والله يا اختي الله يعينك وان شاء الله تكسبين اجر افطار صائم وأنصحك تبدين شغلك من ألحين سوي كمية سمبوسة بحشوات مختلفة وفرزنيها وسوي سبرنج رول وبف بحشوات مختلفة وسوي كبة وكفتة وعلى الفريزر وأصابع الجبنة والسمبوسة الصغار بالجبنة علشان بس تطلعينهم من الفريزر واللي يبي قلي تقلينه واللي يبي الفرن تدخلينه الفرن وتتفرغين لباقي الأطباق مثل الشوربة والمكرونة والعصيرات وعندك الحلى سويه قبل بيوم والدونات والجبنية أعجنيها من قبل بكم يوم وافرديها وقطعيها حسب رغبتك وحطيها في صينية ودخليها الفريزر تجمد ثم حطيها في علب بلاستك او أكياس واذا أحتجتيها طلعيها تدفى ثم اقليها وحليها بالشيرة وبتخفف عنك كثير لأنها تاخذ وقت واذا بتسوين كريمة أو جلي أو حلى الكاسات سويها قبل بيوم وسوي مطبق اللي يكون في صينية لذيذ وسريع وسوي صينية توست محشية دجاج تكونين مجهزه الحشوة قبل بيوم وممكن تسوين فطاير التوست في الأله سريعة ولذيذة والأقماع سويها من قبل وفرزنيها اذا أحتجتيها طلعيها واحشيها بتونة وذرة ومايونيز هذي الحشوة لذيذة مرة للأقماع وممكن تسوين منتو الكذاب وممكن تجيبين خبز صغار وتحشينها بحشوات مختلفة مثل جبنة +بيض أو تونة ومايونيز أو نقانق وبطاطس أو لبنة وخيار وأنتي ورغبتك لأن ماهو ضروري كل يوم تعجنين عجينة لا نوعي كل يوم شكل وممكن تسوين فطاير توست تقطعين التوست بالشكل اللي تحبين وتدهنينه بالخلطة اللي هي جزر مبشور بشر صغير +بصل أخضر مفروم وممكن استبداله بفلفل أخضر +مايونيز + جبنةسايلة ثم تدخلينه الفرن يتحمر وممكن تقطعين خبز صامولي حلقات وتدهنينه بالخلطة اللي هي مايونيز + جبنة مبشورة + ثوم مفروم ثم تدخلينها الفرن تتحمر أو تحطين على شرائح الخبز حشوة بيتزا وتدخلينها الفرن تتحمر وعندك البف باستري ممكن تسوين منه أشكال كثيرة منها الحالي ومنها المالح وهذا اللي ذكرته الحين ولو أحتجتي طريقة أي شي قولي ممكن أقدر أساعدك والله يوفقك

الله يكون في عونك بس اهم شي احتسبي الاجر
الشوربات عندك شوربه الجريش بصراحه خطيررره وشوربة الحريره وشوربة كريمه الدجاج وشوربة العدس والشوربه الصينيه
والمعجنات اعتمدي عجينه العشر دقايق سهله ولذيذه والعصيرات نوعي عصير الاناناس وعصير اليمون بالنعناع وعصير 4*4 والعصير الموف عصير السيزر وفخفخينا والحلا لقيمات لها طعمها الخاص في رمضان واصابع السنبوسه والجبنيه والطبق الرئيسي معكرونه وشكلي مره باشمل ومره حمراء ومره لزانيا ومره صينيه واضيفي معهم السنبوسه بالدجاج والسبنغ رول والكبه وورق العنب والسلطه اي نوع ونصيحه وقت الفطور لاتكثرين حطي القهوه والتمر ولقيمات ونوع عصير والباقي بعد الصلاة علشان ياكلون ويريحون شوي قبل صلاة العشاء والتراويح

ماشاء الله لا قوة الا بالله
والله الجمعه حلوة بالذات فى رمضان
الله يهنيك
يارب

الله يجزاكي خير واحتسبي الاجر انك بتفطرين صائمين اولا حبيبتي الفطور سوي نوعين من الحلا مع القهوه
سوي لك قائمه بحيث ماتكررين الاكلات ويصير انواع المنافسات مع حريم العيال في كل مره حطي نوع ولا نوعين من الشربات طبعا السنبوسه جهزيها بكير وانا صراحه افضل عجينه الي فيها ورده وراجعيني بالخاص في طريقه خيال بقولك عليها فرزني بدري علشان ماتنضغطين حطي مكرونه بالبشميل ولا لازانيا لاتنسين المقبلات مدري وش بقى ان شالله البنات يفيدونك بالباقي