الجزء الثاني ... طريقة جميلة لتقوية الإرادة ... اقرأوها للآخر

هنا رابط الجزء الاول ... للي مالحق يقرأه

http://forum.hawaaworld.com/showthread.php?t=4273440

******************

بما انه في تفاعل كثير في الجزء الأول

... حمسني انزل الجزء الثاني من الموضوع ....

بالنسبة لكيفية تقوية الارادة ؟؟

زي ما سبق وذكرت .. انه الرجيم لمدة محددة

وبعدها يرجع كل شي طبيعي ... وترجعي تاكلي

زي خلق الله بدون ما تحسبي لقيماتك ..


النقطة الأولى ...(محاسبة النفس)

ﻻزم كل وحدة تجلس مع نفسها وتحاسب نفسها ..

وتساير نفسها ... عارفين كيف تساير نفسها ؟

يعني تصبر نفسها وتخدع نفسها .. كل ما ضعفت

ارادتها وزادت شهيتها ؟ تبدأ بحوار مع نفسها

بهدوء ... وتقول في نفسها ( معليش اتحمل

دحين واضغط على نفسي ... واخر الاسبوع اكل

كل شي اتمناه... وكلها كم شهر ... وخﻻص اصير

باربي وبعدها ... ارجع لأكلي الطبيعي .. اشرب

كوفي واكل حﻻ .. واتعشى مع الناس ... )


النقطة الثانية .. تهذيب النفس

لازم قبل ماتروحي للناس ... وانتي عارفة

انه في عشاء ... ﻻزم تهذبي نفسك وانتي في

السيارة ... اتناقشي بهدوء وقولي ... مضطرة

اكل زيادة حبيتين عن رجيمي ( ﻻ افضل الرجيم

في المناسبات )... بس بدون افراط

ﻻنه الافراط بالاكل في وجبة واحدة ... تحتاجي

يومين عشان تحرقيها ... اما زيادة الاكل بدون

افراط ... تحتاجي اقل شي نص يوم عشان تحرقيها

.....

زي ما قلت ... لتقوية الإرادة ﻻزم تهذبي نفسك

في بيتك وعند الناس وفي السيارة ... وطريقة

تهذيب النفس .. عن طريق الحوار مع نفسك

راح يكون عندك تمهيد مسبق ... وعقلك الباطني

اقتنع بكﻻمك ... واكلك راح يكون على ما مهدتي

عليه ...

النقطة الثالثة ( اذا لخبطتي ،بعدها بأربع ساعات

ابدأي من جديد)

في تقوية الإرادة وهي مهمة ...

انه في حالة لخبطة رجيمك ... في حفلة او حتى

في البيت ... عادي عادي الدنيا مو طايرة وﻻ احنا

مستعجلين يابطة ... ﻻ تزعلي وﻻ تحزني

ﻻنه الزعل ... راح يحبط إرادتك ... وراح تنتقمي

من نفسك .. وتقولي لنفسك ( دام لخبطت رجيمي

ليش اتعب نفسي واستمر وانا انسانه لعابة

وفاشلة ؟؟ ) انتبهي من محادثة نفسك بطريقة

سلبية ... عجبني الدكتور محمد الهاشمي مخترع

رجيم اللقيمات .. حين قال في احدى مقابلاته

عند لخبطة الرجيم ... وزيادة الاكل ... بعدها بأربع

ساعات ... ابدأي الرجيم من جديد...

فهمتو علي؟ عارفين وش السبب اللي الناس نزلو

اكثر من 20 و 30 كيلو ؟؟ انهم كل مالخبطو

رجيمهم ... تكمل رجيمها

وما تيأس ... مثلا طول اليوم لخبطتي اكلك .

خﻻص هذبي نفسك من جديد وابدأي بعدها

باربع ساعات ... المهم تكملي ... ارجع اعيد

المهم تكملي .. المهم تكملي

كل اللي نحفو ...( كملو بعد ما لخبطو )



النقطة الرابعة ... (ارسمي صورة في بالك )

طبيعه المرأة غيورة كل ماشافت وحدة جسمها يهبل .
. تجيها غيرة تصير مثلها ...

حطي رسمة جسمها ببالك .. كل ما ضعفت

ارادتك .. افتكري صورة جسمها في مخيلتك ..

لعل وعسى تنسد شهيتك عن الاكل



النقطة الخامسة... (نظفي مطبخك من المغريات)

خاصة للمتزوجة

حاولي تنظفي مطبخك من كل المغريات ...

ﻻ تروحي للسوبر وانتي جيعانة ... عشان ماتاخدي

كل شي تشتهيه ... روحي وانتي بطنك مليان ..

تحسي مالك نفس بشي غير الضروريات ...

وأيضا ... حاولي تطبخي اكﻻت انتي عارفة انك

ما تشتهيا كثير ... مثلا انا ما احب الايدامات

كثير ... تﻻقيني طول الاسبوع وانا من ايدام لأيدام

ومرتين باليوم كبسة او مكرونة



النقطة السادسة ... (خففي طلعات من البيت)


اللي تسوي رجيم ... حاولي قد ماتقدري تخففي

طلعات ... خاصة لضعيفات اللارادة

خففي من الموﻻت ....

ﻻنه المطاعم والحلويات والمغريات ... تتعبك

والشوارع واسماء المطاعم والعزايم تغريك

انا عجبتني مقابلة مع (سمية الخشاب) بعد مانزلت

16 كيلو ... تقول انها ما كانت تطلع من البيت ...

وهدا ساعدها على الرجيم

وكمان .. ديانا كرزون ...بداية رجيمها منعت نفسها

من المحيط الخارجي لمده 6 شهور وكانت مهتمة

بالنادي ... يعني اكبر المشاهير والفنانات ...

عزلو العالم الخارجي لفترة محدودة ... عشان

تستمر بالرجيم ... يعني مو طول عمرهم منعو

نفسهم من الخارج... خاصة ضعيفات الارادة ... بقوة

انصحها تخفف طلعات ... وتعملها جو بالبيت عشان

ماتدور طلعه ... مثلا تشغل اضاءة صفراء خافته ...

تعملها كوفي تركي او فرنسي... وتشوف برنامج

مفيد .. يفيدها في الاخرة قبل الدنيا ...

النقطة السادسة ...

وخليتها اخر شي ... عشان تختمو موضوعي فيه

وتكون اخر شي تفكرو فيه ... وهو الدعاء

الدعاء .. ثم الدعاء

ادعي انه ربي يرزقك القوة والارادة والعزيمة

اللي تعينك على النحف

ادعي ربي ... انه يسد شهيتك عن الاكل بدون شر

كل ماجاء ببالك ... تدعي لنفسك ولعيالك ولزوجك

لا تنسي تدعي بالعزيمة والقوة والارادة اللي

توصلك للوزن المثالي ... بعيدا عن شر كل ذي

حااااااااااسد

واتمنى الموضوع ينال اعجابكم .... ربما نقطة واحدة

تعمل المستحيل ... وتحققو اللي ببالكم


يلا كل وحدة تقول .. ايش اكثر نقطة عجبتها ؟؟


انتظر تعليقاتكم