الطبخ ،،، السناااعه ،،، موضوع للنقااش

والله يا اختي المسأله كلها حظوظ ونيات ... ربي يبارك لنا في ازواجنا واولادنا وكل شي موجود ما نقدر نعمم على شي واحد فقط ... عن نفسي انا طباخة بريمووو ولا يمكن زوجي ياكل عند احد من صحابة الا مايرجع وياكل عندي , وعلاقتنا مرة طيبة ويسبق اي شي فيها مخافة الله والود والرحمة تالي ...

الله يسخر للجميع ازواجهم ..

اللهم امين

اللَّهُمَّ
لاَ تَقْطَعْ رَجَاءَنا .. وَبَلِّغْنا آمَالَنا .. وَاكْفِنا أَعْدَاءَنا .. وَأَصْلِحْ لَنا شَأْنَنا ..
وَاكْفِنا أَمْرَ دُنْيانا وَآخِرَتِنا .. وَارْزُقْنا قَلْباً تَوَّاباً .. لاَ كَافِراً وَلاَ مُرْتاباً ..
وَاغْفِرْ لَنا وَاهْدِنا وَارْزُقْنا وَأَنْتَ خَيْرُ الرَّازِقِينَ

اللهم صلي على سيدنا محمد وعلى اله وصحبة اجمعين

دايم نسمع سالفة تردد ان البنت تقول ابي خدامة لاننا متعودين عند اهلي وهالحكي
اكبر غلط البنت تقارن بين شخصين(ابوها وزوجها ) مختلفين وتبي منهم نفس العطاء ونفس نمط المعيشه
بالرغم هي مراح تعطي الزوج نفس ماتعود من أمة وفي بيت اهله
صح يمكن تعيشين عند زوجك بمستوى افضل من مستوى اهلك بس مو معناتها تطالبين باشياء انتي متعوده عليها
لان لو بنقيس لازم نساوي كفتين الميزان ولازم العدل
يمكن هو من اسرة غنية بس امه الي تطبخ وخدامتهم ماتغسل ملابسه وخواته الي يرتبون غرفته
فانتي لازم تسوين نفس الشي طبعا اذا بنقيس ان لازم تكملين حياتك على نفس الي متعوده عليه عند اهلك
هو يجيب لك خدامه تخدمك فقط وأنتي تتفرغين لخدمته
هو من حقة تصيرين له مثل امة بالدلال وخواته بالكرامة بمأنك تبينه مثل ابوك صح ؟
لكن الزواج مقياس مختلف تمام
انتي وزوجك توينز بتاخذون لكم سنة او اكثر لحالكم بدون اطفال
لازم هالمرحله تعيشونها لحالكم بدون خدم لانها مرحله مراح ترجع وتعيشون نفس الحريه والتفرغ

بالنسبة للبنت الي ماتبي تطبخ حتى وهي تعرف ماتبيه يتعود ليش !
اجل هو مراح يكرمك عشان ماتتعودين .. طبعا لاننا نقيس بنفس الميزان لازم العدل

مادري ليش احس البنت مرآية لـ أمها بكل شي بحسن التربيه بالسنع بحسن التبعل
لانها عشات عند امها ع الاقل 20 سنة فهي اخذت منها وتربت على يدها
فالازم بعد العرس من حق أمي علي اني ابيض وجهها قدام الزوج واهله
لان مافيه زوج يتقبل فكرة انه يرتبط ببنت وهو عارف انها تفكر مراح تطبخ له حتى مايتعود وتبي خدامة لانها ماتعرف شي
حتى لو هو يقدر يوفر لها خدامة احساسه انها انانيه حتخليه يصرف نظر عنها
ع الاقل يدري انها ماتعرف كل شي بنسبة 50% ومتأمل انها بتتعلم
يعني متقدم للناس وهو متعشم بالبنت واهلها خير
فليش تصدمينه فيك وفي اهلك ؟ ماتقدم الا شاريك كوني قد الاختيار وبيضي وجة الي ربوك
لان انا مستحيل اقبل اني افكر ببنت لـ أحد اخواني وانا اعرف انها كذا
حتى لو كنت واثقة مليون بالمية ان اخوي بيعزها ومايبي يكرفها بس هالشي احساس
كون البنت تحب العطاء والمشاركة والمساعدة افضل من بنت متعلمة بس تاخذ وماتعطي
انا هالفئه مأنسجم نهائي معهم ولااقدر انسجم
كوني لزوجك الزوجة الي تتمنينها لـ اخوانك
ودائما انصح كل بنت انها تقبل على الزواج بنية حسنة لاتدخله بافكار سوداء متوحشه
كوني على طبيعيتك سوي الشي الي يمليه عليك ضميرك
الضمير هو الشي الوحيد الي يلازمك طول عمرك لاتقتلينه وتموتينه بسواد الافكار
الزوج جنتك ونارك احتسبي كل شي عشان رضاه وعشان تدخلين الجنة من احسانك
الواحد منا مايدري اي حسنة تدخله الجنة ولا اي سيئة تحرمه منه
يمكن طبخك لزوجك وحسن تبعلك يدخلك اعلى مراتب الجنة

