الله يخليكم بنات اللي جاها اكتئاب بعد الولاده تدخل تطمني كيف تشافت منه

السلام عليكم ورحمه الله وبركاته ‏

بنات تكفففووون تكففففون ادخلو وساعدوني والله اني في هم مايعلمه الا الله

بنات انا كان حملي صعب واجهضت عالشهر السادس وبعد الولاده باسبوع حسيت اني ولدت من جديد
وان ربي كنتب لي العافيه بعد ماكنت حاسه بالموت قرب مني الله يحسن خاتمتنا
بعد عشرين يوم جاني انسداد بالاذن ورحت للدكتور وقال سليمه احس دخل فيها زي الهوى
ومن بعدها طار النوم جلست يمكن فوق عشرين يوم ماانام فيها الا كم ساعه لدرجه عقلي ضاع وبديت اهلوس ‏
وبدا راسي يثقل وينمل وجاتني دوخه فضيعه خفت مع اهتمامي بالاكل لاني طول فتره حملي ونفاسي ماكنت اكل ‏
واستفراغ تقريبا خمس مرات باليوم الله يكرمكم فضعف جسمي وبعد الاهتمام بالاكل شوي الله يجزى امي كل خير كانت تاكلني وانا ابكي شوي خفت الدوخه ‏
بسألكم بنات اللي جاني من اكتئاب مابعد الولاده ولا شي ثاني جاتني الاعراض كلها ورى بعض ‏
‏ عدم اتزان وعدم تركيز ونسيان فضييييع وشرود احس كاني ضايعه او مفهيه ‏
مو فاهمه شي وعيوني مزغلله واحس اني اركز كل حواسي عشان افهم اللي حولي ‏
وفيني ضيقه وخوووف شديد اصحى من النوم مفزوعه وابكي طول الوقت بسبب او بدون سبب ‏
والخوف كمان بدون سبب مااعرف ليش احس بالجزء اللي فوق من راسي مااتحكم فيه ‏
وتعب وارهاق طول اليوم ودي انام بدون فايده ‏
وحتى لو نمت اصحى ماكاني نمت نص ساعه وقالولي نفسيه وصرفلي الدكتور سبراليكس ‏
دوا للاكتئاب والحين لي من خلصت النفاس شهر ونص وحالي مثل ماهو عيالي مشردين من بيت لبيت
وزوجي تعبااان مره معاي ‏
بس الحاله الغريبه اللي مره مستغربتها اني ماابغى اروح بيت اهلي ابدا اخاف اروح
احس في شي مانعني اروح لهم زوجي يوديني لهم بالغصب والله طول الطريق في السياره وانا ابكي ماابغى اروح ‏
واذا رحت اطفشه كل شوي تعالي بسرعه بعد ماكنت افرح باليوم اللي اروح فيه عندهم ‏
مين مرت عليها هالحاله وتشافت تكفون قولولي وش الحل والله تعبت من هالمرض الله يشفيني ‏
فيه بنات قالولي بسبب نقص فيتامين د واصله نسبتي فيه اثنين وعشرين وبديت العلاج من اسبوع
بس مااصدق ان فيتامين نقصه يسبب كل هالشي بالذات خوفي من اهلي اللي كانو اعز الناس علي
معليش طولت عليكم بس تكفووووون ادعولي ربي يشفيني ويبعد عني كل شر
ياحي ياقيوم ‏
تكفووون فسرولي الحاله معقوله اكتئاب بعد الولاده ولاتقولولي اطلعي من البيت اخرجي ماابغى اخاف واتعب