الزواج بين العادات و التقاليد و بين الشرع في مصر....دعوة للنقاش

السلام عليكم يا رواء الاسلام يسعدنى الانضمام لهدا القسم الرائع وفعلا احنا كنا فى أمس الحاجة لمثل هدا القسم لما نراه الان من تضارب فى الاراء و الاقوال بين العادات و التقاليد و بين الشرع مبارك لك مقدما و ربنا يجعلك فى كل فايدة سنعرفها من خلال بابك الثواب و الحسنات وربنا يجازيكى كل خير

احب ابدء بسؤال محيرنى وهو ان اهل العروسه غظب عنهم بيطلبوا من العريس مهر عالى لان فعلا تجهيزات الزواج اصبحت غالية جدا جدا و فى نفس الوقت نلاقى من الجانب الاخر ان العريس برضة غظب عنه ان امكانياته مش حتساعده نظرا لمعدلات انخفاض المرتبات . فبنبقى ولا قادرين نقف مع طلبات اهل العروسة و لا بنبقى قادرين نقول للعريس ادفع اكتر ولزلك سؤالى هو لية الشرع قال ان المهر من حق البنت فقط و ليس من حق الاهل التصرف فية فى متطلبات الزواج؟؟؟ وهل ادا استخدموه فى الجهاز يعتبر حرام عليهم ؟؟؟؟ طب الناس تجيب منين ؟؟؟؟؟؟ وانا مش فاهمة يعنى اية تاخد البنت المهر ؟؟ طب ماهو بعد الزواج لو طلع العريس مش كويس ممكن ياخدة منها تانى باى طريقة ملتوية و شكرا

حقيقي تستحقي الشكر يا رواء علي الموضوع المهم والجميل
لأننا لما نتكلم عن الزواج والعادات المعمول بيها في بلدنا ..
نصطدم ببعض حاجات شكلها غلط ..
وعادات الزواج تختلف من بلد لبلد داخل مصر ..
كمان إتفاقات المهروالشبكه والجهاز تتغير من مكان لمكان في بلدنا ..
مهم طبعا نعرف كويس الشرع بيقول إيه في الموضوع ده
هناك عادات في بعض المحافظات في مصر يعتقدوا أنها الأصوب بالنسبه للشرع ..
إللي هو .....
بأن العريس هو وحده المسؤول عن فتح البيت والجواز في حدود إمكانياته .. مع تقديم مهر مناسب للعروس يكون خاص بها .. وشبكه بدون مغالاه ..
ودور أهل العروسه المباركه فقط .. ولو أرادوا تقديم شيئ لإبنتهم .. يبقي كتر ألف خيرهم
عندنا في بلدنا بنشوف عادات كتير ومختلفه ..
وللحديث بالتأكيد له بقيه

:icon28:لسلام عليكم
ازيك يا رواء بارك الله فيكى على الموضوع المهم
دندن ازيك يا ست الكل عايزه ارد عليكى بان فى الشرع للبنت حريه التصرف تماما تعطى مهرها لابيها او كما تشاء لكن فى الوقت نفسه الزوج يكون مجهز بيت الزوجيه تماما يعنى لاينتظر من الزوجه اى مشاركه
لكن احنا فين من كل ده دا احنا عندنا هم ما يتلم واصبحت قوانين ان الزوجه النص والزوج النصف ولو عندها فلوس بيكون منتظر على احر من الجمر علشان ياخذ كل الى حيلتها واعرف ناس بيبحثوا اولا هى البنت عندها ميراث قد ايه ويخطبوا صاحبه الميراث الاكبر والفقيره تقعد على دكه الاحطياتى ياله لكم تحياتى

السلام عليكم جميعا

اسمحولى أشارك معاكم فى الموضوع ده

اللى أنا أعرفة ان المهر ده بيكون مشاركة العريس فى الجهاز

يعنى بيدفع المهر وخلاص مش بيجيب العفش، لكن بيجيب النجف والسجاد والحاجات المتعارف عليها دى

وأنا شايفة ان ده مش صح وكما تفضلت الاخت د ون ان ده مش بينفع مع سوء الحالة الاقتصادية فى مصر

فالمفروض ان الاسر يحصل بينهم تعاون أكتر (طبعا ده لومتأكدين من ان العريس كويس وعارفينه ) يعنى يتشاركوا الاسرتين مع بعض علشان يتجوزوا البنات والولاد

ويفرشوا اللى يقدروا عليه والباقى على حسب الامكانيات علشان الامور تعدى

.... واكيد للحديث بقية واراء أخرى