نجي لسالفة السنع بالطبخ والاهتمام والنظافة بالبيت ياحبيباتي هذا شي ماله علاقه انك بنت نعمة اولا
وسالفة انك ماتعرفين تطبخين ولاتعرفين تسوين قهوة تعدل المزاج ولاتعرفين تنظفين حوستك ولا تعرفين تغسلين حمامك
تراك مو بنت النعمة لا انتي هنا البنت الرفلاء الي الله يصبر الي بيعاشرك و انتبهي تربطين الرفاله بالثراء
صراحة بميزاني انا مافي مقارنة بين البنتين المليانه حيويه الي تصدقين انها بنت
والبنت العجيز الي ياله تقدر تمد يدها تاخذ الفنجال من الربادة وقل السنع
ولا تمد لك الفنجال وهي لافه خشتها عنك تقل مانة عليك وع
ترا هي طبع والطبع يلازم الانسان بجميع امور حياته

انا بسالفة البنت الي قبل كم يوم يشتكيها زوجها ماتعرف تطبخ ماحبيت ارد لانها صغيره وتحاول تتعلم
لكن المشكلة بأم 25 وطالع الي ماتعرف تسوي شي بس تعرف تاكل هذي مادري وش وضعها
تلاقونها تعرف لكل شي بالدنيا الا الشي الي بتنفع فيه ماتبية
التعلم على كل شي مايجي بضغطة زر او برساله تفعيل واشتراك
يوم عرسك يجيك رسالة تم تفعيل خاصية النظافة لديك وتم تفعيل خدمة الطبخ
التعليم يجي بمراحل وهي صغيره المفروض تعلم ترتب غرفتها وكل شي يخصها
بمراحلة من المتوسط تتعلم كيك حلويات بسيطه الثانوي تبدا تتعلم سلطات شوربه
طبخات مسلوقة قلي اي شي تساعد بالمطبخ
بعد الثانوي تبدأ بالطبخ الصدقي وضد ان يكون معها احد بالمطبخ
حنا تعلمنا بهالطريقة والحمدلله نعتمد على انفسنا
صدق ترا الطبخ مو كيميا وشي صعب يبي له لا الطبخ احساس جميل لما تعرفينه
واجمل انك يكون لك لمسات خاصه فيك يميز طبخك عن الباقين

البنات الي بسالفتك ام شيبس و الله من قلة الادب وقل الذوق الحمدلله الذي عافانا من مابلاها فيه
تهقينها صادقة ولاتلعب عليكم ؟ تره صدق فيه ناس فقاشين نصابين بشكل لايطاق
الحريم مسارين الا من رحم الله
تلاقين الي مكرمها رجلها تقول للناس انه الظالم الي مايعرف يحشمها ولا يقدرها وتبي الفكة منه < عشان العين
والي زوجها شرير وممشيها على كيفه تقول للناس ان كلمتي هي الي تمشي وماعليه مني
هو شكله مرض نفسي بكل الحالتين
وحدة مره تحرض البنات لاتعرسن محسستهم ان العرس اضطهاد و ظلم
الي تقول السالفه تقول اني انخطبت وقلت للبنات بالكلية وهي معهم تقول حذرتني بدل المره الف اوافق ورحمتها وقررت اهون وش لي بالشقا خل اخلص دراسة اول
تقول قدر الله وطلعت الظهر وراها واول ماركبت سحب زوجها يدها وبوسها
تقول انصدمممممت وشلون تو تقولنا كذا
اثاريها تخاف من العين الحمدلله والشكر وتنصب على هالعالم
فأنتي لاتصدقين تلاقين هالقصص شي من نسج الخيال

واعتقاد الناس الي تكرم زوجها بالطبخ يعرس عليها ويهينها لا ياحبيبتي مو قاعدة
اعرف رجال كبير بالخمسينات مستحيل ياكل من غير طبخ زوجته مايستغني عنه
ولايعجبه اي طبخ غيرها
وثاني بنفس العمر بعد يقول ماحد يعرف مقاس الاكل الي ينحط بصحني الا زوجتي تعرف مقاس الاكل الي اكله ماتزيد ولاتنقص

يختي احس هالاحساس شي جميل يزيد الموده بينهم انه يحب اشياء ماحد يسويها غيرك

وفيه حريم تطبخ وتنفخ بس ماتعرف تتعامل مع الرجل كزوج فتعيش روتين ومشاكل معاه
فتظن ان السبب الطبخ وتذل امه فيه وان الي تطبخ مالها قيمة














ما رايكن

يمكن لان وقتها كله مهتمه بكشختها مو بالمطبخ
عكس اللي يروح يومها بالمطبخ والغسيل تعرفين شكلها كيف يكون
والرجال هالوقت يبون الوحده على سنقه عشره

أنا أنا ماشاء الله عليك

أنا أنا ماشاءالله عليك أعجبني ردك