلفاوي قديم مايعرفه الا اللغويين زيي يعني تقرفصت لحالي في خوف)...


طبعا هالمصطلح النادر اندثر وانا الان اعكف على احياء الالفاظ الزلفاوية المتينة ...يازين الزلفي ياناس....


بسوي معجم الفاظ الزلفي المندثرة في عشيرة والثوير والارطاوية والمنسف والعدزدة...ان شالله بمساعدة خالتي أم سعد الله يطول بعمرها ويمتع بها...وبمساعدة حريم عمومتي أم دحيّم الأول وأم دحيّم السادس وأم دحيم الثالث عشر...

طبعا مايبيلها تفكير ليه ان كل حريم عمومتي أمهات دحيّم ....زي ماحريم اخواني هلحين كلهن أمهات عزيّز....:)


اسم الجد مقدّس ولابد اول طفل يتسمى عليه بالطول او بالعرض...ونادر من يخالف هالقاعدة...:)

المهم تشعبط الحديث ...


المهم اني اقصعريت في مكاني مير تقول لي هيلين : كم اند جوين أس..


واقوم مبتسمة ...قلت السلام عليكم ...ويردون علي السلام...

ياحبي لهن ..آآآآه ياناس لاتحسبوني ابالغ بس بد احس الكلمات تعجز عن وصف شعوري وانا معهن...

لقيت هاجر..اخت بنغالية معاها جنسية بريطانية...

مديت يدي وصافحتهم لاحظت يستغربون المصافحة...عادة لما يبغون يحيون بعض لابد يتعانقون ..لكن المصافحة ماادري احس يستغربون لما ادخل عليهم واسلم عليهم كلهم زي ماكنا نسوي في مصلى المدرسة ايام زمان الله يذكر ذيك الايام بالخير...

لقيت هيلين تعلم حازيرا (هاجر ) كلمات من القرآن الكريم وتنطقها بصعوبة بالغة جدا..

تعرفون لأن لهجة ولغة البنغال جدا دقيقة وعميقة فمايمكن انهم يتقنون كلمات قرآنية خصوصا ان هاجر تقول انها ماتلقت تعليم كافي لابالعربي ولابالبنغالي يوم كانت صغيرة...

هلحين عمرها 45 ومازالت تحاول تفهم القرآن وتقرأ الله يخلف علينا ويرزقنا حسن النية...


المهم وهيلين تحاول معها...

هيلين تتكلم الانغليزية بلهجة برايتون بطلاقة ...موب بس بطلاقة بل بمستوى يؤهلها انها تكون مذيعة او اعلامية..واتوقع انها وحدة من الثنتين...


وايضا تتكلم العربي....وبطلاقة ...وبتجويد ...شيء...يعني لأني عربية بس عرفت ان مستواها كذا مرتفع جدا...

واكثر منه تتكلم فرنسي...!!!

وش السالفة ياهلين ؟؟؟

قالت امي فرنسية وانا فرنسية اصلا...بس ابوي جزائري...وزوجي بريطاني من اصل سوري
(طبعا ماعرفت الا عقب انها متزوجة اول احسب انها عمرها 18 قسم بالله الله يحفظها وانها بنت مع اهلها او عايشة لوحدها هنا...لكن اكتشفت انها متزوجة وعمرها 35 ورب العرش العظيم كنها بنت ثانوي )


وماشالله تعالي شوفي مستوى اللغة وطريقتها في تعليم هاجر مخارج الالفاظ....وتردد ...


ماسألتني من وين انتي ...ولا وش ...بس قالت تعالي انضمي معنا وبس...

يالله من فضلك يامجلس هكالذكر...


ومادريت الا تدخل هكالحرمة الانغليزية لابسة حجاب على راسها..


وتسلم وتعرفها هيلين علي قالت ذس از بدرية...اند ذس از جوليا...

جوليا مسلمة بريطانية ....مااسلمت الا قبل شهرين...ولسه تتعلم الدين على شوية شوي..


فوجئت بجوليا تجيب كرسي جنبها وتطلع كتيب تعليم الصلاة ...بالرسوم يعني...


وتحطه جنبها عشان تعرف وشلون تصلي...لأنها مابدت تصلي الا قريب...

وتطالع في الكتيب وتصلّي...

يعني شي وقف له شعر جلدي لما شفته...

لما تشوفين المؤمن...وقوة الايمان كيف تخلي الانسان مايستحي انه يتعلم زي الطفل الصغير...

تذكرت شعوري لما كنت طفلة وكانوا في المدرسة يعلمونا الصلاة...والوضوء...
وكنا نتضارب من توف قدام الابلا اول...


ياااااااااه ايها الاسلام...


يااااااااه ايها الدين العظيم...



كيف تفعل وكيف تسوي بالناس...وتجعلهم مخلوقات من نور؟؟؟

كيف تنثر نورك على ذيك الوجوه...؟؟؟

كيف تجعل الناس اللي زي الآلات والحجر هنا يتحولون الى كائنات مصنوعة من نور..


توقف جنب الكرسي...وتطالع في الكتيب...وتركع....وتسجد....


وتسلم ....



وتجي...


موقف وربي ابكاني...ابكاني...


ومن يملك انه يمسك دموعه لما يشوف منظر زي كذه؟؟؟


.................



يتبع...

ماجنتا لمين هالكتاب اجهدتني التساؤلات؟؟

انا قريت لاسكوت بعد اليوم فيه نسخة عربية وانغليزية لبول فندلي حدا اعضاء الكونغرس فيه محاولة لفهم المسلمين ووجودهم في امريكا...

كذلك في التاريخ البحت عندك قصة الحضارة حق ول ديورانت...
طبعا ماقريته كله :) التسذب خيبة...

لأنه كبير بالحيل...

هو اهم ماكتب في التاريخ طبعا...

مقدمة ابن خلدون كذلك تقعد للتاريخ نظريا..


اللي قد قريته في تنظير التاريخ كتاب نهاية التاريخ حق فوكوياما...الي احدث ضجة كبيرة في العالم ...بصراحة كتاب قيم رغم انه مجرد ترويج رخيص للفكرة الامريكية المعروفة...بس يحتوي معلومات ضخمة وعادلة ومنصفة....

كذلك كتاب الاسلام والغرب نظرة في الصراع...حق سامويل هانتغيتون...قيم جدا جدا رغم انه هجمة قوية على الاسلام ...بس يفيدك في طريقة قراءة التاريخ....

يامالك من كتب التاريخ...وكلها قيمة بس يهمك انك تنظرين نظرة منصفة ..

اللغويات حقتي ماهيب فيزياء ولاكيمياء...لغويات عادية (لنجوستكس)...


بس اصلا تخصصي لغة عربية....

والله انها دمعت عيوني يوم قريت اللي تصلي ومعها كتيب .........................الله يثبتناو ايها .................كملي يابدريه الله يعينك علينا............................والله اني احلم بكتاباتك ........................ويوم دريت انك مريضه ضاق صدري ,,,,,,وشوي الا ابكي ......كانك اختي ......وانتي اختي في الاسلام وووووووو واختي في عالم حواء .....لاتطولين علينا جعل عيني ماتبكيس........................